Covid Vaccine for Children: గుడ్‌న్యూస్.. 12-14 ఏళ్ల పిల్లలకు అప్పటి నుంచి కరోనా వ్యాక్సిన్ పంపిణీ!

పిల్లలకు కరోనా వ్యాక్సిన్‌పై కేంద్ర గుడ్‌న్యూస్ చెప్పింది. ఫిబ్రవరి చివరి నాటికి లేదా మార్చి మొదటి వారంలో 12-14 ఏళ్ల పిల్లలకు వ్యాక్సిన్ అందిస్తామని పేర్కొంది.

పిల్లలకు కరోనా వ్యాక్సిన్

కరోనా వ్యాక్సినేషన్‌లో మరో కీలక మైలురాయిని అందుకునేందుకు భారత్ సిద్ధమవుతోంది. 12-14 ఏళ్ల పిల్లలకు కరోనా టీకా అందించే కార్యక్రమం త్వరలోనే చేపట్టనున్నట్లు NTAGI ఛైర్మన్ డా. ఎన్‌కే అరోరా తెలిపారు. ఫిబ్రవరి చివరి నుంచి ఈ వ్యాక్సినేషన్ మొదలయ్యే అవకాశం ఉందన్నారు.

జనవరి 3 నుంచి దేశంలో 15-18 ఏళ్లు ఉన్న వారికి కొవిడ్ 19 వ్యాక్సినేషన్ మొదలైంది. భారత్ బయోటెక్ తయారు చేసిన కొవాగ్జిన్ వ్యాక్సిన్ వీరికి అందిస్తున్నారు. ఇప్పటివరకు 3.31 కోట్ల మంది పిల్లలకు టీకాలు అందినట్లు అరోరా వెల్లడించారు.

" పిల్లల కొవిడ్ టీకా డ్రైవ్ పరిధిని విస్తరిస్తూ, కేంద్ర ప్రభుత్వం ఫిబ్రవరి చివరి వారం లేదా మార్చి మొదటి వారం నుంచి 12-14 ఏళ్ల పిల్లలకు టీకాల పంపిణీని ప్రారంభించే అవకాశం ఉంది. ప్రస్తుతం దేశవ్యాప్తంగా 15 నుంచి 17 ఏళ్ల పిల్లలకు వ్యాక్సినేషన్ ప్రక్రియ విజయవంతంగా సాగుతోంది. జనవరి 3 నుంచి (15-17 ఏళ్ల) వారికి వ్యాక్సినేషన్ మొదలుకాగా, జనవరి చివరి వారం నాటికి మొత్తం 7.4 కోట్ల మందికి టీకాలు అందించాలనే లక్ష్యాన్ని పెట్టుకున్నాం. ఇప్పటికే 45 శాతం లక్ష్యం పూర్తయి, 3.31 మంది పిల్లలు టీకాలు పొందారు. ఈ ఏజ్ గ్రూప్ టార్గెట్ పూర్తయిన వెంటనే 12 నుంచి 14 ఏళ్ల వారికీ టీకాలు అందించే పని మొదలవుతుంది.                                                    "

- ఎన్‌కే అరోరా, నేషనల్ టెక్నికల్ అడ్వైజరీ గ్రూప్ (NTAGI) చీఫ్ డాక్టర్

కొవాగ్జిన్.. 

దేశంలో పిల్లలందరికీ భారత్ బయోటెక్ తయారు చేసిన కొవాగ్జిన్ టీకానే అందిస్తున్నామని అరోరా అన్నారు. 15-17 ఏళ్ల వారికి ఫిబ్రవరి తొలి వారం నుంచే రెండో డోసు పంపిణీ కూడా మొదలువుతుందన్నారు. అది పూర్తయిన వెంటనే ఫిబ్రవరి చివరి వారం లేదా మార్చి తొలి వారం నుంచి 12-14 ఏజ్ గ్రూప్ వారికి టీకాలు అందించేలా ప్రణాళికలు రూపొందించామని ఆయన పేర్కొన్నారు. కరోనా వ్యాప్తి క్రమంలో స్కూళ్లు మూతపడటం, ఒమిక్రాన్ ప్రభావం పిల్లలపైనా ఎక్కువగా ఉన్న నేపథ్యంలో 12-14 ఏళ్ల పిల్లకు టీకాల పంపిణీ ముఖ్యమని డాక్టర్ అరోరా అభిప్రాయపడ్డారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి