Puneeth Rajkumar: పునీత్ లేరంటే ఇప్పటికీ నమ్మలేకపోతున్నా... చెర్రీ ఆవేదన

కన్నడ పవర్ స్టార్ దివంగత పునీత్ రాజ్ కుమార్ కుటుంబాన్ని రామ్ చరణ్ పరామర్శించారు.

(Image credit: Instagram)

పునీత్ రాజ్ కుమార్ ఆకస్మిక మరణం కేవలం కన్నడ సినిమా ఇండస్ట్రీనే కాదు తెలుగు సినీ పరిశ్రమను కూడా శోకసంద్రంలో ముంచింది. జిమ్ చేస్తూ అస్వస్థతకు గురైన పునీత్ కొన్ని నిమిషాల్లోనే గుండె పోటుతో మరణించిన సంగతి తెలిసిందే. ఎంతో ఆరోగ్యంగా ఉండే వ్యక్తి గుండె పోటుతో మరణించడం అందరినీ ఆశ్యర్యానికి గురిచేసింది. ఇప్పటికీ ఆయన లేరనే విషయాన్ని నమ్మలేకపోతున్నారు ఆయన అభిమానులు. ఆయన పార్థిక దేహాన్ని చూసేందుకు కంఠీరవ స్టేడియానికి పదిలక్షల మందికి పైగా జనం తరలి వచ్చారు. టాలీవుడ్ ప్రముఖులు ఎంతో మంది వెళ్లి పునీత్ ను చివరి చూపు చూసుకొచ్చారు. వీలుకాకపోవడం వల్ల రామ్ చరణ్ వెళ్లలేకపోయారు. ఆయన బుధవారం బెంగళూరు వెళ్లి పునీత్ కుటుంబాన్ని పరామర్శించారు. పునీత్ అన్నయ్య శివరాజ్ కుమార్ ను ఓదార్చారు.  

ఈ సందర్భంగా రామ్ చరణ్ మాట్లాడుతూ ‘నేను ఒక కుటంబసభ్యుడిని కోల్పోయా. ఇలా ఎంతోమందికి జరుగుతుందని నాకు తెలుసు కానీ పునీత్ మరణాన్ని మాత్రం నేను జీర్ణించుకోలేకపోతున్నా. ఆయన చాలా అభిమానంగా, ప్రేమగా ఉంటారు. ఆయన మా ఇంటికి కూడా వచ్చారు. మంచి మనిషిలా ఎలా జీవించడమో ఆయన్ను చూసి నేర్చుకోవచ్చు. మేము మిమ్మల్ని చాలా ప్రేమిస్తున్నాము పునీత్’అన్నారు. రామ చరణ్ పుణెలో సినిమా షూటింగ్ పూర్తి చేసుకుని మంగళవారం రాత్రి హైదరాబాద్ చేరుకున్నారు. బుధవారం ఉదయం బెంగళూరు వెళ్లి పునీత్ కుటుంబాన్ని పరామర్శించారు. 

పునీత్ చివరి క్షణాలు అంటూ ఓ వీడియో వైరల్  అవుతోంది. అందులో ఫ్యామిలీ డాక్టర్ రమణారావు ను కలిసిన పునీత్... ఆయన సూచన మేరకు విక్రమ్ ఆసుపత్రికి బయలుదేరారు. రమణారావు ఆసుపత్రి నుంచి తానే స్వయంగా నడుచుకుంటూ  కారు ఎక్కినట్టు వీడియోలో రికార్డయింది. కారు ఎక్కాక భార్య అశ్విని ఒడిలో తల పెట్టుకుని పడుకున్నారు. ఆసుపత్రికి చేరేలోపే కన్నుమూశారు. పునీత్ చివరి క్షణాలను సంబంధించిన విజువల్స్ చూసి అభిమానులు కంటతడి పెడుతున్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి