RRR Update : ప్రమోషనల్ సాంగ్ స్పెషాలిటీ ఇదే!

సినిమా చివర్లో వచ్చే రోలింగ్ టైటిల్స్ లో ఏం చూపించాలనే విషయంలో మేకర్లు పెద్దగా ఆలోచించరు.

RRR

దర్శకధీరుడు ఎస్.ఎస్.రాజమౌళి ఎంతో ప్రతిష్టాత్మకంగా రూపొందిస్తోన్న చిత్రం 'ఆర్ఆర్ఆర్'. రామ్ చరణ్, ఎన్టీఆర్ లు నటిస్తోన్న ఈ సినిమా ఎప్పుడు విడుదలవుతుందా అని ప్రేక్షకులు ఆసక్తిగా ఎదురుచూస్తున్నారు. కరోనా కారణంగా రెండు సార్లు వాయిదా పడిన ఈ సినిమాను అక్టోబర్ 13న విడుదల చేయడానికి సన్నాహాలు చేస్తున్నారు. ఇదిలా ఉండగా.. ఈ సినిమా కోసం ఓ ప్రమోషనల్ సాంగ్ ను రెడీ చేస్తున్నారు. 

నిజానికి సినిమా చివర్లో వచ్చే రోలింగ్ టైటిల్స్ లో ఏం చూపించాలనే విషయంలో మేకర్లు పెద్దగా ఆలోచించరు. సినిమాలో అదనంగా మిగిలిపోయిన పాటను లేదా మేకింగ్ విజువల్స్ ను చూపించి వాలేస్తారు. అంతకుమించి వాటి గురించి పట్టించుకోరు. కానీ రాజమౌళి మాత్రం దీన్ని కూడా వదిలిపెట్టడం లేదు. ఇక్కడ కూడా తన మార్క్ చూపించడానికి రెడీ అవుతున్నారు. గతంలో 'మగధీర' సినిమా సమయంలో కూడా ఇలానే రోలింగ్ టైటిల్స్ కోసం ఓ సాంగ్ పెట్టి.. అందులో సినిమాకి పని చేసిన లైట్ బాయ్ దగ్గర నుండి ప్రతి ఒక్కరినీ చూపించారు. 

ఇప్పుడు కూడా అలానే 'ఆర్ఆర్ఆర్' ప్రమోషనల్ సాంగ్ ప్లాన్ చేస్తున్నట్లు తెలుస్తోంది. సినిమాకి ఈ పాటకు ఎలాంటి సంబంధం ఉండదు. కేవలం ప్రమోషన్ కోసం వాడతారు. తరువాత సినిమా చివర్లో రోలింగ్ టైటిల్స్ మీద ఈ సాంగ్ వేస్తారు. ఇప్పుడు ఈ పాటను భారీ ఎత్తున చిత్రీకరించనున్నారు రాజమౌళి. ఈ సాంగ్ కోసం రెండు భారీ సెట్స్ ను రెడీ చేశారు. ఒక సెట్ లో ఇప్పటికే షూటింగ్ మొదలైంది. ఎన్టీఆర్, రామ్ చరణ్ ల మీద కొన్ని మాంటేజ్ సీన్స్ చిత్రీకరిస్తున్నారు. 

ఈ పాటలో హీరోహీరోయిన్లతో పాటు 'ఆర్ఆర్ఆర్' సినిమాకి సంబంధించిన టెక్నీషియన్స్ అందరూ కనిపిస్తారు. అక్కడితో ఆగడం లేదు రాజమౌళి. ఈ సాంగ్ లో తన గత చిత్రాల హీరోలను కూడా చూపించాలని అనుకుంటున్నాడట. ఈ మేరకు ప్రభాస్, రవితేజ లాంటి హీరోలకి ఇప్పటికే సమాచారం ఇచ్చారని తెలుస్తోంది. ఈ హీరోలతో పాటు నితిన్, నాని లాంటి యంగ్ హీరోలను కూడా పుట్టుకొస్తున్నాయి. ఇదే గనుక జరిగితే ఎన్టీఆర్, ప్రభాస్, రామ్ చరణ్ లాంటి హీరోలందరినీ ఒకే ఫ్రేమ్ లో చూసే ఛాన్స్ దక్కుతుంది. 

ఇక ఈ సినిమాలో మరో స్పెషల్ సాంగ్ కూడా ఉండబోతుంది. ఈ విషయాన్ని సంగీత దర్శకుడు కీరవాణి స్వయంగా చెప్పారు. ప్రకృతి అనే చిన్నారితో ఓ పాటను పాడించారు కీరవాణి.  'ఆర్ఆర్ఆర్‌'లోని తన పాటకి ప్రకృతి గొంతు మరింత జీవం పోసిందని ఆయన చెప్పారు. ఈ పాట ప్రేక్షకులకు ఎప్పుడెప్పుడు వినిపించాలా అని చిత్రబృందం ఆసక్తిగా ఎదురుచూస్తోంది.