Shanmukh Jaswanth: యాదాద్రి టెంపుల్‌లో షణ్ముఖ్ పూజలు - కేసులు గట్రా నుంచి బయట పడేందుకు!?

యూట్యూబర్ షణ్ముఖ్ జస్వంత్ యాదాద్రి లక్ష్మీ నరసింహ స్వామి ఆలయంలో ప్రత్యేక పూజలు నిర్వహించారు.

యాదాద్రి ఆలయంలో పూజలు చేస్తున్న దృశ్యం... షణ్ముఖ్ జస్వంత్ (Image Courtesy: shannu_7/ Instagram)

ప్రముఖ యూట్యూబర్, 'బిగ్ బాస్' ఫేమ్ షణ్ముఖ్ జస్వంత్ (Shanmukh Jaswanth) గురించి తెలుగు ప్రజలకు ప్రత్యేక పరిచయాలు అవసరం లేదు. ఆయన షార్ట్ ఫిలిమ్స్, యూట్యూబ్ సిరీస్‌లు, పబ్లిక్ అప్పియరెన్స్ కంటే కేసులు, గొడవలు వార్తల్లో ఎక్కువ నిలిచాయి. వివాదాస్పద యూట్యూబర్ కింద ముద్ర పడిన షణ్ముఖ్ మంగళవారం యాదాద్రి ఆలయానికి వెళ్లారు. శ్రీ లక్ష్మీ నరసింహ స్వామికి ప్రత్యేక పూజలు నిర్వహించారు.

వివాదాల నుంచి బయట పడటం కోసమేనా?
షణ్ముఖ్ జస్వంత్ (Shanmukh Jaswanth Controversies)ను వరుస వివాదాలు వెంటాడుతున్నాయి. ఇటీవల ఆయన సోదరుడిపై విశాఖకు చెందిన ఓ మహిళ కేసు పెట్టారు. తనను పెళ్లి చేసుకుంటానని శారీరకంగా దగ్గరై, నిశ్చితార్థం చేసుకున్న తర్వాత మరొక మహిళ మెడలో మూడు ముడులు వేశారని ఫిర్యాదులో పేర్కొంది. అతని కోసం వెళ్లిన పోలీసులకు గంజాయి తాగుతూ షణ్ముఖ్ జస్వంత్ కనిపించడంతో అరెస్ట్ చేశారు.

షణ్ముఖ్ కేసును ప్రముఖ లాయర్ కళ్యాణ్ దిలీప్ సుంకర టేకప్ చేయడం, బెయిల్ మీద అతడిని బయటకు తీసుకు రావడం వంటివి తెలిసిన విషయాలే. గత ఏడాది కార్ యాక్సిడెంట్ కేసులోనూ షణ్ముఖ్ అరెస్ట్ అయ్యారు. మద్యం మత్తులో మూడు వాహనాలను ఢీ కొట్టిన ఘటనలో ఆయన మీద తీవ్ర విమర్శలు వ్యక్తం అయ్యాయి. 

షణ్ముఖ్ జస్వంత్ వరుస వివాదాల్లో చిక్కుకోవడంతో నటుడిగా అతని ప్రతిభ కంటే వ్యక్తిగత వ్యవహార శైలి వార్తల్లో నిలుస్తోంది. బ్యాడ్ లక్ అతడిని వెంటాడుతోందని ఫ్యాన్స్ వాపోతున్నారు. 'పాపం... షణ్ముఖ్' అంటూ అతడి మీద జాలి చూపిస్తున్న జనాలు సైతం ఉన్నారు. వివాదాలు, బ్యాడ్ లక్ నుంచి బయట పడటం కోసం షణ్ముఖ్ లక్ష్మీ నరసింహ స్వామికి పూజలు చేసి ఉండొచ్చు. భక్తులకు ఉన్న శాపాలు తొలగించి వాళ్లను విముక్తులను చేస్తారని లక్ష్మీ నరసింహ స్వామిని కొలుస్తారు. భక్తుల మాటను నిజం చేయడానికి అవతరించిన మూర్తిగా ఆయన గురించి పురాణాల్లో ఉంది.

హీరోయిన్లుగా షణ్ముఖ్ జస్వంత్‌ సిరీస్‌లలో నటించిన అమ్మాయిలు
షణ్ముఖ్ జస్వంత్ సరసన యూట్యూబ్ సిరీస్ చేసిన అమ్మాయిలు వెండితెరపై మంచి పేరు తెచ్చుకుంటున్నారు. పవన్ కళ్యాణ్ 'భీమ్లా నాయక్'లో కానిస్టేబుల్ పాత్రలో నటించిన మౌనికా రెడ్డి గుర్తున్నారా? ఆమె షణ్ముఖ్ 'సూర్య' సిరీస్‌లో నటించారు. ఇక, 'బేబీ' ఫేమ్ వైష్ణవి చైతన్య గురించి అయితే చెప్పాల్సిన అవసరం లేదు. 'సాఫ్ట్‌వేర్ డేవ్ లవ్ పర్' ఎంత పెద్ద విజయం సాధించిందో అందరికీ తెలుసు. ఇప్పుడు ఆ అమ్మాయి వెండితెరపై క్రేజీ కథానాయిక. ఆమెకు వరుస అవకాశాలు వస్తున్నాయి.

షణ్ముఖ్ స్నేహితుడు, 'వైవా' హర్ష సైతం 'సుందరం మాస్టర్'తో హీరో అయ్యారు. మరోవైపు సినిమాల్లో కీలక పాత్రలు చేస్తున్నారు. త్వరలో షణ్ముఖ్ సైతం సిల్వర్ స్క్రీన్ ఎంట్రీ ఇవ్వాలని ఆయన ఫ్యాన్స్ కోరుకుంటున్నారు.