Kidney Problems : కిడ్నీ ఫెయిల్యూర్కు ముందే కనిపించే లక్షణాలు ఇవే.. ఈ వార్నింగ్ సిగ్నల్స్ లైట్ తీసుకోకండి
Early Symptoms of Kidney Problems : కిడ్నీ వ్యాధులు సైలెంట్గా అభివృద్ధి చెందుతాయి. అందుకే అలసట, మూత్రంలో మార్పులు, వాపులు, బీపీ సమస్యలు వంటి లక్షణాలను విస్మరించకూడదని నిపుణులు చెప్తున్నారు.
- కిడ్నీ వ్యాధులు ఆలస్యంగా బయటపడతాయి, ముందస్తు సంకేతాలు ముఖ్యం.
- అలసట, మూత్ర మార్పులు, వాపులు, దురద ప్రధాన లక్షణాలు.
- మధుమేహం, బీపీ ఉన్నవారు రెగ్యులర్ కిడ్నీ పరీక్షలు చేయించుకోవాలి.
- ముందుగా గుర్తిస్తే చికిత్స ద్వారా డయాలసిస్ అవసరం తగ్గుతుంది.
Signs of Kidney Disease : కిడ్నీ వ్యాధుల విషయంలో పెద్ద సమస్య ఏంటంటే.. ప్రారంభ దశలో చాలామందికి ఎలాంటి లక్షణాలు కనిపించవు. చాలా సందర్భాల్లో వ్యాధి తీవ్ర స్థాయికి చేరుకున్న తర్వాతే సమస్య బయటపడుతుంది. అప్పటికే కిడ్నీల పనితీరు గణనీయంగా దెబ్బతిని ఉండే అవకాశం ఉంటుంది. అందుకే కిడ్నీలు సరిగా పనిచేయడం లేదని సూచించే ముందస్తు హెచ్చరికలను గుర్తించడం చాలా ముఖ్యం అని వైద్యులు చెబుతున్నారు.
హైదరాబాద్లోని యశోద హాస్పిటల్లో సీనియర్ కన్సల్టెంట్ నెఫ్రాలజిస్ట్, ట్రాన్సప్లెంట్ ఫిజీషియన్ డాక్టర్ దిలీప్ M. బాబు పలు సూచనలు చేశారు. కిడ్నీల పనితీరు తగ్గినప్పుడు శరీరం ఇచ్చే లక్షణాలను విస్మరించవద్దని అంటున్నారు. అలాంటి సంకేతాలు గురించి పలు సూచనలు చేశారు.
నిరంతరం అలసట..
కిడ్నీల పనితీరు తగ్గినప్పుడు శరీరంలో వ్యర్థ పదార్థాలు పేరుకుపోవడం ప్రారంభమవుతుంది. అలాగే ఎర్ర రక్తకణాల ఉత్పత్తికి అవసరమైన ఎరిథ్రోపోయెటిన్ అనే హార్మోన్ ఉత్పత్తి కూడా తగ్గవచ్చు. దీనివల్ల రక్తహీనత (అనీమియా) వచ్చే ప్రమాదం ఉంటుందని డాక్టర్ దిలీప్ తెలిపారు. ఫలితంగా బలహీనత, అలసట, ఏ పనిపైనా దృష్టి పెట్టలేకపోవడం వంటి సమస్యలు కనిపించవచ్చు.
మూత్రంలో మార్పులు
మూత్ర విసర్జనలో వచ్చే మార్పులను ఎప్పుడూ నిర్లక్ష్యం చేయకూడదు. రాత్రిపూట తరచుగా మూత్రానికి వెళ్లాల్సి రావడం, మూత్రంలో నురుగు కనిపించడం, రక్తం పడటం లేదా సాధారణం కంటే మూత్ర పరిమాణం గణనీయంగా తగ్గిపోవడం కిడ్నీ సమస్యలకు సంకేతాలు కావచ్చు. ముఖ్యంగా మూత్రంలో ప్రోటీన్ కనిపించడం కిడ్నీ దెబ్బతినడానికి తొలి సూచనల్లో ఒకటిగా పరిగణిస్తామని తెలిపారు.
కాళ్లు, ముఖంలో వాపు
కిడ్నీలు శరీరంలోని అదనపు ద్రవాలు, సోడియంను సరిగా బయటకు పంపలేకపోతే శరీరంలో నీరు నిల్వ అవుతుంది. దీనివల్ల కాళ్లు, చీలమండలు, చేతులు, ముఖం లేదా కళ్ల చుట్టూ వాపు కనిపించవచ్చు. ఈ లక్షణం కనిపిస్తే వెంటనే వైద్యులను సంప్రదించడం మంచిదని చెప్తున్నారు.
దురద, ఆకలి తగ్గిపోవడం
కిడ్నీల పనితీరు తగ్గినప్పుడు శరీరంలో టాక్సిన్లు పేరుకుపోతాయి. దీంతో దురద, పొడి చర్మం, వికారం, వాంతులు, ఆకలి తగ్గడం, నోటిలో లోహపు రుచి రావడం వంటి లక్షణాలు కనిపించవచ్చు. కొందరిలో ఎటువంటి కారణం లేకుండానే బరువు పెరగడం లేదా తగ్గడం కూడా జరగవచ్చు.
బీపీ అదుపులో లేకుంటే..
కిడ్నీ వ్యాధులు, అధిక రక్తపోటు ఒకదానికొకటి సంబంధం కలిగి ఉంటాయి. కిడ్నీ సమస్యల వల్ల బీపీ పెరగవచ్చు. అలాగే అధిక రక్తపోటు వల్ల కిడ్నీలు దెబ్బతినే ప్రమాదం ఉంటుంది. మందులు వాడుతున్నా బీపీ అదుపులోకి రాకపోతే కిడ్నీల ఆరోగ్యాన్ని కూడా టెస్ట్ చేయించుకోవాలని అంటున్నారు డాక్టర్ దిలీప్.
ఎవరికి ప్రమాదం ఎక్కువ?
మధుమేహం, హైబీపీ, ఊబకాయం, గుండె జబ్బులు ఉన్నవారు.. అలాగే కుటుంబంలో కిడ్నీ వ్యాధుల చరిత్ర ఉన్నవారు.. 50 ఏళ్లు దాటినవారిలో కిడ్నీ సమస్యల ప్రమాదం ఎక్కువగా ఉంటుంది. ఇలాంటి వారు క్రమం తప్పకుండా కిడ్నీ పరీక్షలు చేయించుకోవడం అవసరం.
ముందుగానే ఇలా గుర్తించండి..
కిడ్నీ వ్యాధులను ప్రారంభ దశలోనే గుర్తించడానికి కొన్ని సాధారణ పరీక్షలు ఉపయోగపడతాయి. రక్తపోటు పరీక్ష, మూత్ర పరీక్ష, సీరం క్రియాటినిన్ పరీక్ష, ఈజీఎఫ్ఆర్ (eGFR) పరీక్షల ద్వారా కిడ్నీల పనితీరును అంచనా వేయవచ్చు. కిడ్నీ వ్యాధిని ప్రారంభ దశలో గుర్తిస్తే చికిత్సను వెంటనే ప్రారంభించవచ్చు. దీంతో వ్యాధి వేగంగా ముదరకుండా అడ్డుకోవచ్చు. అలాగే కిడ్నీ ఫెయిల్యూర్, డయాలసిస్ లేదా కిడ్నీ మార్పిడి అవసరం వచ్చే ప్రమాదాన్ని కూడా గణనీయంగా తగ్గించవచ్చని సూచిస్తున్నారు.
మరిన్ని ఇంట్రెస్టింగ్ హెల్త్ ఆర్టికల్స్, ఇంటి చిట్కాల కోసం దీనిని క్లిక్ చేయండి.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
