Koshiyum Hindi Rights: పవన్ కళ్యాణ్, రానా సినిమా డబ్బింగ్ రైట్స్‌కు భారీ డిమాండ్.. ఎంత రేటు పలికిందంటే!

పవన్-రానా లాంటి హీరోలు కలిసి నటిస్తుండడంతో సినిమాకి రూ.23 కోట్లు రేటు పలికిందని తెలుస్తోంది. 

పవన్ కళ్యాణ్ సినిమా డబ్బింగ్ రైట్స్‌కు భారీ డిమాండ్

మలయాళంలో సూపర్ హిట్ అయిన 'అయ్యప్పనుమ్ కోశియుమ్' సినిమాను తెలుగులో రీమేక్ చేస్తోన్న సంగతి తెలిసిందే. ఇందులో టాలీవుడ్ పవర్‌స్టార్ పవన్ కళ్యాణ్ - రానా దగ్గుబాటి ప్రధాన పాత్రలు పోషిస్తున్నారు. ఇటీవలే ఈ సినిమా షూటింగ్‌ను పునః ప్రారంభించారు. ఈ సినిమాకి సంబంధించిన మేకింగ్ వీడియోను విడుదల చేసి ఫ్యాన్స్‌లో జోష్ నింపారు. ఈ మేకింగ్ వీడియోలో పవన్ కళ్యాణ్‌తో పాటు రానా గెటప్‌లను రివీల్ చేశారు. పవన్ కళ్యాణ్‌ను వెండితెరపై భీమ్లా నాయక్‌గా చూడడానికి అభిమానులు ఆసక్తిగా ఎదురుచూస్తున్నారు. 

సాగర్ చంద్ర దర్శకత్వం వహిస్తున్న ఈ సినిమాకి త్రివిక్రమ్ డైలాగ్స్-స్క్రీన్ ప్లే అందిస్తున్నారు. సితార ఎంటర్‌టైన్మెంట్స్ బ్యానర్‌పై నిర్మిస్తున్న ఈ సినిమా హిందీ డబ్బింగ్ హక్కులు రూ.23 కోట్ల భారీ ధరకు అమ్ముడైనట్లు తెలుస్తోంది. నిజానికి రీమేక్ సినిమాల డబ్బింగ్ రైట్స్‌కు ఇంత ధర పలకదు. అయితే ఈ సినిమా రీమేక్ అయినప్పటికీ.. స్క్రిప్ట్ ను చాలా వరకు మార్చినట్లు తెలుస్తోంది. పైగా భారీ ఫైట్లు జోడించడం, ఎమోషన్స్‌ను పెంచడం వంటి కారణాలతో ఈ రేటు పలికినట్లు సమాచారం. 

ఇప్పటివరకు తెలుగు సినిమాలు హిందీ డబ్బింగ్ రేట్లలో 'వినయ విధేయ రామ' సినిమా భారీ ధరకు అమ్ముడైంది. ఆ సినిమా కోసం అప్పట్లో దాదాపు రూ.21 కోట్లు వెచ్చించి హిందీ డబ్బింగ్ రైట్స్‌ను దక్కించుకున్నారు. ఇప్పుడు అంతకుమించి పవన్ సినిమాకి రేటు పలికింది. పైగా ఉత్తరాదిన రానాకి గుర్తింపు ఉండటం కూడా ఈ సినిమా బిజినెస్‌కి కలిసొస్తుంది. పవన్-రానా లాంటి హీరోలు కలిసి నటిస్తుండడంతో సినిమాకి రూ.23 కోట్లు రేటు పలికిందని తెలుస్తోంది. 

డబ్బింగ్ రైట్స్ సంగతి పక్కన పెడితే.. ఈ చిత్ర నిర్మాతలు శాటిలైట్, డిజిటల్ రైట్స్ కోసం కూడా భారీ రేటు కోట్ చేస్తున్నట్లు సమాచారం. మొత్తం రూ.44 కోట్ల వరకు కావాలని అడుగుతున్నారట. ఈ విషయంలో జీ సంస్థతో బేరాలు సైతం మొదలుపెట్టారని టాక్. ఈ రేటు గనుక ఫిక్స్ అయితే నాన్ థియేట్రికల్ హక్కుల రూపంలోనే రూ.67 కోట్లు రావడం ఖాయం. ఇక థియేట్రికల్ బిజినెస్ ఏ రేంజ్‌లో జరుగుతుందో ప్రత్యేకంగా చెప్పనక్కర్లేదు. ప్రస్తుతం షూటింగ్ దశలో ఉన్న ఈ సినిమాను వీలైనంత త్వరగా పూర్తి చేసి 2022 సంక్రాంతికి విడుదల చేయాలని ప్లాన్ చేస్తున్నారు. ఇక ఈ సినిమాలో పవన్ కళ్యాణ్ సరసన నిత్యామీనన్ కనిపించనుంది. రానాకి భార్య పాత్రలో ఐశ్వర్యారాజేష్‌ను ఎంపిక చేసుకున్నారు.