Kalki 2898 AD: దీపికా పదుకొణె ప్రెగ్నెంట్.. ఇప్పుడు ప్రభాస్ 'కల్కి' పరిస్థితి ఏంటి?

Deepika Padukone Pregnancy: బాలీవుడ్ స్టార్ హీరోయిన్ దీపికా పదుకొణె తల్లి కాబోతున్నట్లు ఇన్‌స్టాలో వెల్లడించింది. దీంతో ఆమె ఆల్రెడీ కమిటైన సినిమాల పరిస్థితి ఏంటనే చర్చ నడుస్తోంది.

దీపికా పదుకొణె (Image Credit: Instagram)

Deepika Padukone Pregnancy: బాలీవుడ్‌ స్టార్ కపుల్‌ దీపికా పదుకొణె - రణ్‌ వీర్‌ సింగ్ అభిమానులకు ఓ గుడ్‌ న్యూస్‌ చెప్పారు. తాము త్వరలోనే తల్లిదండ్రులు కాబోతున్నట్లుగా సోషల్‌ మీడియా వేదికగా వెల్లడించారు. సెప్టెంబర్‌ నెలలో తమ తొలి బిడ్డకు జన్మనివ్వబోతున్నట్లు దీపిక ఇంస్టాగ్రామ్ లో పోస్ట్‌ పెట్టింది. దీంతో పలువురు సినీ సెలబ్రిటీలు, సన్నిహితులు వారికి శుభాకాంక్షలు చెబుతూ కామెంట్స్‌ చేస్తున్నారు. పెళ్లైన 6 ఏళ్ల తర్వాత తల్లి కాబోతోందని ఫ్యాన్స్‌ సంబరపడుతున్నారు. అయితే అదే సమయంలో దీపికా ఇప్పటికే కమిటైన సినిమాల షూటింగ్స్ పరిస్థితి ఏంటని నెటిజన్లు సందేహాలు వ్యక్తం చేస్తున్నారు. 

గతేడాది 'పఠాన్', 'జవాన్' వంటి బ్లాక్ బస్టర్ సినిమాలలో భాగమైన దీపికా పదుకొణె.. 2024 ప్రారంభంలో హృతిక్ రోషన్‌తో కలిసి 'ఫైటర్‌' అనే సినిమాలో నటించింది. ప్రస్తుతం రెబల్ స్టార్ ప్రభాస్‌ నటిస్తున్న 'కల్కి 2898 AD' చిత్రంలో హీరోయిన్ గా నటిస్తోంది. దీంతో పాటుగా బాలీవుడ్ డైరెక్టర్ రోహిత్ శెట్టి దర్శకత్వంలో తెరకెక్కుతున్న 'సింగం ఎగైన్' మూవీలోనూ కీలక పాత్ర పోషిస్తోంది. కాప్ యూనివర్స్‌లో భాగంగా రానున్న ఈ మూవీలో అజయ్ దేవగన్, కరీనా కపూర్ ఖాన్, అక్షయ్ కుమార్, రణ్ వీర్ సింగ్, టైగర్ ష్రాఫ్, అర్జున్ కపూర్ తదితరులు నటిస్తున్నారు. ఇందులో లేడీ సింగంగా, డీసీపీ శక్తి శెట్టి పాత్రలో దీపికా కనిపించనుంది. ఇప్పటికే ఆమె పాత్రకు సంబంధించిన షూటింగ్ మొత్తం కంప్లీట్ అయినట్లుగా తెలుస్తోంది. 

బాలీవుడ్ లో స్టార్ హీరోయిన్ గా రాణిస్తున్న దీపికా, 'కల్కి 2898 AD' సినిమాతో టాలీవుడ్ లో ఎంట్రీ ఇవ్వబోతోంది. ఇందులో ఆమె ప్రభాస్ కు జోడీగా కనిపించనుంది. ఇప్పటికే రిలీజైన ఫస్ట్ లుక్ అండ్ టీజర్ లో దీపికా లుక్ ఆకట్టుకుంది. ఇందులో బిగ్ బీ అమితాబ్ బచ్చన్, విశ్వ నటుడు కమల్ హాసన్, దిశా పటానీ, అన్నా బెన్ ఇతర కీలక పాత్రలు పోషిస్తున్నారు. హిందూ పురాణాల ఆధారంగా తెరకెక్కుతున్న ఈ సైన్స్ ఫిక్షన్ సోషియో ఫాంటసీ చిత్రాన్ని 2024 మే 9న ప్రపంచ వ్యాప్తంగా విడుదల చేయనున్నట్లు మేకర్స్ ప్రకటించారు. కానీ ఇప్పుడు దీపికా పదుకునే తాను ప్రెగ్నెంట్ అని ప్రకటించడంతో, ఈ సినిమా షూటింగ్ అనుకున్న సమయానికి పూర్తి చేసుకొని థియేటర్లలోకి వస్తుందో లేదో అనే కామెంట్లు వస్తున్నాయి. 

'కల్కి 2898 AD' సినిమా షూటింగ్ దాదాపుగా కంప్లీట్ అయిపోయిందని, కొంత ప్యాచ్ వర్క్ మాత్రమే పెండింగ్ ఉందని ఫిలిం సర్కిల్స్ లో టాక్ ఉంది. మరోవైపు ఆల్రెడీ ఫస్ట్ పార్ట్ షూటింగ్ అంతా పూర్తయిందని, రెండో భాగానికి సంబంధించి కొంత భాగం చిత్రీకరించారనే టాక్ కూడా వినిపిస్తోంది. అంతేకాదు ఇది వరకే దీపికా పదుకొణె తన పాత్ర షూటింగ్ మొత్తం పూర్తి చేసిందని అంటున్నారు. ఇందులో ఏది నిజమనేది తెలియదు కానీ, దీపికా ప్రెగ్నెన్సీ కారణంగా ప్రభాస్ సినిమా మరింత ఆలస్యం కాకూడదని డార్లింగ్ అభిమానులు కోరుకుంటున్నారు. 

నిజానికి 'కల్కి' చిత్రాన్ని వైజయంతీ మూవీస్ 50వ వార్షికోత్సవం సందర్భంగా 2020 ఫిబ్రవరిలోనే 'ప్రాజెక్ట్ K' అనే వర్కింగ్ టైటిల్ తో అనౌన్స్ చేసారు. అయితే కోవిడ్ మహమ్మారి కారణంగా ఒక ఏడాది వృధాగా పోయింది. 2021 జూలైలో హైదరాబాద్‌లోని రామోజీ ఫిల్మ్ సిటీలో ప్రత్యేకంగా వేసిన సెట్‌లో ఈ మూవీ షూటింగ్ ప్రారంభమైంది. అప్పటి నుంచి గత మూడు సంవత్సరాలుగా వివిధ షెడ్యూల్స్ లో ఈ సినిమా చిత్రీకరణ జరుగుతూ వచ్చింది. ప్రస్తుతం పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి. మరికొన్ని రోజుల్లో ఆంధ్రప్రదేశ్ లో అసెంబ్లీ, పార్లమెంట్ ఎన్నికలు ఉండటం.. ఐపీఎల్ క్రికెట్ టోర్నీ ప్రారంభం కానున్న నేపథ్యంలో 'కల్కి 2898 AD' చెప్పిన సమయానికే రిలీజ్ అవుతుందా లేదా అనే ప్రశ్నలు తలెత్తుతున్నాయి. దీనిపై త్వరలోనే క్లారిటీ రానుంది. 

'కల్కి 2898 AD' చిత్రాన్ని దాదాపు ₹600 కోట్ల భారీ బడ్జెట్‌తో రూపొందిస్తున్నారు నిర్మాత అశ్వినీ దత్. ఇప్పటివరకు ఇదే అత్యంత ఖరీదైన భారతీయ చిత్రం. సంతోష్ నారాయణన్ సంగీతం సమకూరుస్తున్న ఈ సినిమాకి జోర్డ్జే స్టోజిల్జ్కోవిచ్ సినిమాటోగ్రఫీ నిర్వహిస్తున్నారు. 'తుంబాడ్' ఫేమ్ నితిన్ జిహాని చౌదరి ప్రొడక్షన్ డిజైనింగ్ చేస్తున్నారు. ఈ చిత్రాన్ని భారతీయ భాషలతో పాటుగా కొన్ని ప్రధాన ఇంటర్నేషనల్ లాంగ్వేజెస్ లో 3-Dలో రిలీజ్ చెయ్యాలని మేకర్స్ భావిస్తున్నారు.