Steve Smith Records: 96 ఏళ్ల రికార్డు బద్దలుకొట్టిన స్టీవ్ స్మిత్.. సచిన్ ను కూడా వెనక్కి నెట్టిన ఆసీస్ బ్యాటర్

Steve smith Test Centuries | సిడ్నీ టెస్టులో స్టీవ్ స్మిత్ శతకం సాధించాడు. అతడి కెరీర్ లో ఇది 37వ టెస్ట్ సెంచరీ కాగా, 96 ఏళ్ల యాషెస్ రికార్డును బద్దలు కొట్టాడు. జాక్ హాబ్స్, సచిన్ ను అధిగమించాడు

ఆస్ట్రేలియా బ్యాటర్ స్టీవ్ స్మిత్

Source : PTI

Ashes Test Series: సిడ్నీ క్రికెట్ గ్రౌండ్‌లో జరుగుతున్న 5వ, చివరి యాషెస్ టెస్టులో ఆస్ట్రేలియా స్టార్ బ్యాటర్ స్టీవ్ స్మిత్ అరుదైన ఘనత సాధించాడు. ఇది క్రికెట్ చరిత్రలో అతని పేరును మరింత ఉన్నత స్థానంలో నిలిపింది. ఇంగ్లాండ్‌తో టెస్టులో మూడవ రోజున స్మిత్ తన 37వ టెస్ట్ సెంచరీని సాధించాడు. దాంతో పాటు, స్మిత్ యాషెస్ చరిత్రలో 96 ఏళ్ల నాటి రికార్డును బద్దలు కొట్టాడు. 

యాషెస్‌లో రెండవ అత్యంత విజయవంతమైన బ్యాటర్

యాషెస్ సిరీస్‌లో స్టీవ్ స్మిత్ తన 13వ సెంచరీతో ఇంగ్లాండ్ దిగ్గజ బ్యాట్స్‌మెన్ జాక్ హాబ్స్‌ను అధిగమించాడు. హాబ్స్ యాషెస్‌ సిరీస్‌లలో 12 సెంచరీలు చేయగా, స్మిత్ ఇప్పుడు 13 సెంచరీలతో రెండవ స్థానంలోకి వచ్చాడు. ఈ జాబితాలో స్మిత్ కంటే ముందు ఆల్ టైమ్ గ్రేట్, సర్ డాన్ బ్రాడ్‌మాన్ మాత్రమే ఉన్నారు. బ్రాడ్‌మన్ యాషెస్‌లో రికార్డు స్థాయిలో 19 సెంచరీలు చేశాడు. అయితే 96 సంవత్సరాల తర్వాత ఒక బ్యాటర్ జాక్ హాబ్స్‌ను అధిగమించడం విశేషం.

వందేళ్లకు పైగా చరిత్ర ఉన్న సిరీస్ లో ఎంతో మంది స్టార్ బ్యాటర్లు ఆడినా ఈ ఫీట్ చేరుకోలేకపోయారు. కానీ యాషెస్ అనగానే స్టీవ్ స్మిత్ పునకం వచ్చినట్లు చెలరేగుతాడు అని చెప్పడానికి తాజా సెంచరీనే నిదర్శనం. దాంతో దాదాపు 100 ఏళ్ల రికార్డును బద్ధలుకొట్టి తాను రెండో సక్సెస్‌ఫుల్ బ్యాటర్‌గా నిలిచాడు. యాషెస్ సిరీస్ లో అత్యధిక పరుగుల రికార్డు బ్రాడ్‌మన్ పేరిటే ఉంది. 5028 పరుగులతో టాప్‌లో ఉన్నారు. రెండో స్థానంలో ఉన్న స్టీవ్ స్మిత్ 3,682 రన్స్ చేయగా, ఇంగ్లాండ్ బ్యాటర్ జాక్ హాబ్స్ 3,636 పరుగులతో మూడో స్థానంలో నిలిచారు. ఇదే సిరీస్ లో జాక్ హాబ్స్‌ను అధిగమించి యాషెస్ సిరీస్ చరిత్రలో అత్యధిక పరుగులు చేసిన రెండో బ్యాటర్‌గా స్టీవ్ స్మిత్ నిలిచాడు. 

యాషెస్ చరిత్రలో అత్యధిక పరుగులు

డాన్ బ్రాడ్‌మాన్ - 5,028 పరుగులు

స్టీవ్ స్మిత్ - 3,682 పరుగులు

జాక్ హాబ్స్ - 3,636 పరుగులు

సచిన్ టెండూల్కర్‌ను వెనక్కి నెట్టిన స్మిత్

ఈ సెంచరీతో, స్మిత్ భారత క్రికెట్ దేవుడిగా పిలుచుకునే సచిన్ టెండూల్కర్‌ను కూడా ఒక విషయంలో వెనక్కి నెట్టాడు. స్మిత్ కేవలం 219 ఇన్నింగ్స్‌లలో 37 టెస్ట్ సెంచరీలు చేశాడు. అయితే సచిన్ టెండూల్కర్ ఈ మైలురాయిని 220 ఇన్నింగ్స్‌లలో సాధించాడు. ఈ జాబితాలో అత్యంత వేగంగా 37 సెంచరీలు చేసిన రికార్డు మాత్రం రికీ పాంటింగ్ పేరిట ఉంది. పాంటింగ్ 212 ఇన్నింగ్స్‌లలో ఈ ఘనత సాధించాడు.

కెప్టెన్‌గా కూడా అద్భుతం

పాట్ కమిన్స్ లేని సమయంలో తాత్కాలిక కెప్టెన్‌గా బాధ్యతలు స్వీకరించిన స్టీవ్ స్మిత్, కెప్టెన్‌గా తన 18వ టెస్ట్ సెంచరీని సాధించాడు. టెస్ట్ క్రికెట్‌లో కెప్టెన్‌గా అతని కంటే ఎక్కువ సెంచరీలు కేవలం గ్రేమ్ స్మిత్, విరాట్ కోహ్లీ, రికీ పాంటింగ్ మాత్రమే చేశారు. ప్రత్యేకత ఏమిటంటే, కెప్టెన్‌గా స్మిత్ సగటు 68 కంటే ఎక్కువ. ఈ ఫార్మాట్‌లో అత్యంత విజయవంతమైన కెప్టెన్‌లలో ఒకరిగా స్మిత్ నిలిచాడు. స్టీవ్ స్మిత్ ఈ శతక ఇన్నింగ్స్ యాషెస్ చరిత్రలో అత్యంత గుర్తుండిపోయే ఇన్నింగ్స్‌లలో ఒకటిగా నిలిచిపోతుంది. 

మరిన్ని చదవండి

భారత్, బంగ్లాదేశ్ జట్ల మధ్య 5 పెద్ద వివాదాలు.. ఓసారి ఏకంగా కొట్టుకునే వరకు వెళ్లిన ఆటగాళ్లు

టీ20 వరల్డ్ కప్ కోసం బంగ్లాదేశ్ జట్టు ప్రకటన.. కెప్టెన్‌గా హిందువుకు ఛాన్స్