Congress Conflict: రంగంలోకి కాంగ్రెస్ అధిష్ఠానం.. రాజస్థాన్ రాజకీయంపై దృష్టి

అధికారంలో ఉన్న రాష్ట్రాల్లో అంత‌ర్గ‌త స‌మ‌స్య‌ల‌కు చెక్ పెట్టే ప్ర‌య‌త్నాలు మొద‌లుపెట్టింది కాంగ్రెస్‌. పంజాబ్‌లో సమస్యను పరిష్కరించిన అధిష్టానం తాజాగా రాజస్థాన్ పై దృష్టి పెట్టింది.

సచిన్ పైలట్

పార్టీలో ఉన్న సమస్యల పరిష్కారంపై కాంగ్రెస్ అధిష్ఠానం దృష్టి సారించింది. ముఖ్యంగా వివిధ రాష్ట్రాల్లో పార్టీలో నెలకొన్న అంతర్గత విభేదాలను పరిష్కరించాలని డిసైడ్ అయింది. ఇటీవలే పంజాబ్‌ సమస్యకు చెక్ పెట్టిన  అధిష్ఠానం ఇప్పుడు రాజస్థాన్‌లోనూ రాజీకి యత్నిస్తోంది. ఈ రోజు పార్టీ ఎమ్మెల్యేలతో కీలక భేటీ నిర్వహించనుంది. గతంలో తిరుగుబాటు చేసి చల్లబడిన సచిన్‌ పైలట్‌ వర్గాన్ని సంతృప్తి పరిచే దిశగా చర్యలు తీసుకోనున్నట్లు పార్టీ వర్గాలు భావిస్తున్నాయి. సీఎం గహ్లోత్‌, సచిన్‌ పైలట్‌ మధ్య చాలా కాలం నుంచి విభేదాలున్నాయి

కేబినెట్ పునర్ వ్యవస్థీకరణ.. 

ఈ మేరకు కేబినెట్‌ పునర్‌వ్యవస్థీకరణ ఉండే అవకాశం ఉందని పార్టీ వర్గాలు చెప్పాయి. ఇప్పటికే అధిష్ఠానం తరఫున పార్టీ ప్రధాన కార్యదర్శి కే.సి.వేణుగోపాల్‌, రాజస్థాన్ ఇన్‌ఛార్జి అజయ్ మాకెన్ శనివారం జైపుర్‌ చేరుకున్నారు. నేరుగా సీఎం అశోక్‌ గహ్లోత్‌ నివాసానికి వెళ్లిన వారు అర్ధరాత్రి వరకు చర్చలు జరిపినట్లు సమాచారం. ఎమ్మెల్యేల పనితీరు ఆధారంగా కేబినెట్‌ పునర్‌వ్యవస్థీకరణకు మొగ్గుచూపుతున్నట్లు తెలుస్తోంది. ఈ మేరకు ఓ జాబితాను కూడా సిద్ధం చేసినట్లు సమాచారం. అన్నీ అనుకూలిస్తే ఈ నెల 27 లేదా 28న కేబినెట్‌ విస్తరణ ఉండే అవకాశం ఉన్నట్లు పార్టీ వర్గాలు చర్చించుకుంటున్నాయి.

గత నెల యూపీకి చెందిన కీలక నేత జితిన్‌ ప్రసాద కాంగ్రెస్‌ను వీడి భాజపా గూటికి చేరడంతో సచిన్‌ పైలట్‌ తిరుగుబాటు వ్యవహారం మరోసారి తెరపైకి వచ్చింది. సచిన్‌ను సంతృప్తి పరిచేలా నిర్ణయాలు లేకపోతే కాంగ్రెస్‌ మరో యువనేతను కూడా కోల్పోవాల్సి ఉంటుందన్న విశ్లేషణలు వెలువడ్డాయి. అదే సమయంలో పైలట్‌ కూడా దిల్లీ పర్యటనకు వెళ్లడంతో.. అధిష్ఠానంతో తాడోపేడో తేల్చుకోవడానికే వెళ్లారంటూ ఊహాగానాలు వినిపించాయి. అయితే, వాటని తోసిపుచ్చిన ఆయన అధిష్ఠానంతో నిరంతరం చర్చలు కొనసాగుతున్నాయన్నారు. తన డిమాండ్లపై పార్టీ త్వరలో సరైన నిర్ణయం తీసుకోనుందని ప్రకటించారు.

ఇటీవలే పంజాబ్ సమస్యకు కాంగ్రెస్ అధిష్ఠానం స్వస్తి పలికింది. ప్రస్తుతం ఆ రాష్ట్ర ముఖ్యమంత్రిగా ఉన్న కెప్టెన్ అమరీందర్ సింగ్, నవజోత్ సింగ్ సిద్ధుల మధ్య చాలా రోజుల నుంచి నెలకొన్న విభేదాలకు కాంగ్రెస్ అధిష్ఠానం తెలివిగా చెక్ పెట్టింది. సీఎంకు వ్యతిరేకంగా గళం వినిపించి సిద్ధూకు పీసీసీ చీఫ్ పదవి ఇచ్చి బుజ్జగించింది. సిద్ధూకి పీసీసీ పదవి ఇవ్వద్దని చెప్పిన అమరీందర్ సింగ్ తోనూ నేరుగా మాట్లాడి పార్టీలో అంతర్గత విభేదాలకు స్వస్తి పలికింది. ఇదే ఐడియాతో ప్రస్తుతం రాజస్థాన్ లో సీఎం గహ్లూత్, సచిన్ పైలట్ మధ్య ఉన్న కోల్డ్ వార్ ను ఆపాలని కాంగ్రెస్ అధిష్ఠానం ఆలోచిస్తోంది. మరి రాజస్థాన్ లో రాజీ కుదురుతుందా చూడాలి..!