RC15: న్యూజిలాండ్కు చరణ్ పయనం - ఒక్క పాట కోసం రూ.8 కోట్ల బడ్జెట్!
నవంబర్ మొదటివారంలో RC15 సినిమాకి సంబంధించిన కొత్త షెడ్యూల్ ను మొదలుపెట్టబోతున్నారు.
మెగా పవర్ స్టార్ రామ్ చరణ్(Ram Charan) హీరోగా దర్శకుడు శంకర్ ఓ సినిమాను(RC15) రూపొందిస్తోన్న సంగతి తెలిసిందే. 'ఆర్ఆర్ఆర్' తరువాత రామ్ చరణ్ నటిస్తోన్న సినిమా కావడంతో దీనిపై భారీ అంచనాలు నెలకొన్నాయి. కియారా అద్వానీని హీరోయిన్ గా నటిస్తోన్న ఈ సినిమాను దిల్ రాజు నిర్మిస్తున్నారు. మొదట అక్టోబర్ నాటికి సినిమా షూటింగ్ పూర్తి చేయాలనుకున్నారు. కానీ శంకర్ 'ఇండియన్2' సినిమాను టేకప్ చేయడంతో.. చరణ్ సినిమా ఆలస్యమవుతుంది.
Ram Charan and Kiara to head to New Zealand: నవంబర్ మొదటివారంలో ఈ సినిమాకి సంబంధించిన కొత్త షెడ్యూల్ ను మొదలుపెట్టబోతున్నారు. దీనికోసం టీమ్ మొత్తం న్యూజిలాండ్ కి వెళ్లబోతుంది. అక్కడ రామ్ చరణ్, కియారా అద్వానీలపై పాటను చిత్రీకరించనున్నారు. దాదాపు పదిరోజుల పాటు ఈ సాంగ్ ను షూట్ చేయబోతున్నారట. న్యూజిలాండ్ లో రకరకాల ప్రదేశాల్లో ఈ పాటను చిత్రీకరించనున్నారు. నిజానికి మొదట బడ్జెట్ అనుకున్నప్పుడు శంకర్ ఈ పాట గురించి చెప్పలేదట.
ఇప్పుడు ఈ ఒక్క పాట కోసం దిల్ రాజు అదనంగా రూ.8 కోట్ల బడ్జెట్ కేటాయించినట్లు తెలుస్తోంది. శంకర్ సినిమాల్లో పాటలు ఎంత లావిష్ గా ఉంటాయో తెలిసిందే. ఆయన సినిమాలు హిట్ అయినా.. అవ్వకపోయినా.. పాటలు మాత్రం సూపర్ హిట్ అవుతుంటాయి. విజువల్స్ వండర్స్ గా నిలుస్తుంటాయి. ఇప్పుడు చరణ్ సినిమాలో కూడా కొన్ని పాటలను అలానే ప్లాన్ చేశారు శంకర్. సినిమాకి ఈ పాట హైలైట్ గా నిలుస్తుందని చెబుతున్నారు.
ఇప్పటికే ఈ సినిమా బడ్జెట్ దాటిపోయింది. దిల్ రాజు ఎప్పటిలానే ఈ సినిమాకి కూడా ఒక పర్టిక్యులర్ బడ్జెట్ అనుకున్నారు. కానీ శంకర్ తో అలా లెక్కలేసుకుంటే కుదరదు కదా..! సినిమా యాభై శాతం షూటింగ్ పూర్తి కాకుండానే అనుకున్న బడ్జెట్ అయిపోయింది. ఇప్పుడు అనుకున్న దానికంటే ఎక్కువ మొత్తాన్ని దిల్ రాజు ఖర్చు పెట్టాల్సి వస్తోంది.
ఈ సినిమాలో చరణ్ ఐఏఎస్ అధికారి పాత్రలో కనిపించనున్నారు. శ్రీకాంత్, అంజలి, సునీల్, జయరామ్, నవీన్ చంద్ర వంటి తారలు ఈ సినిమాలో కీలక పాత్రలు పోషిస్తున్నారు. తమన్ సంగీతం అందిస్తోన్న ఈ సినిమాకి తిరు సినిమాటోగ్రాఫర్ గా వ్యహరించనున్నారు. తెలుగు, తమిళం, మలయాళం, కన్నడ, హిందీ భాషల్లో ఈ సినిమాను రిలీజ్ చేయబోతున్నారు.
ఇదిలా ఉండగా.. ఈ సినిమాకి టైటిల్ గా చాలా పేర్లు వినిపిస్తున్నాయి. సినిమా మొదలైన కొత్తలో 'విశ్వంభర' అనే టైటిల్ పెడుతున్నట్లు వార్తలు వచ్చాయి. ఆ తరువాత 'సర్కారోడు', 'ఆఫీసర్' ఇలా చాలా టైటిల్స్ వినిపించాయి. రీసెంట్ గా 'అధికారి' అనే టైటిల్ ను ఖాయం చేశారని అన్నారు. ఇప్పుడు 'సిటిజెన్' అనే మరో పేరు వినిపిస్తోంది. దర్శకుడు శంకర్ సినిమా టైటిల్ అనౌన్స్ చేసేవరకు ఈ టైటిల్ లిస్ట్ పెరుగుతూనే ఉండేలా ఉంది. దీంతో అభిమానులు త్వరగా టైటిల్ అనౌన్స్ చేయమని సోషల్ మీడియా వేదికగా కోరుతున్నారు.
Also Read: పూర్ణకు పెళ్లయిపోయిందట, అందుకే ఎవరినీ పిలవలేకపోయానని చెప్పిన ముద్దుగుమ్మ!
టాప్ హెడ్ లైన్స్
ట్రెండింగ్ వార్తలు
