IITian Baba : ఇంటర్నెట్ సంచలనం ఐఐటీ బాబాను బహిష్కరించిన జునా అఖారా- కారణమేంటంటే..

IITian Baba : 'ఐఐటీయన్ బాబా'కు అఖారాతో సంబంధం లేదని జునా అఖారాకు చెందిన మరో సభ్యుడు అన్నారు. అభయ్ సింగ్ అఖారాను అప్రతిష్టపాలు చేస్తున్నాడని, అతను సాధువు కాదని చెప్పారు.

ఐఐటీ బాబాను బహిష్కరించిన జునా అఖారా

Source : ANI

IITian Baba : ఉత్తరప్రదేశ్ లోని ప్రయాగ్ రాజ్ లో అత్యంత వేడుకగా సాగుతోన్న మహా కుంభమేళా 2025లో గత కొన్ని రోజుల క్రితం సోషల్ మీడియాలో వైరల్ అయిన ఐఐటీ బాబా మరోసారి వార్తల్లో నిలిచారు. రాత్రికి రాత్రే సెన్సేషన్ గా మారిన ఆయనను జునా అఖారా నుంచి బహిష్కరించారనే ప్రచారం నడుస్తోంది. ఐఐటియన్ బాబా తన గురువు మహంత్ సోమేశ్వర్ పురిని ఉద్దేశించి దుర్భాషలాడారనే ఆరోపణల నేపథ్యంలో ఆయన్ను బహిష్కరించారని సమాచారం. అంతేకాదు అఖారా శిబిరం, దాని పరిసరాల్లోకి సైతం రాకుండా సింగ్‌పై నిషేధం విధించారు.  

అభయ్ సింగ్ పై జునా అఖారా ఆగ్రహం

"అభయ్ సింగ్ చేసిన పని గురు-శిష్య (గురువు-శిష్యుడు) సంప్రదాయానికి, సన్యాసుల సూత్రాలకు పూర్తిగా విరుద్ధం. ఇది గురువును అగౌరవపరచడం, సనాతన ధర్మం, అఖారా పట్ల గౌరవం లేకపోవడాన్ని చూపుతుంది. జునా అఖారాలో క్రమశిక్షణకు అత్యంత ప్రాముఖ్యత ఉంది" అని జునా అఖారా చీఫ్ ప్యాట్రన్ మహంత్ హరి గిరి అన్నారు. అఖారా సభ్యులు కచ్చితంగా క్రమశిక్షణ పాటించాలని, తోటి వారికి వ్యతిరేకంగా ఎవరూ మాట్లాడకూడదని మహంత్ గిరి చెప్పారు. “గురువు మాత్రమే కాదు, తోటి దార్శనికుడికి సైతం వ్యతిరేకంగా మాట్లాడడానికి ఎవరికీ అనుమతి లేదు. ఈ ఉల్లంఘన ఆధారంగానే అఖారా క్రమశిక్షణా కమిటీ అతన్ని బహిష్కరించాలని సిఫార్సు చేసింది” అని తెలిపారు.

అభయ్ సింగ్ అదృశ్యంపై ఓ అఖారా సభ్యుడు స్పందిస్తూ.. వైరల్ అయిన 'బాబా'కు అఖారాతో సంబంధం లేదని అన్నారు. అభయ్ సింగ్ అఖారాను అప్రతిష్టపాలు చేస్తున్నాడని, అతను సాధువు కాదని ఆరోపించారు. ఇకపోతే జునా అఖారాలోని సోలా మణి ఆశ్రమంలో 'బాబా' నివసించేవారని, కానీ ప్రస్తుతం ఆయన ఆచూకీపై ఎలాంటి సమాచారం లేదని సోమేశ్వర్ పూరి తెలిపారు. 

సోషల్ మీడియాలో ఐఐటీ బాబాగా వైరల్

హర్యానాకు చెందిన అభయ్ సింగ్ ఐఐటీ బాంబేలో ఏరోస్పేస్ ఇంజనీరింగ్ చదివారు. సోషల్ మీడియాలో వైరల్ అయిన తర్వాత ఇచ్చిన ఓ ఇంటర్వ్యూలో.. “ఇంజనీరింగ్ చదివిన తర్వాత, నేను ట్రావెల్ ఫోటోగ్రఫీలోకి ప్రవేశించాను. 2019లో కెనడాకు వెళ్లి అక్కడ కెనడియన్ కంపెనీలో నెలకు రూ. 3 లక్షలు అంటే రూ. 36 లక్షల ప్యాకేజీపై పనిచేశాను. ఆ తర్వాత ఉద్యోగం, జీవితంపై నిరాశ చెంది ఆధ్యాత్మికత వైపు వచ్చాన”ని చెప్పాడు. జునా అఖారాకు చెందిన మహంత్ సోమేశ్వర్ పురి శిష్యుడైన అభయ్ సింగ్.. ఐఐటీ-బాంబేలో గ్రాడ్యుయేషన్ తర్వాత ఏరోస్పేస్ ఇంజనీరింగ్‌లో తన వృత్తిని వదిలి సాధువుగా మారారు.

#WATCH | Prayagraj, UP: #MahaKumbh2025 | Baba Abhay Singh who is from Juna Akhada and was also an IIT student once, says, " I come from Haryana, I went to IIT, then changed to Arts from Engineering, that also didn't work so I kept changing and later I arrived at the final truth.… pic.twitter.com/Li6EwgCXbU

— ANI (@ANI) January 15, 2025