Hijab Row: 'హిజాబ్‌' తీర్పు చెప్పిన జడ్జీలను చంపేస్తామని బెదిరింపులు- 'Y' కేటగిరీ భద్రత ఇచ్చిన సర్కార్

Hijab Row: హిజాబ్ వివాదంపై తీర్పు చెప్పిన న్యాయమూర్తులను చంపేస్తామంటూ బెదిరింపులు రావడంతో కర్ణాటక ప్రభుత్వం అప్రమత్తమైంది. వారికి 'Y' కేటగిరీ భద్రత కల్పిస్తున్నట్లు తెలిపింది.

'హిజాబ్‌' తీర్పు చెప్పిన జడ్జీలను చంపేస్తామని బెదిరింపులు

Hijab Row: హిజాబ్‌ వివాదంపై తీర్పు చెప్పిన కర్ణాటక హైకోర్టు న్యాయమూర్తులకు 'Y' కేటగిరీ భద్రత కల్పించినట్లు సీఎం బసవరాజ్ బొమ్మై తెలిపారు. ఈ తీర్పు చెప్పిన జడ్జీల్లో ఇద్దరికీ బెదిరింపు కాల్స్ రావడంతో ఈ నిర్ణయం తీసుకున్నామని సీఎం అన్నారు.

Karnataka govt to provide 'Y' category security to judges who delivered hijab verdict

Read @ANI Story | https://t.co/jW183Dg1YW#HijabVerdict #KarnatakaHC pic.twitter.com/mqbNwFdbCC

— ANI Digital (@ani_digital) March 20, 2022

" హిజాబ్‌పై తీర్పు చెప్పిన ముగ్గురు న్యాయమూర్తులకు 'Y' కేటగిరీ భద్రత కల్పించాలని మేం నిర్ణయించాం. న్యాయమూర్తులను చంపేస్తేమంటూ వచ్చిన బెదిరింపు ఫిర్యాదులపై వెంటనే దర్యాప్తు చేయాలని డీజీ, ఐజీలకు సూచించాను.                                                   "

-బసవరాజ్ బొమ్మై, కర్ణాటక సీఎం

అరెస్ట్

జడ్డీలను బెదిరించిన కేసులో ఇద్దరు వ్యక్తులను ఇప్పటికే పోలీసులు అరెస్ట్ చేశారు. వీరిద్దరిలో ఒకర్ని తిరునెల్‌వేలీ, మరొకర్ని తంజావురులో అరెస్ట్ చేసినట్లు పోలీసులు తెలిపారు. శనివారం రాత్రి వీరిని అదుపులోకి తీసుకున్నారు. వీరిద్దరూ తమిళనాడు తువీద్ జమాత్‌లో పనిచేస్తున్నట్లు తెలిసింది. ఈ కేసుకు సంబంధించి చాలామందిపై కేసులు నమోదు చేసినట్లు పోలీసులు తెలిపారు.

హిజాబ్ తీర్పు

కొన్ని నెలలకు ముందు కర్ణాటకలో మొదలైన హిజాబ్​ వివాదంపై ఆ రాష్ట్ర హైకోర్టు ఇటీవల సంచలన తీర్పు వెలువరించింది. విద్యాసంస్థల్లో హిజాబ్ వస్త్రధారణపై రాష్ట్ర ప్రభుత్వం విధించిన నిషేధాన్ని కోర్టు సమర్థించింది. హిజాబ్​ ధరించడంపై నిషేధాన్ని సవాల్​ చేస్తూ దాఖలైన అన్ని పిటిషన్లను కొట్టివేసింది.

" ఇస్లాం మతవిశ్వాసాల ప్రకారం ముస్లిం మహిళలు హిజాబ్​ ధరించడం తప్పనిసరి కాదని మేం విశ్వసిస్తున్నాం. దీనినే పరిగణనలోకి తీసుకుంటున్నాం. విద్యాసంస్థల్లో యూనిఫాం ధరించాలని చెప్పడం ప్రాథమిక హక్కులకు భంగం కలిగించడం కాదు. అది సహేతుకమైన పరిమితి.యూనిఫాం ధరించడంపై జీవో జారీ చేసే అధికారం ప్రభుత్వానికి ఉంది. పాఠశాల యూనిఫాం ధరించడం అనేది విద్యాసంస్థల ప్రొటోకాల్. దీన్ని విద్యార్థులంతా తప్పనిసరిగా పాటించాలి                                              "

-కర్ణాటక హైకోర్టు

 

ఇలా మొదలైంది

 

కర్ణాటకలోని విద్యాసంస్థల్లో ముస్లిం బాలికలు హిజాబ్స్‌ ధరించి తరగతి గదులకు హాజరవడం తీవ్ర అభ్యంతరాలు వ్యక్తమయ్యాయి. హిందూ సంఘాలు దీనిని ఖండించాయి. ఇది మొదలైన కొద్ది రోజులకే ఉడుపి, చిక్‌మంగళూరులో వాతావరణం ఆందోళనగా మారింది. హిజాబ్స్‌ ధరించిన బాలికలను స్కూళ్లకు అనుమతించకపోవడంతో ప్రతిగా అది ధరించడం తమ హక్కు అంటూ నిరసన వ్యక్తం చేశారు విద్యార్థులు.

మరోవైపు హిజాబ్‌కు వ్యతిరేకంగా కాషాయపు కండువాలు ధరించిన విద్యార్థులు ర్యాలీలు నిర్వహించారు. ఉడుపి కుండాపూర్‌లో కొందరు బాలబాలికలు కాషాయపు కండువాలు ధరించి 'జై శ్రీరామ్‌' నినాదాలతో ర్యాలీలు చేశారు. దీంతో ఈ వివాదం దేశవ్యాప్త చర్చకు తెరలేపింది.