HanuMan Movie: ‘హనుమాన్‘ చిత్రంలో 1600 వీఎఫ్‌ఎక్స్ షాట్స్ - మరి రిలీజ్?

ప్రశాంత్ వర్మ దర్శకత్వంలో, తేజ సజ్జ ప్రధాన పాత్రలో తెరకెక్కుతున్న సినిమా ‘హనుమాన్‘. పాన్ ఇండియన్ మూవీగా రూపొందుతున్న ఈ చిత్రంలో భారీ స్థాయిలో వీఎఫ్‌ఎక్స్ షాట్స్ వినియోగిస్తున్నట్లు తెలుస్తోంది.

Photo Credit: Prasanth Varm/twitter

టాలెంటెడ్ డైరెక్టర్ ప్రశాంత వర్మ దర్శకత్వంలో ‘హనుమాన్’ సినిమా ప్రతిష్టాత్మకంగా రూపొందుతోంది. సోషియో ఫాంటసీ మూవీగా తెరకెక్కుతున్న ఈ చిత్రంలో యంగ్ హీరో తేజ సజ్జ ప్రధాన పాత్ర పోషిస్తున్నారు. ప్రశాంత్ వర్మ దర్శకత్వంలో వస్తున్న తొలి పాన్ వరల్డ్ మూవీ కావడంతో సర్వత్రా ఆసక్తి నెలకొంది. అంజనాద్రి అనే కాల్పనిక ప్రదేశం ఆధారంగా ఈ సినిమాను తెరకెక్కించారు. హను మాన్‌లా శక్తులు పొందిన సామాన్యుడు అంజనాద్రిని కాపాడుకోవడానికి ఏం చేశాడనే నేపథ్యంలో ఈ కథ ఉండబోతోంది. ఈ సినిమా నుంచి విడుదలవుతున్న పోస్టర్లు, టీజర్ సహా పలు అప్ డేట్స్ అంచనాలను భారీగా పెంచుతున్నాయి. తాజాగా ఈ సినిమా నుంచి మరో క్రేజ్ అప్ డేట్ వచ్చింది.

‘హనుమాన్’ చిత్రంలో 1600 వీఎఫ్‌ఎక్స్ షాట్స్

వాస్తవానికి ఈ సినిమా ఇప్పటికే విడుదల కావాల్సి ఉన్నా, పలుమార్లు విడుదల వాయిదా పడుతూ వస్తోంది. అందుకు ప్రధాన కారణం వీఎఫ్‌ఎక్స్ వర్క్. వీఎఫ్‌ఎక్స్ పనుల్లో జాప్యం కారణంగా మేకర్స్ విడుదలను వాయిదా వేస్తున్నారు. ఈ చిత్రంలో 1600 వీఎఫ్‌ఎక్స్ షాట్స్ ఉంటాయని తాజాగా తెలిసింది. అత్యుత్తమ నాణ్యత గల VFXని అందించడానికి చిత్ర బృందం తీవ్రంగా కృషి చేస్తోంది. ఇప్పటికే సినిమా షూటింగ్ కంప్లీట్ కాగా,  ప్రస్తుతం వీఎఫ్‌ఎక్స్‌ పనులు జరుగుతున్నాయి. జూన్‌ చివరకు అవి పూర్తయ్యే అవకాశం ఉంది. జూలైలో సినిమా విడుదల తేదీని ప్రకటించే అవకాశం ఉంది.

మరింత మెరుగ్గా సినిమాను తెరకెక్కించే ప్రయత్నం చేస్తున్న మేకర్స్

వాస్తవానికి ‘హనుమాన్’ టీజర్‌కు ప్రేక్షకుల నుంచి ఊహించని స్పందన వచ్చింది. అందుకే, అనుకున్నదాని కంటే మరికొంత మెరుగ్గా సినిమాను తీసుకురావడానికి మేకర్స్ ప్రయత్నిస్తున్నారు. కాస్త ఆలస్యం అయినా ఫర్వాలేదు, అద్భుతమైన అవుట్‌ పుట్‌ వచ్చేందుకు జాగ్రత్తలు తీసుకుంటున్నారట. ఈ సినిమాలోని ఒక్కో అంశాన్ని ఒక్కో కంపెనీ వాళ్లు వీఎఫ్‌ఎక్స్‌ చేస్తున్నట్లు దర్శకుడు ప్రశాంత్ వర్మ తెలిపారు. వీఎఫ్‌ఎక్స్‌ ఎఫెక్ట్స్‌ కు చాలా సమయం పడుతుందన్నారు. సమయం తీసుకుని చేస్తే ప్రతి సన్నివేశం చక్కగా వస్తుందన్నారు.  ఇప్పటికే ఈ సినిమాను వాయిదా వేస్తున్నట్లు దర్శకుడు ప్రశాంత్ వర్మ తెలిపారు. ‘‘హనుమాన్‌’ టీజర్‌పై మీరు చూపించిన  ప్రేమ మాకు ఎంతో ఉత్సాహాన్ని ఇచ్చింది. మా హృదయాలను హత్తుకుంది. సినిమా విషయంలో మాపై బాధ్యత మరింత పెరిగింది. అందరూ కలిసి సెలబ్రేట్‌ చేసుకునేలా, హనుమంతుడి స్ఫూర్తికి అద్దం పట్టేలా ఈ చిత్రాన్ని మీ ముందుకు తీసుకురాబోతున్నాం. వెండితెరపై ‘హనుమాన్‌’ను మీకు చూపించేందుకు మేము ఆతురతగా ఉన్నాం. త్వరలోనే కొత్త రిలీజ్ డేట్ ప్రకటిస్తాం” అని ఆయన తెలిపారు.  

11 భాషల్లో ‘హనుమాన్’ సినిమా విడుదల

‘హనుమాన్’ చిత్రాన్ని పాన్ వరల్డ్ యూవీగా ప్రశాంత్ వర్మ రూపొందిస్తున్నారు. ఈ సినిమాను ఏకంగా 11 భాషల్లో విడదల చేసేందుకు సిద్ధం అవుతున్నారు. తెలుగు,  హిందీ, మరాఠీ, తమిళం, కన్నడ, మలయాళం, ఇంగ్లీష్‌, స్పానిష్‌, కొరియన్‌, జపనీస్‌, చైనీస్‌ సహా 11 భాషల్లో ప్రేక్షకుల ముందుకు రానుంది. ప్రైమ్‌షో ఎంటర్‌టైన్‌మెంట్స్ బ్యానర్‌పై కె. నిరంజన్ రెడ్డి నిర్మించిన ఈ చిత్రంలో అమృత అయ్యర్ కథానాయికగా నటించింది. వరలక్ష్మి శరత్‌కుమార్, వినయ్ రాయ్, రాజ్ దీపక్ శెట్టి, వెన్నెల కిషోర్ కీలక పాత్రలు పోషిస్తున్నారు. గౌర హరి, అనుదీప్ దేవ్, కృష్ణ సౌరభ్  సంగీతం అందిస్తున్నారు.