Hyper Aadi: మంచు విష్ణుకు హైపర్ ఆది పంచ్.. ‘లెట్ దెమ్ నో అంకుల్’ అంటూ..

మంచు విష్ణు ‘మా’ ఎన్నికల్లో చేసిన వ్యాఖ్యలకు ఆది సెటైర్ వేశాడు. నవ్వులు పూయించేందుకు సిద్ధమవుతున్న ‘తగ్గేదేలే’ దీపావళి ఇవెంట్.

Image Credit: Etv/Manchu Vishnu

దీపావళి సందర్భంగా ఈటీవీలో ‘తగ్గేదేలే’ స్పెషల్ ఇవెంట్ నిర్వహిస్తున్నారు. ఈ సందర్భంగా మల్లెమాల సంస్థ యూట్యూబ్‌లో ప్రోమో విడుదల చేశారు. ఈ కార్యక్రమంలో రోజా, ప్రియమణి, పూర్ణ, ఇంద్రజ, మన్నరా చోప్రా.. ఒకే వేదిక మీదకు వచ్చి అలరించేందుకు సిద్ధమైపోతున్నారు. ఇప్పటికే ఈ ఇవెంట్‌కు సంబంధించి రెండు ప్రోమోలు విడుదలయ్యాయి. ఈ ఇవెంట్‌లో ప్రియమణి, పూర్ణ, ఇంద్రజలు తమ డ్యాన్స్‌తో ప్రేక్షకులను మెస్మరైజ్ చేయనున్నారు. డ్యాన్సే కాదు.. ప్రేక్షకులను కడుపుబ్బా నవ్వించేందుకు ‘జబర్దస్త్’ కమెడియన్లు ఆది, ఆటో రాంప్రసాద్, చంటీ తదితరులు ప్రత్యేక స్కిట్లతో ముందుకొస్తున్నారు. 

తాజాగా విడుదల చేసిన మూడో ప్రోమోలో.. ఆది, రామ్ ప్రసాద్‌ల స్కిట్లో రోజా, ఇంద్రజ, ప్రియమణి, మన్నారా చోప్రా నవ్వించనున్నారు. మగాళ్లు ఒట్టి మాయగాళ్లే అంటూ.. ప్రియమణి ఆదిని ఉద్దేశించి పాట పాడారు. ‘ఓహో లైలా ఓ చారు షీలా కోపమేలా’ పాటను చంటీ అద్భుతంగా ఆలపించాడు. డ్యాన్సర్ పండు ‘ఉప్పెన’ సాంగ్‌తో వేడి పుట్టించనున్నట్లు ప్రోమో చూస్తుంటే తెలుస్తోంది. 

చివర్లో ఆది.. రోజాతో వాదిస్తూ.. ‘‘అన్నీ మీకు తెలిసినట్లే మాట్లాడుతున్నారేంటీ? ఇందాక ప్రియమణిగారు మా సైడుకు వచ్చి ఏం మాట్లాడారో తెలుసా మీకు?’’ అని ఆది అన్నాడు. దీంతో రోజా ఏమన్నారని ఆదిని అడిగారు. ఆది ఆవేశపడుతూ.. ఏదో చెప్పబోతుండుగా.. పక్కనున్నవారు అతడిని వారించారు. దీంతో ఆది ‘‘లేట్ దెమ్ నో అంకుల్.. లెట్ దెమ్ నో అంకుల్’’ అన్నాడు. ‘‘ఇవెంట్‌లో గెటప్ శీను అంకుల్ లేడు కాబట్టి సరిపోయింది. గెటప్ శీను అంకుల్ ఉంటే మీకు సరైన గుణపాఠం చెప్పేవాడు. అసలు స్క్రీప్టు మీద పట్టు సూన్యం మీకు’’ అంటూ మంచు విష్ణు స్టైల్లో మాట్లాడాడు. ‘‘బయట పది మంది నన్ను ఎప్పుడూ పొగుడుతూ ఉంటారు. కానీ వారి పేర్లు నేను చెప్పను. కావాలంటే వెళ్లి వారిని అడగండి నా గురించి చెబుతారు’’ అని అన్నాడు. దీంతో అంతా కడుపుబ్బా నవ్వుకున్నారు. ఇటీవల ‘మా’ ఎన్నికల్లో మంచు విష్ణు.. హీరో రాజశేఖర్ తమ ఇంటికి వచ్చిన విషయాన్ని మీడియా ముందు చెబుతున్నప్పుడు నరేష్ అతడిని వారించేందుకు ప్రయత్నించాడు. దాన్నే ఆది ఈ ఇవెంట్‌లో వాడేసుకున్నాడని ప్రోమో చూస్తే అర్థమవుతుంది.