TSPSC Group 1 2022: గ్రూప్ 1 అభ్యర్థులకు ఇక నో ఛాన్స్, మీ తప్పులు దిద్దుకోలేరు

గ్రూప్ 1 అభ్యర్థులు తమ అప్లికేషన్లు ఎడిట్ చేసుకుందుకు టీఎస్పీఎస్సీ ఇటీవల ఒక అవకాశం ఇచ్చింది. ఈ గడువు ఇవాళ్టితో ముగిసింది.

తెలంగాణ గ్రూప్ 1(ప్రతీకాత్మక చిత్రం)

Telangana Group-I : తెలంగాణ ప్రభుత్వం గ్రూప్ 1 అభ్యర్థులకు ఇచ్చిన చివరి అవకాశం ముగిసింది. దరఖాస్తులలో తప్పిదాలు సవరించుకునేందుకు, వన్ టైమ్ రిజిస్ట్రేషన్ (OTR) వివరాలు అప్ డేట్ చేసుకునేందుకు టీఎస్‌పీఎస్సీ (TSPSC) ఇచ్చిన చివరి అవకాశం గురువారం సాయంత్రం 5 గంటలకు ముగిసింది. రాష్ట్రంలో తొలిసారిగా గ్రూప్‌-1 పోస్టుల భర్తీకి టీఎస్‌పీఎస్సీ ఇటీవల నోటిఫికేషన్ జారీ చేసింది. టీఎస్‌పీఎస్సీ 503 గ్రూప్ 1 పోస్టులకు దరఖాస్తులకు ఆహ్వానించింది. ఈ పోస్టులకు భారీగా దరఖాస్తులు వచ్చాయి. తొలిసారి ఈ గడువు జూన్ తొలి వారంలోనే ముగిసింది.

తుది అవకాశం ముగిసింది 

గ్రూప్ 1 అభ్యర్థులు తమ దరఖాస్తుల్లో తప్పులు సరి చేసుకునేందుకు మరో ఛాన్స్ ఇవ్వాలని, ఓటీఆర్ అప్ డేట్ కోసం సైతం మరోసారి అవకాశం ఇవ్వాలని కోరడంతో టీఎస్‌పీఎస్సీ అందుకు అంగీకరించింది. ఈ నెల 19 నుంచి 21 వరకు అభ్యర్థులు తమ అప్లికేషన్లను ఎడిట్ చేసుకునేందుకు ఛాన్స్ ఇచ్చింది. గ్రూప్-1 అభ్యర్థులు www.tspsc.gov.in వెబ్‌సైట్‌ ద్వారా అప్లికేషన్లను ఎడిట్‌ చేసుకోవచ్చని టీఎస్పీఎస్సీ తెలిపింది. జూలై 19 ఉదయం 8 గంటల నుంచి అప్లికేషన్ ఎడిట్, ఓటీఆర్ అప్ డేట్ ప్రారంభం కాగా, జూలై 21 సాయంత్రం 5 గంటలతో అభ్యర్థులకు టీఎస్‌పీఎస్సీ ఇచ్చిన చివరి గడువు ముగిసింది. కొందరు అభ్యర్థులు ఈ అవకాశాన్ని సద్వినియోగం చేసుకున్నారు. 

అక్టోబర్ 16న ప్రిలిమ్స్ 

తెలంగాణలో నిర్వహించనున్న తొలి గ్రూప్‌-1 పోస్టుల ప్రిలిమ్స్‌ పరీక్ష తేదీని రాష్ట్ర పబ్లిక్ సర్వీస్ కమిషన్ ఇటీవల ఖరారు చేసింది. అక్టోబరు 16వ తేదీన టీఎస్‌పీఎస్సీ గ్రూప్-1 ప్రిలిమ్స్‌ పరీక్ష నిర్వహించాలని నిర్ణయించారు. సాధారణంగా గ్రూప్ -1 జాబ్ అంటే జిల్లాలోని పలు విభాగాలలో అత్యున్నత స్థాయి పోస్టులు ఉంటాయి కనుక కాంపిటీషన్ అధికంగా ఉంటుంది. డిప్యూటీ కలెక్టర్‌, డీఎస్పీ పోస్టులు సాధిస్తే భవిష్యత్తులో ఐఏఎస్‌, ఐపీఎస్‌ అయ్యే అవకాశం ఉండటంతో అభ్యర్థులు పెద్ద ఎత్తున పోటీ పడతారు. సివిల్స్‌కు ప్రిపేర్ అయ్యే అభ్యర్థులు సైతం గ్రూప్ 1 ఉద్యోగాలకు భారీగా దరఖాస్తు చేసుకుంటారు. 

మొత్తం 503 గ్రూప్ 1 పోస్టులు 

తెలంగాణ గ్రూప్‌-1 నోటిఫికేషన్ లో మొత్తం 503 పోస్టులు ఉన్నాయి. ఇందులో 225 మహిళలకు రిజర్వ్ చేశారు. జూన్‌ 4 నాటికి మొత్తం 503 పోస్టులకు 3,80,202 మంది అభ్యర్థులు దరఖాస్తు చేసుకున్నట్లు టీఎస్పీఎస్సీ తెలిపింది. ఒక్కోపోస్టుకు సరాసరి 756 మంది చొప్పున పోటీపడుతున్నారు. వచ్చే ఏడాది జనవరి లేదా ఫిబ్రవరిలో గ్రూప్‌-1 మెయిన్స్‌ పరీక్ష నిర్వహించే అవకాశముందని టీఎస్‌పీఎస్సీ పేర్కొంది. ఈసారి గ్రూప్ -1 పోస్టులుకు 51,553 మంది ప్రభుత్వ ఉద్యోగులు సైతం దరఖాస్తు చేసుకున్నారు.