Thalapathy 68: నటుడిగా ఎంట్రీ ఇవ్వబోతున్న ధోనీ, విజయ్ చిత్రంలో విలన్ పాత్ర?

టీమిండియా మాజీ కెప్టెన్ గా క్రికెట్ ప్రపంచానికి పరిచయమైన ఎంఎస్ ధోని, రీసెంట్ గా సినిమా రంగంలోకి అడుగు పెట్టారు. ఓ నిర్మాణ సంస్థను స్థాపించి చిత్రాలను నిర్మిస్తున్నారు. ధనా ధన్ షాట్లతో జార్ఖండ్ డైనమైట్ గా గుర్తింపు తెచ్చుకున్న ధోని, 2020లో క్రికెట్ కు వీడ్కోలు పలికారు. ఆ తర్వాత ఐపీఎల్ లో చెన్నై సూపర్ కింగ్స్ తరఫున ఆడుతున్నారు. జట్టు కెప్టెన్ గా ఉంటూ ముందుకు నడిపిస్తున్నారు. రీసెంట్ ఆయనకు సంబంధించి ఓ వార్త సోషల్ మీడియాలో చక్కర్లు కొడుతోంది. క్రికెటర్ నుంచి నటుడిగా మారబోతున్నట్లు తెలుస్తోంది.విజయ్ దళపతి సినిమాలో కీలక పాత్ర పోషిస్తున్నట్లు టాక్ నడుస్తోంది.

‘లియో’ మూవీలో విజయ్ బిజీ

ప్రస్తుతం విజయ్ దళపతి లియో సినిమాలో నటిస్తున్నారు.  లోకేష్ కనగరాజ్ దర్శకత్వంలో భారీ బడ్జెట్ తో ఈ మూవీ తెరకెక్కిస్తున్నారు. ఈ సినిమాలో విజయ్ ప్రత్యర్థి పాత్రలో బాలీవుడ్ స్టార్ హీరో సంజయ్ దత్ నటిస్తున్నాడు. త్రిష హీరోయిన్ గా కనిపించనున్నది. అర్జున్ సర్జా, మన్సూర్ అలీ ఖాన్, గౌతమ్ వాసుదేవ్ మీనన్, ప్రియా ఆనంద్ ప్రధాన పాత్రల్లో నటిస్తున్నారు. ఈ చిత్రానికి అనిరుద్ సంగీతం సమకూరుస్తున్నారు. లలిత్ కుమార్ నిర్మాతగా వ్యవహరిస్తున్నారు. తమిళంతో పాటు తెలుగులోనూ ఈ సినిమాను ఒకేసారి విడుదల చేయడానికి ప్లాన్ చేస్తున్నారు మేకర్స్. 

విజయ్ దళపతి సినిమాలో ధోని కీలక పాత్ర!

‘లియో’ సినిమా కంప్లీట్ కాగానే దర్శకుడు వెంకట్‌ ప్రభుతో కలిసి విజయ్ ఓ సినిమా చేయబోతున్నారు. Thalapathy 68 వర్కింగ్ టైటిల్ తో ఈ సినిమా ప్రీ ప్రొడక్షన్ పనులు కొనసాగుతున్నాయి. ఏజీఎస్‌ ఎంటర్‌టైన్‌మెంట్‌ సంస్థ నిర్మిస్తున్న ఈ చిత్రం వచ్చే నెలలో సెట్‌ పైకి వెళ్లనున్నట్లు తెలుస్తోంది. ఈ చిత్రంలో విజయ్‌ సరసన నటి జ్యోతిక నటించనున్నట్లు సమాచారం. ఈ సినిమాకు సంబంధించి తాజాగా ఓ ఇంట్రెస్టింగ్ న్యూస్ వైరల్ అవుతోంది. ఈ చిత్రంలో టీమిండియా మాజీ కెప్టెన్ ఎంఎస్ ధోని కీలక పాత్ర పోషించబోతున్నట్లు తెలుస్తోంది. ఏకంగా ఆయన విలన్ పాత్ర చేయబోతున్నట్లు టాక్ నడుస్తోంది. ఇప్పటి వరకు ఎలాంటి అధికారిక ప్రకటన రాకపోయినా, త్వరలోనే ఈ వార్తలపై చిత్ర బృందం క్లారిటీ ఇచ్చే అవకాశం ఉంది. ఈ సినిమాకు యువన్‌ శంకర్‌ రాజా సంగీతాన్ని అందించనున్నారు.     

ఇప్పటికే నిర్మాణ రంగంలోకి అడుగు పెట్టిన ధోని

రీసెంట్ గా ధోని సినిమా పరిశ్రమలోకి అడుగు పెట్టారు. ధోని ఎంటర్‌టైన్‌మెంట్ ప్రైవేట్ లిమిటెడ్ పేరుతో ఓ నిర్మాణ సంస్థను స్థాపించారు. 'లెట్స్ గెట్ మ్యారేజ్(LGM)' అనే తమిళ సినిమాను నిర్మించారు. అటు ధోని నటుడిగా సినిమా పరిశ్రమలోకి అడుగు పెట్టే అవకాశం ఉందని ఇప్పటికే ఆయన భార్య సాక్షి తెలిపారు. మంచి కథ, సందేశం ఉన్న క్యారెక్టర్ వస్తే తప్పకుండా చేస్తారని చెప్పారు. విజయ్ సినిమాలో ధోని కనిపించబోతున్నాడనే వార్తలతో ఆయన అభిమానులు సంతోషం వ్యక్తం చేస్తున్నారు.   

Read Also: ‘డాన్ 3’ హీరోగా రణ్ వీర్ సింగ్ - కాస్త భయంగా ఉందన్న దర్శకుడు ఫర్హాన్

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial