Biryani masala Recipe: బిర్యానీ మసాలా కొంటున్నారా? ఇంట్లో ఇలా చేసుకుంటే ఏడాదైనా నిల్వ ఉంటుంది

బిర్యానీ మసాలా లేనిదే బిర్యానీ వండడం కష్టమే. బిర్యానీ ప్రత్యేకమైన రుచిని ఇచ్చేది ఇదే.

(Image credit: Youtube)

బిర్యానీ అంటే ఇష్టం లేనిది ఎవరికి చెప్పండి. అందులోనూ హైదరాబాద్ బిర్యానీ అంటే ఎక్కడెక్కడి నుంచో వచ్చి మరీ తిని వెళతారు.బిర్యానీ మసాలాను రెడీమేడ్ గా కొని దాచుకునే వారే ఎక్కువ. బిర్యానీ మసాలాను ఇంట్లోనే తయారుచేసుకుని దాచుకోవచ్చు. ఒక్కసారి చేసుకుంటే ఏడాది పాటూ నిల్వ చేసుకోవచ్చు. ఇంట్లో చేసుకున్న బిర్యానీ పొడిని వాడడం వల్ల రుచి కూడా చాలా బావుంటుంది.దీన్ని తయారుచేసుకోవడం చాలా సులువు.

కావ‌ల్సిన ప‌దార్థాలు

ధనియాలు - అరకప్పు
జీలకర్ర - రెండు టీస్పూనులు
షాజీరా - రెండు టీస్పూనులు
యాలకులు - ఇరవై
దాల్చిన చెక్క ముక్కలు - నాలుగు
మరాఠీ మొగ్గలు - నాలుగు
జాజికాయ - ఒకటి
లవంగాలు - ముప్పై
జాపత్రి - నాలుగు
మిరియాలు - రెండు టీస్పూనులు
అనాస పువ్వులు - ఆరు
బిర్యానీ ఆకులు - నాలుగు
సోంపు గింజలు - రెండు టీస్పూనులు
 
బిర్యానీ మసాలా తయారీ ఇలా

1. స్టవ్ కళాయి పెట్టి జాజికాయ, అనాస పువ్వు, జాపత్రి, ధనియాలు, మరాఠీ మొగ్గలు వేసి వేయించాలి. 
2. ఓ అయిదు నిమిషాలు వేయించాక మిగిలిన పదార్థాలు కూడా వేసి వేయించాలి. బిర్యానీ ఆకులు మాత్రం వేయకూడదు. 
3. చివరలో బిర్యానీ ఆకులు వేసి వేయించాలి. ఇవి త్వరగా మాడిపోతాయి కాబట్టి చివరలో వేయాలి. 
4. ఇప్పుడు వీటన్నింటనీ మిక్సీ జార్లో వేసి మెత్తటి పొడిలా చేసుకోవాలి. 
5. మిక్సీలో పొడి చేస్తున్నప్పుడే మంచి సువాసన వెదజల్లుతుంది. 
6. ఈ పొడిని సీసాలో వేసి గాలి చొరబడకుండా మూత పెట్టి దాచుకోవాలి. 
7. మూత తీసి ఎక్కువ సేపు ఉంచకూడదు. వాసన బయటికి పోతే ఆ పొడి వేసినా వ్యర్థమే. 
8. ఇంట్లో చేసుకున్న పొడితో ఓసారి బిర్యానీ వండుకుని తిని చూడండి... బయట కొనడమే మానేస్తారు. 

మసాలాను అధికంగా వేయడం వల్ల వేడి చేస్తుంది. పొట్ట నొప్పి వస్తుంది. అదే మితంగా వేసుకుంటే ఆరోగ్యానికి చాలా మేలు జరుగుతుంది. దాల్చిన చెక్క, ధనియాలు, జాజికాయ వంటివి ఎన్నో ఆరోగ్యప్రయోజనాలను కలుగజేస్తాయి. లవంగాలో యాంటీ బాక్టిరియల్ గుణాలు అధికంగా ఉంటాయి. యాంటి సెప్టిక్, యాంటీ బయోటిక్ లక్షణాలు కూడా ఇందులో ఎక్కువ. దాల్చిన చెక్కల గురించి ఎంత చెప్పిన తక్కువే. ఇందులో ఐరన్ సోడియం, ఫైబర్, ప్రోటన్లు అధికంగా ఉంటాయి.  ఈ బిర్యానీ మసాలాను చికెన్, మటన్ కూరల్లో ఉపయోగించినా మంచి రుచి వస్తుంది.