Thalaivar 170: రజనీ సినిమాలో బిగ్ బీ - 3 దశాబ్దాల తర్వాత మళ్లీ కలుస్తున్న లెజెండరీ యాక్టర్స్

సూపర్ స్టార్ రజనీ కాంత్ తాజా చిత్రంలో బిగ్ బీ అమిత్ బచ్చన్ కీలక పాత్ర పోషించబోతున్నారు. సుమారు 32 ఏండ్ల తర్వాత ఈ దిగ్గజ నటులు కలిసి నటించబోతున్నారు.

Photo Credit: Rajinikanth/Amitabh Bachchan/Instagram

‘జైలర్‘ చిత్రంతో సూపర్ స్టార్ రజనీ మరో బ్లాక్ బస్టర్ అందుకున్నారు. వారం రోజుల్లోనే మూవీ రూ. 500 కోట్లు వసూళు చేసి బాక్సాఫీస్ దగ్గర దుమ్మురేపింది. తమిళ్ తో పాటు తెలుగులోనూ ఈ మూవీ సక్సెస్ ఫుల్ గా రన్ అవుతోంది. నెల్సన్ దిలీప్ కుమార్ దర్శకత్వం వహించిన ఈ చిత్రాన్ని తమిళ అగ్ర నిర్మాణ సంస్థ సన్ పిక్చర్స్ భారీ బడ్జెట్ తో నిర్మించింది. ఆగష్టు 10న ప్రపంచ వ్యాప్తంగా విడుదల అయ్యింది. ఇందులో తమన్నా, జాకీష్రాఫ్‌, మోహన్‌ లాల్‌, శివరాజ్‌ కుమార్‌, సునీల్‌, యోగిబాబు కీలక పాత్రలు పోషించారు. సీనియర్ హీరోయిన్ రమ్యకృష్ణ మరో కీలక పాత్రలో నటించింది. చాలా కాలం తర్వాత రజనీకాంత్ సినిమాలో రమ్యకృష్ణ నటించడం బాగా కలిసి వచ్చింది.  అనిరుధ్ సంగీతం అందరినీ ఆకట్టుకుంది.  తొలి షో నుంచే సూపర్ హిట్ టాక్ లభించింది.  

టీజే జ్ఞాన‌వేల్ దర్శకత్వంలో రజనీకాంత్ మూవీ

‘జైలర్’ సినిమా తర్వాత రజనీకాంత్  టీజే జ్ఞాన‌వేల్ ద‌ర్శ‌క‌త్వంలో ఓ సినిమాకు గ్రీన్ సిగ్నల్ ఇచ్చారు. ‘జై భీమ్’తో అద్భుత విజయాన్ని అందుకున్న జ్ఞానవేల్, ‘జైలర్’తో బ్లాక్ బస్టర్ అందుకున్న రజనీ కాంబోలో తెరకెక్కబోయే ఈ పాన్ ఇండియా చిత్రంపై ప్రేక్షకులలో ఓ రేంజిలో అంచనాలు నెలకొన్నాయి. భారీ బడ్జెట్ తో రూపొందుతున్న ఈ చిత్రం #Thalaivar170 అనే వర్కింగ్ టైటిల్ తో చిత్రీకరణ జరుపుకోబోతోంది. ఈ నెలలోనే మూవీ షూటింగ్ మొదలుకానున్నట్లు తెలుస్తోంది.

రజనీ మూవీలో అమితాబ్ కీలక పాత్ర

రజనీకాంత్ ప్రతిష్టాత్మక చిత్రంలో బాలీవుడ్ లెజెండరీ యాక్టర్ అమితాబా బ‌చ్చ‌న్ కీల‌క పాత్ర‌ను చేయ‌బోతున్నారు. దాదాపు మూడు ద‌శాబ్దాల త‌ర్వాత ర‌జ‌నీకాంత్‌, అమితాబ్‌బ‌చ్చ‌న్ కలిసి ఈ సినిమాలో నటించబోతున్నారు.  ఈ చిత్రంలో అమితాబ్ బచ్చన్ నెగెటివ్ షేడ్స్ ఉన్న క్యారెక్టర్ చేయబోతున్నట్లు తెలుస్తోంది. ఇందులో రజనీ పోలీస్ ఆఫీసర్ గా కనిపించబోతున్నారు. సోష‌ల్ మెసేజ్‌కు క‌మ‌ర్షియ‌ల్ హంగుల‌ను మేళ‌విస్తూ తెర‌కెక్కుతోన్న ఈ సినిమాకు అనిరుధ్ సంగీతాన్ని అందించ‌బోతున్నారు. లైకా ప్రొడ‌క్ష‌న్స్ సంస్థ నిర్మించ‌నున్న‌ది. వ‌చ్చే ఏడాది వేస‌విలో ఈ పాన్ ఇండియ‌న్ మూవీని రిలీజ్ చేసేందుకు మేకర్స్  స‌న్నాహాలు చేస్తున్నారు.

32 ఏండ్ల క్రితం కలిసి నటించిన బిగ్ బీ, రజనీ  

ఇక వీరిద్దరు కలిసి 32 ఏండ్ల క్రితం సినిమా చేశారు.  ముకుల్ ఎస్ ఆనంద్ రూపొందించిన ‘హమ్’ చిత్రంలో కలిసి నటించారు. అంతకు ముందు  'అంధా కానూన్', 'గెరాఫ్తార్'  లాంటి హిట్ చిత్రాలు చేశారు. ప్రస్తుతం అమితాబ్ బచ్చన్  రిభు దాస్‌గుప్తా దర్శకత్వం వహిస్తున్న 'సెక్షన్ 84' చిత్రంలో నటిస్తున్నారు. ప్రస్తుతం ఈ సినిమా షూటింగ్ దశలో ఉంది.  ఈ సినిమా ఇంటెన్స్ కోర్ట్ రూమ్ డ్రామాగా రూపొందుతోంది. అటు నాగ్ అశ్విన్, ప్రభాస్ కాంబోలో వస్తున్న ‘Kalki 2898 AD’లోనూ కీలక పాత్ర పోషిస్తున్నారు.  ఇక రజనీకాంత్ ‘జైలర్’ విడుదల తర్వాత ఆధ్యాత్మిక యాత్ర కోసం హిమాలయాలకు వెళ్లారు. యాత్ర ముగించుకుని రీసెంట్ గా చెన్నైకి చేరుకున్నారు. ఈ నేపథ్యంలో కొత్త సినిమా పనులు మొదలుపెట్టారు.  

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.

Join Us on Telegram: https://t.me/abpdesamofficial