Kidney Disease Deaths : 2040 నాటికి కిడ్నీ వ్యాధులే మరణాలకు 5వ ప్రధాన కారణమా? లాన్సెట్ అధ్యయనంలో షాకింగ్ విషయాలు

Chronic Kidney Disease : మూత్రపిండాల వ్యాధులు చాలా సైలెంట్​గా వ్యాపిస్తున్నాయని.. 2040 నాటికి మరణాల్లో టాప్ 5 ప్రధాన కారణాల్లో ఒకటిగా మారనుందని హెచ్చరిస్తున్నారు. ఎందుకంటే..

సైలెంట్గా పెరుగుతోన్న కిడ్నీ వ్యాధులు.. 2040 నాటికి..

Source : Envato

Show Quick Read

Key points generated by AI, verified by newsroom

• లక్షణాలను నిర్లక్ష్యం చేయవద్దు, కొత్త చికిత్సలు కిడ్నీ ఆరోగ్యాన్ని మెరుగుపరుస్తున్నాయి.

Rising Kidney Disease Worldwide : మన శరీరంలోని మూత్రపిండాలు పగలు, రాత్రి అవిశ్రాంతంగా పనిచేస్తాయి. ఇవి రక్తం నుంచి వ్యర్థ పదార్థాలను ఫిల్టర్ చేయడంలో, శరీరంలో ద్రవ సమతుల్యతను కాపాడటంలో, రక్తపోటును నియంత్రించడంలో, ఎముకలు, రక్తనాళాలను ఆరోగ్యంగా ఉంచడంలో కీలక పాత్ర పోషిస్తాయి. కాబట్టి పూర్తి ఆరోగ్యంలో కిడ్నీల పనితీరుకు చాలా ముఖ్యపాత్ర ఉంటుంది. 

అయితే వీటిని పనితీరు కాస్త డిస్టర్బ్ అయినా.. చాలా ఇబ్బందులకు గురి అవ్వాల్సి వస్తుంది. ఎందుకంటే మూత్రపిండాల పనితీరు క్షీణించడం ప్రారంభమైనప్పుడు.. ప్రారంభ దశలలో శరీరం తరచుగా ఎటువంటి స్పష్టమైన సంకేతాలను ఇవ్వదు. అందుకే దీర్ఘకాలిక మూత్రపిండ వ్యాధిని సైలెంట్​గా పరిగణిస్తారు. ఇప్పటికే ప్రపంచవ్యాప్తంగా మూత్రపిండాల వ్యాధులు పెరుగుతున్నాయని పలు అధ్యయనాలు చెప్తున్నాయి. 

షాకింగ్ విషయాలు

'ది లాన్సెట్' అనే వైద్య పత్రికలో ఇటీవలే దీని గురించిన మూడు పరిశోధనా అధ్యయనాలు ప్రచురించారు. వాటి ప్రకారం.. దీర్ఘకాలిక మూత్రపిండ వ్యాధి ప్రపంచంలో అత్యంత వేగంగా పెరుగుతున్న ఆరోగ్య సవాళ్లలో ఒకటిగా మారుతోంది. ప్రపంచవ్యాప్తంగా సుమారు 788 నుంచి 844 మిలియన్ల మంది ఈ వ్యాధితో బాధపడుతున్నారని షాకింగ్ విషయం తెలిపారు. అంతేకాకుండా 2040 నాటికి ఇది ప్రపంచవ్యాప్తంగా మరణానికి ఐదవ ప్రధాన కారణం కావచ్చని తెలిపారు.

కిడ్నీ వ్యాధులు పెరగడానికి కారణాలు..

మధుమేహం, అధిక రక్తపోటు, ఊబకాయం, గుండె జబ్బులు, వృద్ధాప్యం వంటి కారకాలు మూత్రపిండాల వ్యాధులు పెరగడానికి కారణమవుతున్నాయని నిపుణులు అంటున్నారు. అంతేకాకుండా నేటి జీవనశైలి, సరైన ఆహారం తీసుకోకపోవడం కూడా మూత్రపిండాలపై అదనపు భారాన్ని మోపుతున్నాయంటూ హెచ్చరించారు. పైగా కిడ్నీ వ్యాధులు తరచుగా ప్రారంభ దశలలో ఎటువంటి లక్షణాలు లేకుండానే ముదిరిపోతున్నాయని.. అందుకే సకాలంలో వ్యాధిని నిర్ధారించడం కీలకమని ప్రపంచ ఆరోగ్య సంస్థ సూచిస్తుంది.

ముందుగానే గుర్తించేందుకు..

మూత్రపిండాల వ్యాధిని నిర్ధారించడానికి ఇప్పుడు కొత్త సాంకేతికతలు ఉపయోగిస్తున్నారని లాన్సెట్ మొదటి అధ్యయనం నివేదించింది. గ్లోమెరలర్ ఫిల్ట్రేషన్ రేట్ టెస్ట్​లు, అల్బుమినూరియా టెస్ట్​లు, అధునాతన ఇమేజింగ్, ఏఐ, ఇతర ఆధునిక పద్ధతులు వ్యాధిని ప్రారంభ దశలోనే గుర్తించడంలో సహాయపడుతున్నాయని తెలిపింది. వ్యాధిని ఎంత త్వరగా గుర్తిస్తే.. మూత్రపిండాలను అంత మెరుగ్గా రక్షించవచ్చని పరిశోధకులు భావిస్తున్నారు.

పురుషులలో, స్త్రీలలో కిడ్నీల వ్యాధుల మధ్య తేడాలు ఇవే

మరో అధ్యయనం ఆసక్తికరమైన విషయాన్ని వెల్లడించింది. మూత్రపిండాల వ్యాధి స్త్రీ, పురుషులను ఒకే విధంగా ప్రభావితం చేయదని పరిశోధకులు కనుగొన్నారు. మూత్రపిండాల నిర్మాణం, వ్యాధి పురోగతి, చికిత్సకు ప్రతిస్పందన వేర్వేరుగా ఉండవచ్చని తెలిపారు. 

ఈ లక్షణాలు లైట్ తీసుకోకూడదు..

స్టెడ్‌ఫాస్ట్ న్యూట్రిషన్ వ్యవస్థాపకుడు అమన్ పూరి ప్రకారం.. చెడు ఆహారపు అలవాట్లు మూత్రపిండాలపై కూడా ప్రతికూల ప్రభావం చూపుతాయి. అధిక ప్రోటీన్ ఆహారం, అధిక ఉప్పు, స్వీట్స్, అనారోగ్యకరమైన కొవ్వుల తీసుకోవడం వల్ల మూత్రపిండాలపై అదనపు భారాన్ని మోపుతుందని అంటున్నారు. దీంతో చేతులు, పాదాలు లేదా కళ్ల చుట్టూ నిరంతర వాపు, మూత్రంలో మార్పులు, నురుగుతో కూడిన మూత్రం, నిరంతర అలసట, ఆకలి లేకపోవడం, నోటిలో లోహపు రుచి, రాత్రిపూట కండరాల నొప్పులు వంటి లక్షణాలను నిర్లక్ష్యం చేయకూడదని ఆయన హెచ్చరిస్తున్నారు.

కిడ్నీల ఆరోగ్యాన్ని మెరుగుపరిచే చికిత్సలు

మూడవ అధ్యయనం ఆశాజనకంగా ఉంది. SGLT2 ఇన్హిబిటర్లు, గ్లూకాగాన్-లైక్ పెప్టైడ్-1 రిసెప్టర్ అగోనిస్ట్‌లు, ఇతర అధునాతన చికిత్సల వంటి కొత్త మందులు, మూత్రపిండాల వ్యాధి పురోగతిని నెమ్మదింపజేయడంలో ఆశాజనకమైన ఫలితాలను చూపించాయని వెల్లడించింది. ఈ మందులు గుండె ఆరోగ్యాన్ని మెరుగుపరచడంలో కూడా సహాయపడవచ్చు. అయితే రోగులకు తరచుగా మధుమేహం, ఊబకాయం మరియు గుండె జబ్బులు వంటి ఇతర ఆరోగ్య సమస్యలు కూడా ఉంటాయని, వీటికి సమగ్ర చికిత్స అవసరమని నిపుణులు పేర్కొంటున్నారు.

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

 

మరిన్ని చదవండి

థైరాయిడ్ ఉన్నవాళ్లు బ్రెజిల్ నట్స్ ఎందుకు తినాలి? రోజుకి ఎంత తింటే మంచిది?

త్వరగా అలసిపోతున్నారా? స్టామినా పెంచే రోజువారీ అలవాట్లు ఇవే