AP COVID Cases: ఏపీలో కరోనా మరణాలు కలకలం.. ఒమిక్రాన్ RF.5 వేరియంట్‌గా గుర్తింపు, ఇది అంత ప్రమాదకరమో ?

COVID Alert in Andra Pradesh: ఆంధ్రప్రదేశ్‌లో కరోనాకు చెందిన ఒమిక్రాన్ RF.5 వేరియంట్ కేసులు నమోదైనట్లు నిర్ధారణ అయింది. ఇది ప్రమాదకర ఒమిక్రాన్ ఒక సబ్-వేరియంట్ కాగా, దీని లక్షణాలు ఇలా ఉన్నాయి.

ఏపీలో కరోనా మరణాలు నమోదు

Source : PTI

Show Quick Read

Key points generated by AI, verified by newsroom

• ఆంధ్రప్రదేశ్‌లో ఒమిక్రాన్ RF.5 వేరియంట్ వెలుగులోకి వచ్చింది.
• కడపలో నలుగురు రోగుల శాంపిల్స్‌లో దీనిని గుర్తించారు.
• ఇది ఒమిక్రాన్ ఉప-వేరియంట్, ప్రమాదకరంగా కనిపించడం లేదు.
• లక్షణాలుంటే పరీక్షలు చేయించుకొని అప్రమత్తంగా ఉండాలని సూచన.

COVID Alert in Andra Pradesh: ఆంధ్రప్రదేశ్ నుండి కరోనాకు సంబంధించి ఒక కొత్త వార్త వెలుగులోకి వచ్చింది. రాష్ట్ర ఆరోగ్య శాఖ మంత్రి సత్యకుమార్ యాదవ్ ఆంధ్రప్రదేశ్‌లో ఒమిక్రాన్ RF.5 వేరియంట్ బయటపడినట్లు తెలిపారు. కడప జిల్లాలో కోవిడ్-19 పాజిటివ్‌గా తేలిన నలుగురు రోగుల శాంపిల్స్‌ను జీనోమ్ సీక్వెన్సింగ్ కోసం పుణెలోని వైరాలజీ ల్యాబ్‌కు పంపించారు. ఇప్పుడు అక్కడ నుండి వచ్చిన నివేదికలో ఆ నలుగురి శాంపిల్స్‌లో ఒమిక్రాన్ యొక్క RF.5 సబ్-లైనీజ్ ఉన్నట్లు నిర్ధారణ అయింది. మంత్రి శనివారం రాత్రి విడుదల చేసిన తన అధికారిక పత్రికా ప్రకటనలో ఈ విషయాన్ని తెలియజేశారు మరియు ఆరోగ్య శాఖ అధికారులతో ఫోన్ ద్వారా ఈ విషయంపై చర్చించారు. అసలు పూర్తి వివరాలు ఏమిటో ఇప్పుడు తెలుసుకుందాం.

ఆంధ్రప్రదేశ్‌లో ప్రస్తుతం కరోనా వైరస్ ఆందోళన కలిగిస్తోంది. ఇటీవల కోవిడ్ 19 కేసులు నమోదు కావడంతో పాటు మరణాలు సైతం సంభవిస్తున్నాయి. ఈ క్రమంలో ఏపీలో నమోదవుతున్న కరోనా పాజిటివ్ కేసులపై ఏపీ ప్రభుత్వం కీలక అప్డేట్ ఇచ్చింది. రాష్ట్రంలో నమోదవుతున్న కరోనా వైరస్ కేసులు ఒమిక్రాన్ RF.5 వేరియంట్ అని ఆరోగ్య శాఖ మంత్రి సత్యకుమార్ యాదవ్ తెలిపారు. కడప జిల్లాల్లో ఇటీవల కొందరికి కోవిడ్ 19 పాజిటివ్ రావడంతో శాంపిల్స్ సేకరించి, జీనోమ్ సీక్వెన్సింగ్ కోసం పుణెలోని వైరాలజీ ల్యాబ్‌కు పంపారు. ఆ నివేదిక చెక్ చేయగా నలుగురి శాంపిల్స్ లో ఒమిక్రాన్ RF.5 వేరియంట్ ఉన్నట్లు గుర్తించారు. ఆరోగ్య శాఖ అధికారులతో మంత్రి సత్యకుమార్ నిరంతరం టచ్‌లో ఉండి కేసుల నమోదు, వైరస్ వ్యాప్తి అంశాలపై చర్చిస్తున్నారు. తగిన ముందు జాగ్రత్త చర్యలు తీసుకోవాలని, లక్షణాలు ఉన్న వారు వెంటనే కోవిడ్ టెస్టులు చేయించుకోవాలని సూచించారు. 

RF.5 వేరియంట్ అంటే ఏమిటి.. ఎక్కడి నుండి వచ్చింది?

RF.5 అనేది కరోనా వైరస్ ఒమిక్రాన్ వేరియంట్‌కు చెందిన ఒక సబ్ వేరియంట్. ప్రపంచవ్యాప్తంగా ఒమిక్రాన్‌కు చెందిన ఇలాంటి అనేక సబ్ వేరియంట్ కేసులను ఇదివరకే ఇప్పటికే గుర్తించారు. వాటిలో RF.5 సబ్ వేరియంట్ కూడా ఒకటి. మెడికల్ ఎడ్యుకేషన్ డైరెక్టర్ విష్ణువర్ధన్ కరోనా కేసులపై స్పందించారు. ఈ వేరియంట్ సహజంగానే రూపాంతరం చెందిందని, JN.1 వేరియంట్ నుండి జరిగిందని తెలిపారు. అది LF.7 ద్వారా వ్యాపించి PY.1.1.1 శాఖకు చేరుకుందని, ఆ తర్వాత దాని నుండి RF.5 వేరియంట్ ఏర్పడిందని వివరించారు. రెండు వేరియంట్లు కలవడం వల్ల ఏర్పడిన వేరియంట్ కాదని అధికారులు తెలిపారు. కేవలం కరోనా వైరస్‌పై నిఘా ఉంచే సాధారణ జీనోమిక్ సర్వైలెన్స్ ప్రక్రియలోనే ఈ వేరియంట్ గుర్తించారు.

ఈ వేరియంట్ ప్రమాదకరమా.. దీని లక్షణాలు ఏమిటి?

ఇప్పటివరకు అందిన ఆధారాల ప్రకారం, RF.5 వేరియంట్ మిగిలిన ఒమిక్రాన్ వేరియంట్ల కంటే ఎక్కువ ప్రమాదకరం అని సంకేతాలు ఏవీ లేవని విష్ణువర్ధన్ తెలిపారు. ప్రజలు కేవలం అప్రమత్తంగా ఉండాలని, RF.5 లక్షణాలు కూడా మిగిలిన ఒమిక్రాన్ సబ్-వేరియంట్ల లాగే ఉన్నాయని పేర్కొన్నారు. వీటి లక్షణాలలో జ్వరం, తలనొప్పి, గొంతు నొప్పి, దగ్గు, ఒళ్లు నొప్పులు ఉన్నాయి. ఎవరికైనా ఈ లక్షణాలు కనిపిస్తే, చాలా తీవ్రమైన కేసు అని భావించాల్సిన అవసరం లేదన్నారు. అయినప్పటికీ పరీక్ష చేయించుకోవడం, డాక్టర్‌ను సంప్రదించి చికిత్స తీసుకోవాలని సూచించారు.