Niharika Konidela: నిహారిక కొణిదెల కొత్త సినిమాకు క్రేజీ టైటిల్ - యూత్‌ను హైలైట్ చేస్తూ...

Niharika Konidela New Movie: నిహారిక సమర్పణలో తెరకెక్కుతున్న కొత్త సినిమాకు క్రేజీ టైటిల్ ఖరారు చేశారు. యువతను హైలైట్ చేసేలా ఆ టైటిల్ ఉంది. ఇంతకీ, అదేంటో తెలుసుకోండి!

నిహారిక కొణిదెల (Image Courtesy: niharikakonidela/ Instagram)

యాక్ట్రెస్, మూవీ ప్రొడ్యూసర్ - ప్రజెంటర్, టాక్ షో హోస్ట్... మెగా డాటర్ నిహారిక కొణిదెల (Niharika Konidela)ను ఏమని పరిచయం చేయాలి? ప్రతి పాత్రలో తన ప్రతిభను ఆవిడ నిరూపించుకున్నారు. నటిగా విభిన్నమైన పాత్రలు చేయడంతో పాటు పింక్ ఎలిఫెంట్ పిక్చర్స్ బ్యానర్ స్టార్ట్ చేసి వెబ్ సిరీస్, సినిమాలు ప్రొడ్యూస్ చేస్తున్నారు. ఇప్పుడు 'షెఫ్ మంత్ర' షోను హోస్ట్ చేస్తున్నారు. నటిగా, వ్యాఖ్యాతగా స్క్రీన్ మీద కనిపిస్తూ... స్క్రీన్ వెనుక నిర్మాతగానూ బిజీగా ఉన్నారు. కొత్త టాలెంట్ ఎంకరేజ్ చేస్తున్నారు. నిహారిక నిర్మిస్తున్న కొత్త సినిమాకు క్రేజీ టైటిల్ ఖరారు చేశారని సమాచారం. ఇంతకీ, అది ఏమిటో తెలుసుకోండి. 

నిహారిక కొణిదెల సమర్పించు 'కమిటీ కుర్రాళ్లు'
Committee Kurrallu Telugu Movie: నిహారిక కొణిదెల సమర్పణలో పింక్ ఎలిఫెంట్ పిక్చర్స్, శ్రీ రాధా దామోదర్ స్టూడియోస్ సంస్థలు ఓ చిత్రాన్ని తెరకెక్కిస్తున్నాయి. నిహారిక తల్లి, మెగా బ్రదర్ నాగబాబు సతీమణి పద్మజా కొణిదెల, జయలక్ష్మి అడపాక సంయుక్తంగా నిర్మిస్తున్నారు. ఈ చిత్రానికి 'కమిటీ కుర్రాళ్లు' టైటిల్ ఖరారు చేసినట్లు తెలిసింది. ఫిల్మ్ ఛాంబర్‌లో ఈ టైటిల్ రిజిస్టర్ చేయించారు. అది ఈ సినిమా కోసమే.

'కమిటీ కుర్రాళ్లు' టైటిల్ ఏప్రిల్ తొలి వారం లేదా రెండో వారంలో అనౌన్స్ చేసే ఆలోచనలో నిహారిక కొణిదెల అండ్ టీమ్ ఉన్నారు. ఈ సినిమా ద్వారా పదకొండు మంది హీరోలను, నలుగురు హీరోయిన్లను నిహారిక పరిచయం చేస్తున్నారు. వారిలో యూట్యూబ్ ఫిలిమ్స్, సిరీస్ చేసిన నటీనటులు ఉన్నారు.

'పెళ్ళివారమండీ', 'మా విడాకులు', 'దిల్ పసంద్' వంటి యూట్యూబ్ సిరీస్ ద్వారా గుర్తింపు తెచ్చుకున్న ప్రసాద్ బెహరా ఓ హీరోగా నటిస్తున్నారు. సందీప్ సరోజ్, యశ్వంత్ పెండ్యాల, త్రినాథ్ వర్మ, ఈశ్వర్ రచిరాజు, మణికంఠ పరసు, లోకేష్ కుమార్ పరిమి, శ్యామ్ కళ్యాణ్, రఘువరన్, శివకుమార్ మట్ట, అక్షయ్ శ్రీనివాస్, శరణ్య సురేష్, తేజస్వి రావు, విషిక, షణ్ముఖి నాగు మంత్రి ఇతర ప్రధాన తారాగణం. ఓ కాలనీలో పదకొండు మంది కుర్రాళ్లు కమిటీగా ఏర్పడి ఏం చేశారు? అనేది సినిమా కథగా తెలుస్తోంది.

'హనుమాన్' అనుదీప్ సంగీతంలో 'కమిటీ కుర్రాళ్లు'
'కమిటీ కుర్రాళ్లు' చిత్రానికి యదు వంశీ దర్శకుడు. అనుదీప్ దేవ్ సంగీతం అందిస్తున్నారు. గాయకుడిగా ఆయన పలు హిట్ సాంగ్స్ పాడారు. అయితే, ఆయనలో సంగీత దర్శకుడు సైతం ఉన్నాడని 'హనుమాన్'తో తెలిసింది. ఆ సినిమాలో 'సూపర్ హీరో హనుమాన్' సాంగ్ కంపోజ్ చేసింది ఆయనే. 'కమిటీ కుర్రాళ్లు'కు అనుదీప్ మ్యూజిక్ హైలైట్ కానుందని తెలిసింది.

'కమిటీ కుర్రాళ్లు' చిత్రానికి కూర్పు: అన్వర్ అలీ, మాటలు: వెంకట సుభాస్ చీర్ల - కొండల రావు అడ్డగళ్ల, ఎగ్జిక్యూటివ్ నిర్మాత: మన్యం రమేష్, ప్రొడక్షన్ డిజైనర్: ప్రణయ్ నైని,ఛాయాగ్రహణం: రాజు ఎడురోలు, సంగీతం: అనుదీప్ దేవ్, సమర్పణ: నిహారిక కొణిదెల, నిర్మాణ సంస్థలు: పింక్ ఎలిఫెంట్ పిక్చర్స్ - శ్రీ రాధా దామోదర్ స్టూడియోస్, నిర్మాతలు: పద్మజా కొణిదెల - జయలక్ష్మి అడపాక, రచన - దర్శకత్వం: యదు వంశీ.