Smart Hotel Booking Tips : స్మార్ట్ హోటల్ బుకింగ్ చిట్కాలు.. క్రిస్మస్, న్యూ ఇయర్ సీజన్లో డబ్బు ఆదా చేసుకోండిలా
Travel Hacks : క్రిస్మస్, న్యూ ఇయర్ ట్రిప్ ప్లాన్ చేస్తున్నారా? అయితే తక్కువ ధరలో హోటల్స్ బుక్ చేసుకోవడంతో పాటు పండుగ ఆఫర్లు పొందడం ఎలాగో చూసేద్దాం.
Christmas & New Year Travel Tips : క్రిస్మస్, నూతన సంవత్సరం సమయంలో చాలామంది ట్రిప్స్కి వెళ్తూ ఉంటారు. ఫ్రెండ్స్, ఫ్యామిలీతో కాస్త సమయం తీసుకుని టూర్కి వెళ్లేందుకు ఇష్టపడతారు. అందుకే ఇది అత్యంత రద్దీగా ఉండే ఫెస్టివ్ సీజన్గా చెప్తారు. ఈ సమయంలో హోటల్స్, స్టేయింగ్ కాస్ట్ చాలా ఎక్కువగా ఉంటుంది. డిమాండ్ గణనీయంగా ఉండడంతో రూమ్ రెంట్స్ బడ్జెట్ను మించిపోతాయి.
సరైన ప్రణాళిక లేకుండా హోటల్ బుకింగ్లు చేస్తే.. ప్రయాణం ప్రారంభం కాకముందే జర్నీ ఖర్చులు పెరిగిపోతాయి. కానీ సరైన వ్యూహం, కొంచెం తెలివైన ప్రణాళికతో, పీక్ సీజన్లో కూడా అందుబాటులో తక్కువ ధరలకు సౌకర్యవంతమైన వసతిని కనుక్కోవచ్చు. మరి మీ ప్రయాణ బడ్జెట్ను అదుపులో ఉంచడంలో సహాయపడే కొన్ని సింపుల్ చిట్కాలు ఏంటో ఇప్పుడు చూసేద్దాం.
మెరుగైన డీల్స్ కావాలంటే..
క్రిస్మస్, నూతన సంవత్సరం వంటి పీక్ పీరియడ్స్లో హోటల్ గదులు త్వరగా బుక్ అయిపోతాయి. ప్రయాణ తేదీలు దగ్గర పడుతున్న కొద్దీ.. ధరలు గణనీయంగా పెరిగే అవకాశం ఉంది. కాబట్టి మీ జర్నీ డేట్ ఫిక్స్ అయితే ముందుగానే హోటల్ రిజర్వేషన్లు చేసుకోండి. ఆలస్యం చేయవద్దు. ముందుగానే బుక్ చేసుకోవడం వల్ల తక్కువ ధరకు లభించడమే కాకుండా.. లొకేషన్, గది నాణ్యత పరంగా మంచి ఎంపికలు అందుబాటులో ఉంటాయి. అనేక హోటళ్లు, బుకింగ్ ప్లాట్ఫారమ్లు ఎర్లీ-బర్డ్ ఆఫర్లను అందిస్తాయి. దీని ద్వారా 20-40 శాతం వరకు ఆదా చేసుకోవచ్చు. చివరి నిమిషం వరకు వేచి ఉండటం అధిక ఖర్చులకు దారితీస్తుంది.
ఆన్లైన్ ఆఫర్లు, డిస్కౌంట్లు
ట్రావెల్ వెబ్సైట్లు, యాప్లు పండుగ సీజన్లో అనేక ఆఫర్లను అందిస్తాయి. హోటల్ బుక్ చేసేటప్పుడు కేవలం ఒక ప్లాట్ఫారమ్కు పరిమితం కాకండి. వివిధ యాప్లలో ధరలను పోల్చండి. ఎందుకంటే ఒకే హోటల్ వేర్వేరు ధరలకు జాబితా చేసే అవకాశం ఉంది. బ్యాంక్ ఆఫర్లు, క్రెడిట్ కార్డ్ డిస్కౌంట్లు, UPI క్యాష్బ్యాక్లు, కూపన్ కోడ్లు ఖర్చులను మరింత తగ్గించగలవు. చెల్లింపు చేసే ముందు ఎప్పుడూ ఆఫర్ల విభాగాన్ని చెక్ చేసుకోవాలి. దీనివల్ల మీరు గణనీయమైన మొత్తాన్ని ఆదా చేసుకోవచ్చు.
నేరుగా బుక్ చేసుకోవడం వల్ల కలిగే ప్రయోజనాలు
చాలా మంది ప్రయాణికులు హోటల్ బుకింగ్ల కోసం యాప్లపై మాత్రమే ఆధారపడతారు. కానీ నేరుగా రిజర్వేషన్లు చేసుకుంటే కొన్నిసార్లు మరింత లాభదాయకంగా ఉంటుంది. మీరు ఒక హోటల్ను షార్ట్లిస్ట్ చేసిన తర్వాత.. దాని అధికారిక వెబ్సైట్ను చెక్ చేయండి. లేదా నేరుగా ఆ ప్రాపర్టీని సంప్రదించండి. హోటళ్లు తరచుగా నేరుగా బుకింగ్లపై మెరుగైన ధరలను అందిస్తాయి. అలాగే ఉచిత అల్పాహారం, లేట్ చెకౌట్ లేదా రూమ్ అప్గ్రేడ్లు వంటి అదనపు ప్రయోజనాలను కూడా అందిస్తాయి. హోటళ్లు థర్డ్-పార్టీ కమీషన్లపై ఆదా చేస్తాయి కాబట్టి.. వారు ఆ ప్రయోజనాన్ని అతిథులకు ఇస్తారు. కాబట్టి అడగడానికి వెనుకాడకండి. కొన్నిసార్లు సంప్రదింపులు మీ ప్రయోజనానికి పని చేయవచ్చు.
టాప్ హెడ్ లైన్స్
ట్రెండింగ్ వార్తలు
