Baby John: ‘బేబీ జాన్’ టీజర్ వచ్చేసింది, మాస్ ఎలివేషన్స్తో దుమ్మురేపిన వరుణ్!
వరుణ్ ధావన్, కీర్తి సురేశ్‌ జంటగా నటించిన తాజా చిత్రం ‘బేబీ జాన్‘. కాలీస్‌ దర్శకత్వం వహిస్తున్నఈ సినిమా త్వరలో ప్రేక్షకుల ముందుకురానుంది. ఈ నేపథ్యంలో మూవీ టీజర్ ను మేకర్స్ రిలీజ్ చేశారు.
Baby John Movie Taster Cut : తమిళ స్టార్ హీరో విజయ్ దళపతి ప్రధాన పాత్రలో తెరకెక్కిన బ్లాక్ బస్టర్ హిట్ మూవీ ‘తెరి‘ హిందీలో ‘బేబీ జాన్‘గా రీమేక్ అవుతున్నది. వరుణ్ ధావన్, కీర్తి సురేశ్‌ జంటగా నటిస్తున్న చిత్రానికి కాలీస్‌ దర్శకత్వం వహిస్తున్నారు. ఈ ఇంటెన్స్‌ యాక్షన్ థ్రిల్లర్‌ త్వరలో ప్రేక్షకుల ముందుకురానుంది. ఈ నేపథ్యంలో చిత్ర బృందం ప్రమోషన్ కార్యక్రమాలను ముమ్మరం చేసింది. అందులో భాగంగా టీజర్ ను విడుదల చేసింది.
యాక్షన్ అవతార్ లో అదరగొట్టిన వరుణ్ ధావన్
తమిళ ‘తెరి’లో విజయ్ దళపతి, సమంత, అమీ జాక్సన్ ప్రధాన పాత్రలు పోషించగా.. ‘బేబీ జాన్’ సినిమాలో వరుణ్ ధావన్, కీర్తి సురేష్, వామికా గబ్బి నటిస్తున్నారు. టీజర్ చూస్తుంటే, తమిళ చిత్రాన్ని.. ఉన్నది ఉన్నట్లుగా దించేసినట్లు అర్థం అవుతోంది. అయితే, తమిళ సినిమాల్లోనే హీరో ఎలివేషన్ ఎక్కువగా ఉంటుంది అనుకుంటే.. హిందీ సినిమాలో మరింత మసాలా మిక్స్ చేశారు. వరుణ్ ను ఓ రేంజ్ లో హైలెట్ చేసినట్లు కనిపిస్తోంది. ఈ సినిమాకు తెలుగు మ్యూజిక్ సెన్సేషన్ తమన్ అందించిన బ్యాక్ గ్రౌండ్ మ్యూజిక్ అదుర్స్ అనిపించింది. టీజర్ కు ఆయన మ్యూజిక్ మాంచి ఊపు తీసుకొచ్చింది. ప్రస్తుతం ఈ టీజర్ కు ప్రేక్షకుల నుంచి చక్కటి స్పందన లభిస్తున్నది.
డిసెంబర్ 25న ప్రేక్షకుల ముందుకు రానున్న 'బేబీ జాన్'
'బేబీ జాన్' సినిమా డిసెంబరు 25న ప్రేక్షకుల ముందుకు రానుంది. 'తెరి' దర్శకుడు అట్లీ దగ్గర అసిస్టెంట్ డైరెక్టర్ గా పని చేసిన కలీస్, ఈ మూవీతో దర్శకుడిగా పరిచయం అవుతున్నాడు. ఈ మూవీ నిర్మాతల్లో అట్లీ భార్య కూడా ఒకరు. మురాద్‌ ఖేతానీ, ప్రియా అట్లీ, జ్యోతి దేశ్‌పాండే సంయుక్తంగా ఈ సినిమాను నిర్మిస్తున్నారు. తాజాగా ఈ మూవీ టీజర్ ను దర్శకుడు అట్లీ షేర్ చేశాడు. చాలా రోజులగా బాలీవుడ్‌ లో సరైన మాస్ మూవీ రాలేదు. 'బేబీ జాన్' సినిమాతో ఆ లోటు తీరే అవకాశం కనిపిస్తోంది అంటున్నారు సినీ విశ్లేషకులు.
‘పోలీసోడు’ పేరుతో తెలుగులో విడుదల
తమిళ హీరో విజయ్ దళపతి నటించిన ‘తెరి’ సినిమాను, తెలుగులో ‘పోలీసోడు’ పేరుతో డబ్ చేసి విడుదల చేశారు. ఇక్కడ కూడా ఆ సినిమా మంచి విజయాన్ని అందుకుంది. ఈ సినిమాను తెలుగులో పవర్ స్టార్ పవన్ కల్యాణ్ 'ఉస్తాద్ భగత్ సింగ్' అనే పేరుతో తెలుగులో రీమేక్ చేస్తున్నట్లు ప్రచారం జరుగుతోంది. ఈ సినిమా చాలా కాలం క్రితమే ప్రారంభం అయినప్పటికీ, ఎప్పుడు పూర్తి అవుతుందో తెలియని పరిస్థితి నెలకొంది. పవన్ కల్యాణ్ ఏపీ డిప్యూటీ సీఎం కావడంతో ఆయన పూర్తిగా రాజకీయాల మీదే ఫోకస్ పెట్టారు. ఆయన హీరోగా నటిస్తున్న సినిమాలు సగంలోనే ఆగిపోయాయి. మరోవైపు 'తెరి'ని హిందీలో 'బేబీ జాన్' పేరుతో ప్రేక్షకుల ముందుకు తీసుకురాబోతున్నారు.
Read Also: ఆ హీరోతో స్పెషల్ సాంగ్ చేయాలనుంది, అసలు విషయం చెప్పేసిన హన్సిక
టాప్ హెడ్ లైన్స్
ట్రెండింగ్ వార్తలు
