BJP MLA News: 14 ఏళ్లుగా బీజేపీ ఎమ్మెల్యే లైంగిక వేధింపులు.. మహిళ ఫిర్యాదు, రివర్స్ కేసు పెట్టిన ఎమ్మెల్యే

కర్ణాటక కలబుర్గి ఎమ్మెల్యే రాజకుమార్​ పాటిల్​ తెల్కూర్ ​ఈ లైంగిక వేధింపుల ఆరోపణలు ఎదుర్కొంటున్నారు.

ప్రతీకాత్మక చిత్రం

కర్ణాటకలో బీజేపీకి చెందిన ఓ ఎమ్మెల్యే వ్యవహారం దుమారం రేపుతోంది. సదరు ఎమ్మెల్యే తనను ఏకంగా 14 ఏళ్ల నుంచి లైంగికంగా వేధిస్తున్నారని ఓ మహిళ పోలీసులకు ఫిర్యాదు చేయడం సంచలనంగా మారింది. ఈ ఫిర్యాదు అందగానే.. ఎమ్మెల్యే ఆమెపై రివర్స్ కేసు పెట్టారు. తాను ఎలాంటి తప్పు చేయలేదని ఆ మహిళే తనను బ్లాక్​మెయిల్​చేస్తూ తన నుంచి రూ.2 కోట్లు డిమాండ్​ చేస్తుందని ప్రత్యారోపణ చేశారు. 

కర్ణాటక కలబుర్గి ఎమ్మెల్యే రాజకుమార్​ పాటిల్​ తెల్కూర్ ​ఈ లైంగిక వేధింపుల ఆరోపణలు ఎదుర్కొంటున్నారు. ఆయన తనపై లైంగిక చర్యలో పాల్గొనడం వల్ల తనకు ఓ బిడ్డ కూడా జన్మించిందని.. భరణం కావాలని మహిళ ఫిర్యాదులో కోరింది. దీనిపై స్పందించిన ఎమ్మెల్యే తాను ఎలాంటి తప్పు చేయలేదని.. ఎలాంటి విచారణకైనా సిద్ధమేనని వెల్లడించారు. ప్రభుత్వం ఏ విచారణనైనా చేసుకోవచ్చని అన్నారు. తన పార్టీని, కార్యకర్తలను ఇబ్బంది పెట్టే ఏ పనీ తాను చేయలేదని, చేయబోనని చెప్పారు. దీంతో తనపై ఆరోపణలు చేసిన మహిళపై పోలీసు స్టేషన్‌కు వెళ్లి ఎమ్మెల్యే ఫిర్యాదు చేశారు. తనను బ్లాక్​మెయిల్​ చేస్తూ రూ.2 కోట్లు ఇవ్వాలని డిమాండ్ చేస్తోందని ఫిర్యాదులో రాశారు. ఈ మేరకు పోలీసులు ఆ మహిళపై కేసు నమోదు చేసి.. ఆమెను అదుపులోకి తీసుకున్నారు. 

అయితే, పోలీసులు తనను తన ఇంట్లోకి చొరబడి బలవంతంగా పోలీస్ స్టేషన్‌కు తీసుకొచ్చారని బాధిత మహిళ ఆరోపించింది. తన లాయర్ జగదీశ్​కు వీడియో కాల్ చేసి పోలీస్ స్టేషన్‌లో జరిగిన విషయాన్ని చెప్పినట్లు వెల్లడించింది. దీంతో ఆమె అడ్వకేట్ ఈ విషయాన్ని ఫేస్‌బుక్ లైవ్‌లో బయట పెట్టారు. అయితే, బాధితురాలు తెలిపిన వివరాల ప్రకారం.. కాంగ్రెస్​ పార్టీ నాయకులు చెప్పినట్లే ఎమ్మెల్యేని ఇరికిస్తున్నట్లుగా లేఖ రాయాలని పోలీసులు తనను అడిగినట్లు చెప్పింది. స్టేషన్‌లో తనను పోలీసులు చిత్రహింసలకు గురి చేశారని మహిళ ఆరోపించింది.