Maanaadu Remake: తమిళ రీమేక్ లో మెగాహీరో.. వర్కవుట్ అవుతుందా..?

'మానాడు' సినిమాను తెలుగులో రీమేక్ చేయాలనుకుంటున్నారు. అందులో మెగాహీరో సాయి ధరమ్ తేజ్ నటించే ఛాన్స్ ఉంది.

తమిళ రీమేక్ లో మెగాహీరో..

తమిళ హీరో శింబు రీసెంట్ గా 'మానాడు' సినిమాతో భారీ విజయాన్ని తన ఖాతాలో వేసుకున్నాడు. ఈ సినిమా బాక్సాఫీస్ ను షేక్ చేస్తోంది. భారీ వసూళ్లతో దూసుకుపోతుంది. చాలా రోజులుగా ఫ్లాప్ సినిమాలతో ఇబ్బంది పడుతున్న దర్శకుడు వెంకట్ ప్రభు కూడా ఈ సినిమా రిజల్ట్ తో పండగ చేసుకుంటున్నారు. ఈ మధ్యకాలంలో ఏదైనా భాషలో ఒక సినిమా బాగుంటే చాలు.. దాని హక్కుల కోసం పోటీ పడుతున్నారు మేకర్స్. 

నిన్న రాత్రి ముంబైలో ఈ సినిమా స్పెషల్ ప్రీమియర్ షోను ఏర్పాటు చేశారు. దీనికి బాలీవుడ్ కి చెందిన పేరున్న దర్శకనిర్మాతలు అటెండ్ అయ్యారు. అందులో కొందరు సినిమాను హిందీలో రీమేక్ చేయడానికి ప్లాన్ చేస్తున్నారు. ఇప్పుడు తెలుగులో కూడా ఈ సినిమా రీమేక్ హక్కుల కోసం పోటీ పడుతున్నట్లు సమాచారం. హీరో నితిన్ తండ్రి సుధాకర్ రెడ్డి, సురేష్ బాబు, సితారా ఎంటర్టైన్మెంట్ వంటి సంస్థలు పోటీ పడుతున్నాయి. 

అయితే ఈ రీమేక్ హక్కులు గీతాఆర్ట్స్ సంస్థ దక్కించుకునే ఛాన్స్ ఉందని అంటున్నారు. అందులో మెగాహీరో సాయి ధరమ్ తేజ్ నటించే అవకాశాలు ఉన్నాయని టాక్. పొలిటికల్ థ్రిల్లర్ నేపథ్యంలో సాగే ఈ సినిమాలో ఎస్.జె.సూర్య పోలీస్ ఆఫీసర్ గా నటించారు. నిజానికి ముందుగా ఆ పాత్ర కోసం రవితేజను సంప్రదించారు. దానికి ఆయన తెలుగులో రీమేక్ అయితే నటిస్తానని చెప్పడం విశేషం. 

మరి గీతాఆర్ట్స్ సంస్థ 'మానాడు'ని రీమేక్ చేస్తే.. ఎస్.జె.సూర్య పాత్ర కోసం రవితేజను సంప్రదిస్తుందేమో చూడాలి. ముందుగా దర్శకుడిని లాక్ చేయాలని చూస్తున్నారు. దర్శకుడు ఫైనల్ అయితే ఆ తరువాత పనులన్నీ మొదలుపెడతారు. కోలీవుడ్ లో సక్సెస్ అయిన రేంజ్ లో తెలుగులో కూడా వర్కవుట్ అవుతుందేమో చూద్దాం!

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి