Vettaiyan Shooting: కడపలో రజనీకాంత్ సందడి, ప్రొద్దుటూరు ఆర్టీసీ బస్టాండ్ లో 'వెట్టయాన్' యాక్షన్ సన్నివేశాల చిత్రీకరణ

కడప జిల్లాలో రజనీకాంత్ ‘వెట్టయాన్‘ మూవీ షూటింగ్ కొనసాగుతోంది. తాజాగా ప్రొద్దుటూరు ఆర్టీసీ బస్టాండ్ లో యాక్షన్ సన్నివేశాలను షూట్ చేశారు. సినిమా షూటింగ్ ను చూసేందుకు పెద్ద ఎత్తున జనం తరలివచ్చారు.

కడపలో ‘వెట్టయాన్‘ షూటింగ్(Photo Credi: Rajinikanth/TheMaari/twitter)

Rajinikanth Vettaiyan Movie Shooting in Kadapa: తమిళ సూపర్ స్టార్ రజనీకాంత్ వరుస సినిమాలతో బిజీగా ఉన్నారు. ఆయన తాజాగా నటించిన ‘లాల్ సలాం‘ ఫిబ్రవరి 9న ప్రేక్షకుల ముందుకు రాబోతోంది. ప్రస్తుతం ‘వెట్టయాన్‘ సినిమాలో నటిస్తున్నారు. ఈ చిత్రంలో సౌత్ నుంచి నార్త్ వరకు పలువురు స్టార్ హీరోలు కీలక పాత్రలు పోషించబోతున్నారు. తెలుగు నుంచి రానా ద‌గ్గుబాటి ఈ మూవీలో నటిస్తుండగా, మ‌లయాళం నుంచి ఫ‌హాద్ ఫాజిల్‌ కనిపించనున్నారు. ఈ చిత్రంలో మంజూ వారియర్‌, రితికా సింగ్‌, దుషారా విజయన్‌ హీరోయిన్లుగా నటిస్తున్నారు. బాలీవుడ్ నుంచి లెజెండ‌రీ న‌టుడు అమితాబ‌చ్చ‌న్, విశ్వనటుడు కమల్ హాసన్ కూడా కీలకపాత్ర పోషిస్తున్నారు. పలువురు అగ్ర తారలు ఈ సినిమాలో భాగస్వామ్యం కావడంతో భారీగా అంచనాలు నెలకొన్నాయి.

కడప జిల్లాలో ‘వెట్టయాన్’ షూటింగ్

ప్రస్తుతం ‘వెట్టయాన్‘ సినిమా షూటింగ్ శరవేగంగా కొనసాగుతోంది. ఏపీలోని కడప జిల్లాలో గత కొద్ది రోజులుగా  సినిమా చిత్రీకరిస్తున్నారు. తాజాగా ప్రొద్దుటూరు బస్టాండ్ లో యాక్షన్ సన్నివేశాలను చిత్రీకరించారు. బస్టాండ్ లోకి పోలీస్ వాహనం వచ్చి ఆగినట్లు చూపించారు.  సూపర్ స్టార్ సినిమా చూసేందుకు చుట్టుపక్కల గ్రామాల నుంచి ఆయన  అభిమానులు, ప్రజలు పెద్ద సంఖ్యలో తరలి వచ్చారు. ఈ సినిమా షూటింగ్ కోసం జనవరి 30న రజనీకాంత్ ఆంధ్రపదేశ్ కు వచ్చారు. తొలి రోజు జమ్మలమడుగులో షూటింగ్ కొనసాగించారు. ఆ తర్వాత ఎర్రగుంట్ల ప్రాంతంలో ఉన్న గ్రానైట్ క్వారీలో సినిమాను షూట్ చేశారు. రజనీకాంత్, ఫహాద్ ఫాజిల్, రితిక సింగ్, కృష్ణుడు మీద కొన్ని కీలక సన్నివేశాలను చిత్రీకరించారు. అక్కడికి వచ్చిన అభిమానులకు రజనీకాంత్ చెయ్యి ఊపుతూ అభివాదం చేశారు. అందరికీ నమస్కారం పెట్టారు.  

కడప జిల్లా ప్రొద్దుటూరు ఆర్టీసీ బస్టాండ్ లో సూపర్ స్టార్ రజనీకాంత్ సినిమా షూటింగ్@rajinikanth #AP #Kadapa #Rajinikanth𓃵 #newmovie pic.twitter.com/BVpqxPE17y

— TheMaari (@VaddeMarenna) February 3, 2024

రజనీకాంత్ బర్త్ డే సందర్భంగా టైటిల్ టీజర్ విడుదల

ఇప్పటికే రజనీకాంత్ బర్త్ డే సందర్భంగా  టైటిల్ టీజర్ ను విడుదల చేశారు.  ఈ సినిమాకు ‘వెట్టయాన్‘ అనే పేరును ఖరారు చేశారు. ‘వెట్టయాన్‘  అంటే తెలుగులో వేటగాడు అని అర్థం. నిమిషం పాటు ఉన్న ఈ టైటిల్ టీజర్ లో రజనీ తన మార్క్ నటనతో మెస్మరైజ్ చేశారు.  “వేట మొదలైనప్పుడు వేటాడ్డం తప్పదు” అంటూ రజనీ చెప్పే డైలాగ్   ఆకట్టుకుంటుంది.  ఇక ఈ సినిమా ఓ బూటకపు ఎన్ కౌంటర్ కథాంశంతో తెరకెక్కుతున్నట్లు తెలుస్తోంది. 

‘వెట్టయాన్’పై భారీ అంచనాలు

రజనీకాంత్, జ్ఞానవేల్ కాంబోలో వస్తున్న ఈ సినిమా ఈ ఏడాదిలోనే ప్రేక్షకుల ముందుకు రానుంది. ‘జైలర్’ మూవీతో రజనీకాంత్, ‘జైభీమ్’ సినిమాతో జ్ఞానవేల్ మంచి విజయాలను అందుకున్నారు. వీరిద్దరు కలిసి చేస్తున్న ఈ సినిమాపై ఇండస్ట్రీతో పాటు ప్రేక్షకులలలో భారీగా అంచనాలు నెలకొన్నాయి. ఈ చిత్రాన్ని లైకా ప్రొడక్షన్స్ భారీ బడ్జెట్ తో నిర్మిస్తోంది. ఈ సినిమాకు అనిరుధ్ రవిచందర్‌ను సంగీతం అందిస్తున్నారు.