Priyadarshi: ఇండస్ట్రీలో ఏదీ మన కంట్రోల్‌లో ఉండదు... కత్తి పట్టడానికీ రెడీ... 'సారంగపాణి జాతకం' హీరో ప్రియదర్శి ఇంటర్వ్యూ

Priyadarshi Interview: ‘కోర్ట్’ తర్వాత దర్శకుడు మోహనకృష్ణ ఇంద్రగంటి తెరకెక్కించిన ‘సారంగపాణి జాతకం’తో ప్రియదర్శి మరోసారి ప్రేక్షకుల ముందుకు వచ్చేందుకు సిద్ధమయ్యాడు. ఆయన చెప్పిన చిత్ర విశేషాలు ఇవే...

ప్రియదర్శి పులికొండ

Source : ABPLIVE AI

Priyadarshi Pulikonda Interview About Sarangapani Jathakam: ప్రియదర్శి... ఈ మధ్య తెలుగు సినిమా ఇండస్ట్రీలో బాగా వినిపిస్తున్న పేరు. నటుడిగా ఒక్కో మెట్టు ఎక్కుతూ, వరుస సక్సెస్‌లను అందుకుంటున్న ప్రియదర్శి.. ఇప్పుడు ఇండస్ట్రీలో ఉన్న బిజీ యాక్టర్స్‌లో ఒకరు. క్యారెక్టర్ ఆర్టిస్ట్‌గా, హీరోగా... ఇలా ఏదో ఒక రూపంలో ప్రియదర్శి వెండితెరపై కనిపిస్తూనే ఉన్నారు. ఇప్పుడాయన హీరోగా శ్రీదేవీ మూవీస్ పతాకంపై శివలెంక  కృష్ణ ప్రసాద్ నిర్మించిన చిత్రం ‘సారంగపాణి జాతకం’. టాలెంటెడ్ దర్శకుడు మోహనకృష్ణ ఇంద్రగంటి తెరకెక్కించిన ఈ చిత్రం ఏప్రిల్ 25న విడుదలయ్యేందుకు ముస్తాబైంది. చిత్ర ప్రమోషన్స్‌లో భాగంగా హీరో ప్రియదర్శి ఈ చిత్ర విశేషాలను మీడియాకు తెలియజేశారు. ఆమె మాట్లాడుతూ..

‘‘ఈ ‘సారంగపాణి జాతకం’ స్టోరీని లాస్ట్ ఇయర్ విన్నాను. వాస్తవానికి ఈ సినిమా గత ఏడాది చివరిలోనే విడుదల కావాలి. కాస్త ఆలస్యంగా ఇప్పుడు ఏప్రిల్ 25న రిలీజ్ అవుతుంది. ‘కోర్ట్’ లాంటి హిట్ సినిమా తర్వాత వెంటనే ‘సారంగపాణి జాతకం’ సినిమా వస్తుండటం ఆనందంగా ఉంది. ఈ సినిమాపై నేను కాన్ఫిడెన్స్‌గా ఉన్నాను. నాపై ఎలాంటి ఒత్తిడి లేదు. ‘సారంగపాణి జాతకం’ చిత్రంలో చూపించినట్టుగా కాదు కానీ, నేను కూడా కొంత వరకు జాతకాలు నమ్ముతాను. కాకపోతే ఇండస్ట్రీలో ఏదీ మన కంట్రోల్‌లో ఉండదు. అందరం మంచి సినిమాలను చేయాలని ప్రయత్నిస్తాం. ఫలితం మన చేతుల్లో ఉండదు. ఈ మూవీని ఎప్పుడో విడుదల చేయాలని అనుకున్నాం. కానీ బిజినెస్ పరంగా, థియేటర్ల పరంగా అన్నీ లెక్కేసుకుని ఏప్రిల్ 25న విడుదల చేస్తున్నాం. జాతకాలు నమ్మాలి అని కానీ, నమ్మకూడదు అని కానీ మేం చెప్పడం లేదు. కానీ, ఒకరి నమ్మకాల్ని ఇంకొకరి మీద రుద్దితే ఎలాంటి పరిణామాలు ఎదురవుతాయనేదే ఇందులో చూపిస్తున్నాం. వన్ సైడ్ తీసుకుని మాత్రం ఏదీ ఇందులో చెప్పలేదు.

కామన్ మ్యాన్ పాత్రల్ని పోషిస్తే ఎక్కువ మందికి రీచ్ అవుతాయనేది నా నమ్మకం. ‘మల్లేశం’ అయినా, ‘సారంగపాణి జాతకం’ అయినా.. అందులోని పాత్రలను మన చుట్టూ ఉన్నవే. వారి జర్నీ చాలా పెయిన్ ఫుల్‌గా ఉంటుంది. ‘మల్లేశం, బలగం, కోర్ట్, సారంగపాణి జాతకం’ ఇలా అన్నీ కూడా మన చుట్టూనే చూస్తుంటాం. ఇందులో జాతకాల్ని నమ్మే ఓ కుర్రాడి పాత్రను పోషించాను. ఇంత వరకు నేను ఎక్కువగా తెలంగాణ మాండలికంలోనే మాట్లాడాను. కానీ ఈ సారి మాత్రం ఆంధ్ర యాసలో మాట్లాడతాను. ఇంద్రగంటి స్టైల్‌లోనే మాట్లాడేందుకు ప్రయత్నించాను. ఆయన నా కోసం ఇందులో సెపరేట్ ట్రాక్, టైమింగ్‌ను సెట్ చేశారు. అది అందరికీ నచ్చుతుందని భావిస్తున్నా. ఈ సినిమా కోసం నాకంటే ఇంద్రగంటే ఎక్కువగా కష్టపడ్డారు. ఆయన చెప్పింది చెప్పినట్లుగా సెట్స్‌లో చేసుకుంటూ పోయానంతే. నేను ఎప్పుడూ ఒత్తిడిగా ఫీల్ కాలేదు.

ఇంద్రగంటితో ఒక ఫోటో దిగితే చాలని అనుకునేవాడిని. కానీ అలాంటి ఆయనే కథను తీసుకొచ్చి నాకు చెప్పారు. కథ విన్నవెంటనే అద్భుతంగా అనిపించింది. జాతకాల పిచ్చోడు అంటూ కథ మొత్తాన్ని చెప్పారు. ‘సారంగపాణి జాతకం‘ అని టైటిల్ అనుకుంటున్నామని చెప్పారు. ఆ టైటిల్ కూడా నాకు చాలా నచ్చింది. టైటిల్ అద్భుతంగా ఉంది సర్ అని అన్నాను. ఇక ఆయనతో నా ఫస్ట్ డే షూటింగ్ అయితే ఎప్పటికీ గుర్తుండిపోతుంది. ప్రతీ ఒక్కరికీ ఇంద్రగంటితో పని చేసే అదృష్టం రావాలని కోరుకుంటున్నాను. శివలెంక కృష్ణ ప్రసాద్ గారు చాలా గొప్ప నిర్మాత. అప్పట్లోనే ‘ఆదిత్య 369’ వంటి గొప్ప చిత్రాన్ని నిర్మించారు. ఇప్పటికీ నాలాంటి కొత్త యాక్టర్‌లని కూడా సర్ అని పిలుస్తుంటారు. ఆయన ఎంతో హంబుల్‌గా ఉంటారు. ఆయన బ్యానర్‌లో పని చేసే అవకాశం రావడం నా అదృష్టం భావిస్తున్నాను.

ఇండస్ట్రీలోకి రాకముందు నేను జాతకం చూపించుకున్నాను.. నేను యాక్టర్‌ని అవ్వనని చెప్పారు. కానీ నేను ఆ జాతకాన్ని నమ్మలేదు. మా అమ్మ తన కొడుకు ఏమైపోతాడో అని అలా జాతకం చూపించారు. కానీ నేను నా మీద నమ్మకంతోనే ఇండస్ట్రీలోకి వచ్చి, చేసే పని మీద మాత్రమే నమ్మకం పెట్టుకుంటున్నానంతే. ప్రస్తుతం నవ్వించడం చాలా కష్టమైన పని. ఇంద్రగంటి కామెడీ టైమింగ్ చాలా బాగుంటుంది. ఇలాంటి ఓ పాత్రను ఇంత వరకు నేను చేయలేదు. ఇది చాలా కొత్తగా ఉండబోతోంది. ఈ చిత్రం, అందులోని నా పాత్ర అందరికీ నచ్చుతుందని భావిస్తున్నాను. 

కొన్ని సినిమాలు పాత్రల మీదే నడుస్తాయి. ‘కోర్ట్‘ చిత్రంలో నాతో పాటు అన్ని కారెక్టర్‌లు హైలెట్ అయ్యాయి. ఫైనల్‌గా సినిమాకు మంచి టాక్ వచ్చింది. సినిమా బ్లాక్ బస్టర్ అయింది. నేనున్నాను అని సినిమాకు జనాలు రారు. నేను ఓ సినిమాను చేస్తున్నాను అంటే.. అందులో ఏదో ఒక మంచి పాయింట్, కంటెంట్ ఉంటుందని నమ్ముతున్నారు. ప్రస్తుతం ప్రేక్షకులు ఏ సినిమాని చూడాలి? ఏ సినిమాను చూడకూడదు అనే విషయంలో ఫుల్ క్లారిటీతో ఉన్నారు. సినిమాలో విషయం ఉంటేనే జనాలు చూస్తున్నారు. ఒక వేళ నా సినిమా పోయినప్పుడు కచ్చితంగా నా తప్పుల్ని నేను సరిదిద్దుకుంటాను. ఎక్కడెక్కడ తప్పు చేశాం.. సినిమా ఎందుకు పోయింది? అని కాకుండా అలా చేసి ఉండాలి, నెక్ట్స్ టైం జాగ్రత్తగా ఉండాలని నాకు నేనుగా విమర్శించుకుంటాను.

మన ఇండస్ట్రీలో యాక్షన్ హీరోలు చాలా మందే ఉన్నారు. మాస్ కమర్షియల్ ఎంటర్టైనర్ చిత్రాలకు మంచి కలెక్షన్స్ కూడా వస్తుంటాయి. కానీ నాని ‘దసరా‘ చేశారు. ఆ వెంటనే ‘హాయ్ నాన్న’ కూడా చేశారు. అవి రెండూ హిట్ అయ్యాయి. ఒకప్పుడు మెగాస్టార్ చిరంజీవి, సూపర్ స్టార్ రజినీకాంత్, నటసింహం బాలయ్య అదే ఫార్మాట్‌ను అనుసరించారు. అన్ని రకాల చిత్రాలను చేసి మెప్పించారు. నేను కూడా అలానే చేయాలని అనుకుంటున్నాను. శ్రీకాంత్ ఓదెల రెడీ అంటే కత్తి పట్టుకోవడానికి రెడీ (నవ్వుతూ).

ఈ సినిమా తర్వాత ఏషియన్ సినిమాస్‌లో ‘ప్రేమంటే’ అనే సినిమాను కొత్త దర్శకుడితో చేస్తున్నాను. గీతా ఆర్ట్స్‌లో బన్నీ వాస్ నిర్మాణంలో ‘మిత్రమండలి’ అనే మరో ప్రాజెక్టుని చేస్తున్నాను. ఇంకా కొన్ని కథలు వింటున్నాను. బలమైన పాత్రలుండే సినిమాలను ఎక్కువగా చేయాలని అనుకుంటున్నాను’’ అని చెప్పుకొచ్చారు.