Assam Mizoram Border Dispute: అసోం సీఎం, పోలీసు అధికారులపై కేసు నమోదు

మిజోరం పౌరులు వద్ద ఆయుధాలు ఉన్నాయని, కనుక పక్క రాష్ట్రానికి ప్రజలు ప్రయాణాలు పెట్టుకోవద్దని అసోం ముఖ్యమంత్రి హిమంత బిశ్వ శర్మ ప్రజలకు సూచించారు. మిజోరం సీఎంపైనా పలు విమర్శలు చేశారు.

అసోం- మిజోరం సరిహద్దు వివాదం

అసోం ముఖ్యమంత్రి హిమంత బిశ్వ శర్మ సహా నలుగురు సీనియర్ పోలీసులు, మరో ఇద్దరు అధికారులపై మిజోరం పోలీసులు క్రిమినల్ కేసులు నమోదు చేశారు. ఇటీవల సరిహద్దులో జరిగిన హింసాత్మక ఘటనలకు బాధ్యులను చేస్తూ ఈ కేసులు పెట్టినట్లు మిజోరం పోలీసులు తెలిపారు.

అసోం సీఎం, అధికారులపై హత్యాయత్నం సహా వివిధ సెక్షన్ల కింద కేసులు నమోదు చేశాం. ఇటీవల మిజోరం, అసోం పోలీసుల మధ్య జరిగిన కాల్పుల ఘటనపై వైరెంగ్ తే పోలీస్ స్టేషన్ లో ఎఫ్ఐఆర్ నమోదు చేశాం. 

                               మిజోరం ఐజీ

వీరిపై కేసులు..

అసోం ఐజీ అనురాగ్ అగర్వాల్, కాచర్ డీఐజీ దేవోజ్యోతి ముఖర్జీ, కాచర్ ఎస్పీ చంద్రకాంత్ సహా దోలై పోలీస్ స్టేషన్ లో ఇద్దరిపై కేసులు నమోదు చేశారు. వీరితో పాటు కాచర్ డిప్యూటీ కమిషనర్ కీర్తి జల్లీ, కాచర్ డివిజనల్ ఫారెస్ట్ ఆఫీసర్ సన్నీదేవోపైనా కేసులు నమోదు చేసినట్లు పోలీసులు తెలిపారు.

వీరితో పాటు 200 మంది గుర్తుతెలియని అసోం పోలీసులపై కేసులు పెట్టారు. అయితే నలుగురు పోలీసు అధికారులు, ఇద్దరు పాలనా అధికారులను ప్రశ్నించేందుకు సమన్లు జారీ చేశారు. 

మిజోరం పోలీసుల వద్ద ఆయుధాలు: అసోం సీఎం

అంతర్రాష్ట్ర సరిహద్దు వివాదంపై అసోం ముఖ్యమంత్రి హిమంత.. మిజోరం ప్రజలపై పలు విమర్శలు చేశారు. మిజోరం పౌరుల వద్ద ఆయుధాలు ఉన్నాయని.. కనుక పక్క రాష్ట్రానికి వెళ్లొదని అసోం ప్రజలకు హిమంత సూచించారు.

" ప్రయాణాలపై ఎలాంటి ఆంక్షలు లేవు. కానీ మిజోరం ప్రజల చేతిలో ఆయుధాలు ఉన్నాయి కనుక ప్రజలు ఆ రాష్ట్రానికి ప్రయాణాలు పెట్టుకోవద్దని సూచిస్తున్నాం. మిజోరం ప్రభుత్వం.. ఆయుధాలను సీజ్ చేసేవరకు ఈ సూచనను పాటించడం మంచిది.      "

-                హిమంత బిశ్వ శర్మ, మిజోరం సీఎం

" మిజోరం ప్రభుత్వం, హోంమంత్రితో మా ముఖ్యమంత్రి హిమంత శర్మ మాట్లాడుతున్నారు. అయితే ఇది చాలా దురదృష్టం. ఈ సరిహద్దు వివాదాన్ని పరిష్కరించేందుకు కేంద్ర ముందుకు రావాలి. అసోం రాష్ట్రానికి ఉన్న సరిహద్దు పాతది కాకపోవచ్చు కానీ రాజ్యాంగబద్ధమైనది. ఈ విషయంపై సుప్రీం కోర్టును ఆశ్రయిస్తున్నాం.         "

-      రాజ్ నీత్ కుమార్ దాస్, అసోం మంత్రి