Joint Pain During Monsoon : వర్షాకాలంలో కీళ్ల నొప్పులు ఎందుకు ఎక్కువ అవుతాయి? కారణాలు, తీసుకోవాల్సిన జాగ్రత్తలు ఇవే

Monsoon and Joint Health : వర్షాకాలంలో కీళ్ల నొప్పులు పెరగడం చాలా మందిలో సాధారణంగా కనిపించే సమస్య. దీనికి కారణాలు ఏంటి? ఎలాంటి జాగ్రత్తలు తీసుకుంటే మంచిదో, నిపుణుల సూచనలు ఏంటో చూసేద్దాం.

వానాకాలంలో మోకాళ్ల నొప్పులు ఎక్కువ కావడానికి కారణం ఇదే

Source : Gemini AI

Show Quick Read

Key points generated by AI, verified by newsroom

• వర్షాకాలంలో చాలామందికి కీళ్ల నొప్పులు, నడుం నొప్పులు అధికమవుతాయి.
• వాతావరణ పీడనం తగ్గడం, తేమ కీళ్ల నొప్పులను అధికం చేస్తాయి.
• వ్యాయామం, ఆరోగ్యకరమైన బరువు, వెచ్చదనం, ఆహారం నొప్పిని తగ్గిస్తాయి.
• తీవ్రమైన, నిరంతర కీళ్ల నొప్పి ఉంటే వైద్యుడిని సంప్రదించాలి.

Arthritis and Joint Pain in Monsoon : వర్షాకాలం రాగానే చాలామందికి కీళ్ల నొప్పులు, నడుం నొప్పి, కాళ్ల నొప్పులు ఎక్కువైనట్లు అనిపిస్తుంది. ముఖ్యంగా ఆర్థరైటిస్, పాత గాయాలు, కీళ్ల సమస్యలు ఉన్నవారు ఈ కాలంలో ఎక్కువ అసౌకర్యాన్ని ఎదుర్కొంటుంటారు. వర్షం నేరుగా కీళ్లను దెబ్బతీయకపోయినా, వాతావరణంలో వచ్చే మార్పులు కీళ్ల ఆరోగ్యంపై ప్రభావం చూపుతాయని వైద్య నిపుణులు చెబుతున్నారు.
వర్షాకాలంలో కీళ్ల నొప్పులు ఎందుకు పెరుగుతాయి?

వర్షాలు పడే ముందు, వర్షాకాలంలో వాతావరణ పీడనం (Atmospheric Pressure) తగ్గుతుంది. దీనివల్ల కీళ్ల చుట్టూ ఉన్న కణజాలాలు స్వల్పంగా ఉబ్బే అవకాశం ఉంటుందని యశోద హాస్పిటల్స్​లో సీనియర్ కన్సల్టెంట్ రొబోటిక్ జాయింట్ రిప్లేస్మెంట్, ట్రోమా అండ్ ఆర్థ్రోస్కోపిక్ సర్జన్​గా చేస్తోన్న డాక్టర్ అభిషేక్ బెర్లీ తెలిపారు. దీని ఫలితంగా కీళ్లపై ఒత్తిడి పెరిగి నొప్పి, బిగుతు ఎక్కువగా అనిపించవచ్చన్నారు. అలాగే వాతావరణంలో తేమ (Humidity) పెరగడం, ఉష్ణోగ్రతలు తగ్గడం వల్ల కండరాలు బిగుసుకుపోయి కీళ్ల కదలికలు తగ్గుతాయని.. దీంతో నొప్పి మరింత తీవ్రంగా అనిపించవచ్చని తెలిపారు.

సాధారణంగా కనిపించే లక్షణాలు

వర్షాకాలంలో కీళ్ల సమస్యలు ఉన్నవారిలో ఈ లక్షణాలు ఎక్కువగా కనిపించవచ్చని డాక్టర్ అభిషేక్ తెలిపారు. కీళ్లలో బిగుతుగా అనిపించడం, వాపు రావడం, నొప్పి పెరగడం, నడవడంలో లేదా కదలడంలో ఇబ్బంది, మెట్లు ఎక్కడం, దిగడంలో ఇబ్బందులు, మోకాళ్లు, తుంటి భాగం, నడుం, చేతి కీళ్లలో అసౌకర్యంగా ఉంటాయి. ముఖ్యంగా ఆస్టియోఆర్థరైటిస్, రుమటాయిడ్ ఆర్థరైటిస్ లేదా పాత ఫ్రాక్చర్లు ఉన్నవారిలో ఈ మార్పులు ఎక్కువగా ఉంటాయి. 

కీళ్ల నొప్పులను తగ్గించుకోవడానికి ఏం చేయాలి?

వానాకాలంలో వచ్చే కీళ్ల నొప్పులను దూరం చేయడానికి కొన్ని టిప్స్ ఫాలో అవ్వాలని డాక్టర్ అభిషేక్ తెలిపారు. కీళ్ల ఆరోగ్యం కోసం క్రమం తప్పకుండా వ్యాయామం చేయాలని తెలిపారు. నడక, యోగా, స్ట్రెచింగ్ వంటి తేలికపాటి వ్యాయామాలు కీళ్ల కదలికలను మెరుగుపరుస్తాయి. కండరాలను బలంగా ఉంచుతాయి. అలాగే చాలా సేపు కూర్చోవడం వల్ల కీళ్ల బిగుతు పెరుగుతుంది. కాబట్టి మధ్య మధ్యలో లేచి కొద్దిసేపు నడవడం మంచిదని సూచిస్తున్నారు. 

అధిక బరువు మోకాళ్లు, తుంటి వంటి బరువు కీళ్లపై అదనపు ఒత్తిడిని పెంచుతుంది. అందుకే ఆరోగ్యకరమైన బరువును నిర్వహించడం ముఖ్యమని చెప్తున్నారు. చల్లటి వాతావరణంలో కండరాలు బిగుసుకుపోయే అవకాశం ఉంటుంది. కాబట్టి వెచ్చని దుస్తులు ధరించడం, అవసరమైతే గోరువెచ్చని నీటితో స్నానం చేయడం ఉపయోగకరంగా ఉంటుంది. 

ఫుడ్ జాగ్రత్తలు

వర్షాకాలంలో దాహం తక్కువగా అనిపించినా శరీరానికి అవసరమైన నీటిని తీసుకోవాలి. సరైన హైడ్రేషన్ కీళ్ల ఆరోగ్యానికి కూడా మేలు చేస్తుంది. పండ్లు, కూరగాయలు, నట్స్, ఒమేగా-3 ఫ్యాటీ యాసిడ్లు అధికంగా ఉండే ఆహారాలు కీళ్ల ఆరోగ్యానికి మేలు చేస్తాయి. ఇవి శరీరంలో వాపును తగ్గించడంలో సహాయపడవచ్చు.

ఎప్పుడు వైద్యుడిని సంప్రదించాలంటే..

కీళ్ల నొప్పి నిరంతరం వస్తున్నా, వాపు, ఎర్రబారడం, నడవలేకపోవడం లేదా రోజువారీ పనులు చేయడంలో ఇబ్బంది ఉంటే తప్పకుండా వైద్యుడిని సంప్రదించాలి. ఎందుకంటే ఇవి అంతర్గత కీళ్ల సమస్యలకు సంకేతాలు కావచ్చు. ఈ లక్షణాలు గుర్తిస్తే వెంటనే వైద్య సహాయం తీసుకోవాలని వైద్యులు సూచిస్తున్నారు. 

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

మరిన్ని చదవండి

మహిళల్లో ఐరన్, B12 లోపానికి ప్రధాన కారణాలు.. లక్షణాలు, నివారణ మార్గాలు ఇవే

కీళ్ల నొప్పులను దూరం చేసే సింపుల్ యోగాసనాలు ఇవే.. రోజూ చేస్తే మంచి ఉపశమనం!