Indian Railway news: రైల్వే ఉద్యోగులకు బొనాంజా- 80 వేల మందికి జీతం పెంపు!

Indian Railway news: రైల్వేశాఖలో దాదాపు 80 వేల మంది ఉద్యోగులకు వేతన గ్రేడ్లను మెరుగుపరుస్తున్నట్లు రైల్వే మంత్రి ప్రకటించారు.

రైల్వే ఉద్యోగులకు బొనాంజా

Indian Railway news: రైల్వే ఉద్యోగులకు కేంద్ర తీపికబురు చెప్పింది. చాలా కాలంగా ఎలాంటి ఎదుగూ బొదుగూ లేకుండా ఉద్యోగాల్లో కొనసాగుతోన్న వారికి వేతనాన్ని పెంచుతూ కీలక నిర్ణయం తీసుకుంది రైల్వేశాఖ. ఈ నిర్ణయంతో దాదాపు 80 వేల మంది ఉద్యోగులకు లబ్ధి చేకూరనుంది.

వేతన గ్రేడ్లు

దాదాపు 80 వేల మంది తమ వేతన గ్రేడ్లను మెరుగుపరుచుకునే కొత్త నిబంధనను రైల్వేశాఖ ప్రకటించింది. ఈ నిబంధన మేరకు పర్యవేక్షక విభాగంలో ఉన్న సిబ్బంది గ్రూప్‌ 'ఏ' అధికారులతో సమానంగా అధిక వేతన గ్రేడ్లకు చేరుకునే అవకాశముంది. ఈ వివరాలను రైల్వేశాఖ మంత్రి అశ్వినీ వైష్ణవ్‌ బుధవారం వెల్లడించారు.

Thanks to PM @narendramodi Ji for giving opportunities for promotion to 80,000 supervisors of @RailMinIndia. pic.twitter.com/XWmZe7dA5E

— Ashwini Vaishnaw (@AshwiniVaishnaw) November 17, 2022

" లెవల్‌ - 7 సూపర్‌ వైజరీ కేడర్‌లో ఉద్యోగులు గత పదహారేళ్లుగా పదోన్నతులకు నోచుకోకుండా ఉన్నారు. ఇక వీరు ఎలాంటి నిరుత్సాహానికి లోను కావాల్సిన అవసరం లేదు. తాజా నిబంధన మేరకు 50% ఉద్యోగులు లెవల్‌-7 నుంచి లెవల్‌-8కు వెళ్లవచ్చు. నాన్‌ ఫంక్షనల్‌ గ్రేడ్‌ ఉద్యోగులు 50% మందికి నాలుగేళ్లలో లెవల్‌-8  నుంచి లెవల్‌-9 కు పదోన్నతి కల్పిస్తాం. అంటే గ్రూప్ ఏ అధికారులతో సమానమైన స్థాయికి చేరుకోగలుగుతారు. దీంతో రైల్వే ఉద్యోగుల్లో ఆనందం వెల్లివిరుస్తుంది. గతంలో పదోన్నతి లేకపోవడంతో రైల్వే ఉద్యోగుల్లో తీవ్ర మనోవేదన ఉండేది. దీంతో పనులు కూడా దెబ్బతిన్నాయి.                                                                   "

-అశ్వినీ వైష్ణవ్, రైల్వేశాఖ మంత్రి

వీరికి లబ్ధి

ఈ చర్యలతో స్టేషన్‌ మాస్టర్లు, టికెట్‌ పరిశీలకులు, ట్రాఫిక్‌ ఇన్‌స్పెక్టర్ల వంటి సూపర్‌వైజర్‌ గ్రేడ్‌ ఉద్యోగులు 40 వేల మందికి ప్రయోజనం ఉంటుంది. వేతన గ్రేడ్లలో పెంపుదల ద్వారా ప్రతి ఒక్కరికీ రూ.2,500 నుంచి రూ.4000 వరకు నెల వేతనం పెరుగుతుంది.