Dil Raju: చరణ్, శంకర్ సినిమా - దిల్ రాజు లెక్క తప్పిందా?

నిర్మాతగా దిల్ రాజు లెక్కల విషయంలో చాలా పక్కాగా ఉంటారు. ఇప్పుడు రామ్ చరణ్ హీరోగా సినిమాను నిర్మిస్తున్నారు దిల్ రాజు.

చరణ్, శంకర్ సినిమా - దిల్ రాజు లెక్క తప్పిందా?

సౌతిండిన్ స్టార్ డైరెక్టర్ శంకర్(Shankar)తో సినిమా చేయాలనేది దిల్ రాజు కోరిక. అందుకే 'ఇండియన్ 2'(Indian2) సినిమాను నిర్మించాలనుకున్నారు. లైకా ప్రొడక్షన్స్ తో పార్ట్నర్ గా చేరారు. కానీ శంకర్ సినిమా బడ్జెట్ విషయంలో ఓ నెంబర్ చెప్పకపోవడంతో దిల్ రాజు ప్రాజెక్ట్ నుంచి తప్పుకున్నారు. నిర్మాతగా దిల్ రాజు లెక్కల విషయంలో చాలా పక్కాగా ఉంటారు. ఇప్పుడు అదే డైరెక్టర్ శంకర్ తో రామ్ చరణ్ హీరోగా సినిమాను నిర్మిస్తున్నారు దిల్ రాజు. 

 

దీనికోసం కూడా ఒక పర్టిక్యులర్ బడ్జెట్ అనుకున్నారు. కానీ శంకర్ తో అలా లెక్కలేసుకుంటే కుదరదు కదా..! సినిమా యాభై శాతం షూటింగ్ పూర్తి కాకుండానే అనుకున్న బడ్జెట్ అయిపోయింది. దీంతో ఇప్పుడు దిల్ రాజుకి, శంకర్ కి మధ్య విబేధాలు వచ్చినట్లు టాక్. పైగా 'ఇండియన్2' సినిమా కోసం తన సినిమాను హోల్డ్ లో పెట్టడం దిల్ రాజుకి నచ్చడం లేదట. అసలు కొత్త షెడ్యూల్ ఎప్పుడు మొదలవుతుందో కూడా అర్ధం కావడం లేదట. 

 

అనుకున్న బడ్జెట్ లో సినిమాను తీయకపోవడమే కాకుండా.. ఇలా డిలే చేస్తుండడంతో దిల్ రాజుకి వడ్డీల భారం ఎక్కువైందట. ముందు అనుకున్న బడ్జెట్ ప్రకారం.. బిజినెస్ డీల్స్ ను క్లోజ్ చేశారట. ఇప్పుడు మళ్లీ వాటిని రీవైండ్ చేయలేరు. ఆ లెక్కన చూసుకుంటే ఈ సినిమాతో దిల్ రాజుకి పెద్దగా లాభాలేవీ రావని అంటున్నారు. ప్రతి సినిమా లెక్కల విషయంలో ఎంతో పక్కాగా ఉండే దిల్ రాజు.. ఈ సినిమాకి సంబంధించి మాత్రం ఆయన లెక్క తప్పిందని ఇండస్ట్రీలో చర్చించుకుంటున్నారు. 

 

శంకర్ ప్రయారిటీ ఆ సినిమానే: 

'ఇండియన్ 2', 'RC15' సినిమాలను సమాంతరంగా చిత్రీకరించబోతున్నట్లు చెప్పారు శంకర్. కానీ ఇప్పుడు శంకర్ తన ఫోకస్ మొత్తం 'ఇండియన్2' సినిమాపైనే పెట్టినట్లు తెలుస్తోంది. రామ్ చరణ్ తో మొదలుపెట్టాలనుకున్న కొత్త షెడ్యూల్ ను ఇప్పటివరకు స్టార్ట్ చేయలేదు. దీంతో ఈ నెల మొత్తం చరణ్ ఖాళీగా ఉన్నట్లు తెలుస్తోంది. ఆగస్టులో కూడా కొన్ని రోజుల పాటే షూటింగ్ జరిగింది.

ఇప్పటివరకు చరణ్ తన తదుపరి సినిమాపై నిర్ణయం తీసుకోలేదు. అందుకే ఆయన ఖాళీగా ఉండాల్సి వచ్చింది. మరో సినిమా కోసం రామ్ చరణ్ చాలా ప్రయత్నాలు చేస్తున్నారు కానీ ఏవీ కొలిక్కి రావడం లేదు. 'విక్రమ్' సినిమా హిట్ అవ్వగానే కమల్ హాసన్ తో భారీ సినిమా వర్కవుట్ అవుతుందని నిర్మాతలకు, శంకర్ కు నమ్మకం కలిగింది. దాంతో ఆగిపోయిన 'ఇండియన్2' సినిమాను హడావిడిగా తీస్తున్నారు. బహుశా వేరే దర్శకుడెవరైనా ఇలా చేస్తే చరణ్ ఒప్పుకునేవారు కాదేమో. కానీ అక్కడ శంకర్, కమల్ హాసన్ లాంటి దిగ్గజాలు కావడంతో ఆయన సైలెంట్ గా ఉండాల్సివస్తుంది.

ఈ సినిమాలో చరణ్ ఐఏఎస్ అధికారి పాత్రలో కనిపించనున్నారు. శ్రీకాంత్, అంజలి, సునీల్, జయరామ్, నవీన్ చంద్ర వంటి తారలు ఈ సినిమాలో కీలక పాత్రలు పోషిస్తున్నారు. తమన్ సంగీతం అందిస్తోన్న ఈ సినిమాకి తిరు సినిమాటోగ్రాఫర్ గా వ్యహరించనున్నారు. తెలుగు, తమిళం, మలయాళం, కన్నడ, హిందీ భాషల్లో ఈ సినిమాను రిలీజ్ చేయబోతున్నారు.