Forbes Most Powerful Women: అత్యంత శక్తిమంతమైన మహిళల జాబితాలో 'భారతీయం'.. నిర్మలా, కమలా హారిస్‌కు చోటు

ప్రపంచంలోనే అత్యంత శక్తిమంతమైన మహిళల జాబితాలో కేంద్ర ఆర్థిక మంత్రి నిర్మలా సీతారామన్ 37వ స్థానంలో నిలిచారు.

అత్యంత శక్తిమంతమైన మహిళల జాబితాలో 'భారతీయం'.. నిర్మలా, కమలా హారిస్‌కు చోటు

ప్రపంచంలో అత్యంత శక్తిమంతమైన మహిళల జాబితాలో కేంద్ర ఆర్థిక మంత్రి నిర్మలా సీతారామన్ మరోసారి చోటుదక్కించుకున్నారు. ఫోర్బ్స్ ఈ జాబితాను విడుదల చేసింది. వరుసగా మూడో ఏడాది కూడా నిర్మలా ఈ జాబితాలో చోటు దక్కించుకున్నారు.

ఈ ఏడాది నిర్మలా సీతారామన్ 37వ ర్యాంకు దక్కించుకున్నారు. 2020లో ఆమె 41వ స్థానంలో, 2019లో 34వ స్థానంలో నిలిచారు. ప్రస్తుతం కేంద్ర ఆర్థిక శాఖ మంత్రిగా నిర్మలా సీతారామన్ ఉన్నారు. అమెరికా ఆర్థక మంత్రి జానెట్ యెల్లెన్ కంటే నిర్మలా రెండు స్థానాలు ముందున్నారు. జానెట్ యెల్లెన్ 39వ ర్యాంకు సాధించారు.

భారతీయులు..

నిర్మలా సీతారామన్‌తో పాటు మరికొంత మంది భారత మహిళలు ఈ జాబితాలో ఉన్నారు.

1. హెచ్‌సీఎల్ కార్పొరేషన్ సీఈఓ- రోషిణి నాడార్ మల్‌హోత్రా- 52వ ర్యాంకు
2. బైకాన్ ఎక్స్‌గ్యూటివ్ ఛైర్‌పర్సన్- కిరణ్ మజుందర్ షా - 72వ ర్యాంకు
3. నాయకా వ్యవస్థాపకురాలు - ఫల్గుణి నాయర్ - 88వ ర్యాంకు 

ఫల్గుణి నాయర్ ఇటీవలే భారతదేశ ఏడవ మహిళా బిలియనీర్‌గా నిలిచారు. స్టాక్ మార్కెట్‌లో తన కంపెనీ అరంగేట్రం తర్వాత అత్యంత సంపన్నమైన బిలియనీర్‌గా మారారు.

టాప్- 5 వీరే..

1. మెకెంజీ స్కాట్- అమెరికా నవలా రచయిత, ఫిలాంత్రపిస్ట్- మొదటి ర్యాంకు
2. కమలా హారిస్- అమెరికా ఉపాధ్యక్షురాలు - 2వ ర్యాంకు
3. క్రిస్టిన్ లగార్డ్- యూరోపియన్ సెంట్రల్ బ్యాంకు హెడ్- 3వ ర్యాంకు
4. మేరీ బర్రా- జనరల్ మోటార్స్ సీఈఓ- 4వ ర్యాంకు
5. మెలిందా ఫ్రెంచ్ గేట్స్- ఫిలాంత్రపిస్ట్, బిజినెస్ ఉమెన్  - 5వ ర్యాంకు

విడాకుల తర్వాత..

అత్యంత శక్తిమంతమైన మహిళల జాబితాలో అగ్రస్థానంలో నిలిచిన మెకెంజీ స్కాట్.. అమెజాన్ సీఈఓ జెఫ్ బెజోస్ మాజీ భార్య. ఆమె నవలా రచయితగా, ఫిలాంత్రపిస్ట్‌గా పేరొందారు. 2019 మధ్యలో ఆమెకు, జెఫ్ బెజోస్‌కు విడాకులయ్యాయి. అమెజాన్‌లో 25 శాతం వాటాను భరణంగా ఆమెకు రాసిచ్చారు బెజోస్. అయితే తన సంపదలో సగానికి పైగా దాతృత్వంగా ప్రకటించారు.

ఈ జాబితాలో ఐదో స్థానంలో ఉన్న మెలిందా ఫ్రెంచ్ గేట్స్.. మైక్రోసాఫ్ట్ వ్యవస్థాపకుడు బిల్‌గేట్స్ మాజీ భార్య. బిల్ అండ్ మిలిందా గేట్స్ ఫౌండేషన్‌కు ఆమె సహ వ్యవస్థాపకులుగా ఉన్నారు. విడాకుల తర్వత 2021 మే లో ఆమెకు 2.4 బిలియన్ డాలర్ల విలువైన వాటాను బిల్‌గేట్ రాసిచ్చారు. దీంతో ఆమె బిలియనీర్‌గా మారారు.

వీరు కూడా..

• బంగ్లాదేశ్ ప్రధాని షేక్ హసీనా వాజేద్‌.. ఈ జాబితాలో తొలిసారి స్థానం దక్కించుకున్నారు. 43వ ర్యాంకు దక్కించుకున్నారు.
• క్వీన్ ఎలిజబెత్ 70వ ర్యాంకులో ఉన్నారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి