Rotating House: గుండ్రంగా తిరిగే ఇల్లు.. భార్యకు ఓ భర్త అరుదైన కానుక

బోస్నియాకు చెందిన ఓ పెద్దాయన తన భార్య కోసం గుండ్రంగా తిరిగే ఇంటిని నిర్మించాడు. లేటు వయస్సులో అతడు చేసిన ప్రయత్నం చూసి భార్య తెగ మురిసిపోతోంది.

Image Credit: VOA News/YouTube

ఇంటికి వాస్తు చాలా ముఖ్యమని అంటారు. ఒక్కో జాతకాన్ని బట్టి ఒక్కో దిక్కు కలిసి వస్తుంది. కానీ, ఈ ఇంటి యజమానికి దిక్కులతో పనిలేదు. అతడు ఏ దిక్కు కావాలంటే ఆ దిక్కుకు తన ఇంటిని తిప్పుకోగలడు. అదెలా సాధ్యం అనుకుంటున్నారా? అయితే.. తప్పకుండా మీరు ఈ ఇంటి గురించి తెలుసుకోవల్సిందే. ఈ ఇల్లు మన భూమి తరహాలోనే తన చుట్టూ తాను తిరుగుతుంది. ఆ ఇంట్లో కిటికీ వద్ద కూర్చుంటే చాలు.. ప్రకృతి అందాలను మిస్ కాకుండా ఆస్వాదించవచ్చు. 

చక్రవర్తి షాజహాన్ తన ప్రియమైన భార్య ముంతాజ్ జ్ఞాపకార్ధంగా తాజ్ మహాల్ కట్టించిన సంగతి తెలిసిందే. కానీ, ఆ అద్భుతాన్ని చూసే అదృష్టం మాత్రం ముంతాజ్‌కు దక్కలేదు. ఉత్తర బోస్నియాలో నివసిస్తున్న ఓ మహిళకు మాత్రం ఆ అదృష్టం దక్కింది. ఆమె సంతోషం కోసం భర్త కట్టిన సరికొత్త ఇంటిని చూసి మురిసిపోయింది. దీన్ని మనం ‘తాజ్ మహాల్’తో పోల్చలేం. కానీ, గొప్ప ప్రేమ కానుక అని మాత్రం చెప్పగలం. 

స్ప్రాక్‌కు చెందిన 72 ఏళ్ల వోజిన్ కుసిక్.. తాను ఎంతగానో ప్రేమించే భార్య లుబికాకు అరుదైన కానుక ఇవ్వాలని భావించాడు. గుండ్రంగా తిరిగే ఇంటిని నిర్మించాడు. పచ్చ రంగు గోడలు.. ఎర్రరంగు పైకప్పుతో ఎంతో ఆకర్షనీయంగా కనిపించే.. ఈ ఇల్లు 22 సెకన్లలోనే ఒక రౌండ్ తిరుగుతుంది. ఇంటి నుంచి చూస్తే మొత్తం వ్యూ కనిపించాలని చెప్పిందని తెలిపాడు. తన అభిరుచికి తగినట్లు తాను ఆ ఇంటిని ప్లాన్ చేశానని చెప్పాడు. 

‘‘నా భార్య ఈ కోరికను ఎప్పుడో చెప్పింది. కానీ, వ్యాపారం నుంచి రిటైర్ అయిన తర్వాత, పిల్లలకు బాధ్యతలు అప్పగించిన తర్వాతే ఈ ఇల్లు నిర్మాణానికి శ్రీకారం చుట్టాను’’ అని తెలిపాడు. ‘‘ఉదయాన్నే బెడ్ రూమ్‌లోకి సూర్యుడి కాంతి తగలాలి. మన ఇంటి పరిసరాల్లోకి ఎవరెవరు వస్తున్నారో చూసేందుకు వీలుగా వ్యూ ఉండాలి’’ అని చెప్పింది. దీంతో వారు ఉంటున్న ఇంటినే గుండ్రంగా తిరిగే రొటేటింగ్ హౌస్‌గా మార్చేందుకు కుసిక్ కంకణం కట్టుకున్నాడు. 

ఈ సందర్భంగా కుసిక్ తన సొంత ఆలోచనతో ఇంటిని నిర్మించాడు. సాధాణంగా ఇలాంటి ఇళ్లను నిర్మించడం కేవలం ప్రొఫెషనల్‌కు మాత్రమే సాధ్యం. కానీ, కుసిక్ తనకు ఎలాంటి అనుభవం లేకుండానే ఇంటిని అలా మార్చేసుకున్నాడు. 75 ఏళ్ల వయస్సులో రోజులు తరబడి శ్రమిస్తూ.. తన భార్య కోరిన విధంగా ఇంటిని మార్చాడు. ఇంకా కొన్ని పనులు ముగింపులో ఉన్నాయని, ప్రస్తుతం గుండ్రంగా తిరుగుతున్న తన ఇంటి కిటికీ నుంచి బయటకు చూస్తూ ప్రకృతి అందాలను ఆస్వాదిస్తున్నారు. చిన్న స్విచ్ నొక్కితే చాలు.. ఇల్లు గిరగిరా తిరుగుతుందని కుసిక్ పేర్కొన్నాడు. తిరిగే ఇంటిని మీకు కూడా చూడాలని ఉందా? అయితే, ఈ వీడియో చూసేయండి. ఇప్పుడు ఈ ఇల్లు పర్యాటకులను సైతం విశేషంగా ఆకట్టుకుంటోంది. 

వీడియో:

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channelసబ్‌స్క్రైబ్‌ చేయండి