Telugu OTT Releases: ‘హరోం హర‘ to ‘మనమే’- జులై నెలలో ఓటీటీలో సందడి చేయబోయే సినిమాలు ఇవే!

జులై నెలలో ఓటీటీ వేదికగా పలు సినిమాలు, వెబ్ సిరీస్ లు ప్రేక్షకులను అలరించబోతున్నాయి. ఇంతకీ అవేంటో ఇప్పుడు తెలుసుకుందాం.

తెలుగు ఓటీటీ మూవీస్, వెబ్ సిరీస్ లు(Photo Credit: social media)

Source : Other

Telugu OTT Releases In July 2024: ఈ నెలలో ఓటీటీ వేదికగా ప్రేక్షకులకు కావాల్సినంత ఎంటర్ టైన్మెంట్ లభించనుంది. డిస్నీ+ హాట్‌ స్టార్‌‌లో యాక్షన్-ప్యాక్డ్ 'హరోం హర', అమెజాన్ ప్రైమ్‌లో క్రైమ్ యాక్షన్ 'మిర్జాపూర్' సీజన్ 3, సహా 'మనమే', 'రక్షణ' లాంటి వెబ్ సిరీస్ లు, సినిమాలు అలరించనున్నాయి.  

1. హరోం హర

సుధీర్ బాబు హీరోగా నటించిన యాక్ష‌న్ ఎంట‌ర్‌టైన‌ర్ ‘హరోం హర’ అమెజాన్ ప్రైమ్ వేదికగా విడుదలకు రెడీ అవుతోంది. ఔట్ అండ్ ఔట్ యాక్ష‌న్ స్టోరీతో తెరకెక్కిన ఈ సినిమా జూన్ 14న థియేట‌ర్ల‌లో విడుదల అయ్యింది. కుప్పం పరిసరాల్లో జరిగిన కథతో పీరియాడికల్ డ్రామాగా తెరకెక్కించారు దర్శకుడు జ్ఞాన‌ సాగ‌ర్. జూలై 12 నుంచి అమెజాన్ ప్రైమ్ ఓటీటీలో ఈ మూవీ స్ట్రీమింగ్ కాబోతోంది. ఈ చిత్రంలో సుధీర్ బాబుకు తోడుగా మాళ‌వికా శ‌ర్మ హీరోయిన్‌గా న‌టించింది. సునీల్‌, అక్ష‌రా గౌడ ఇతర పాత్రల్లో కనిపించారు. అయితే, ఈ మూవీ అనుకున్న థియేటరల్లో స్థాయిలో ప్రేక్షకులను ఆకట్టుకోలేకపోయింది.     

2. మనమే

శర్వానంద్, కృతిశెట్టి హీరో, హీరోయిన్లుగా దర్శకుడు శ్రీరామ్ ఆదిత్య తెరకెక్కించిన సినిమా ‘మనమే’. జూన్ లో విడుదలైన ఈ సినిమా డీసెంట్ టాక్ తెచ్చుకుంది. అన్ని వర్గాల ప్రేక్షకులను ఆకట్టుకుంది. ఇప్పుడు ఈ సినిమా ఓటీటీ రిలీజ్‌కు రెడీ అవుతోంది. డిస్నీ ప్లస్ హాట్ స్టార్ వేదికగా జులై రెండో వారంలో స్ట్రీమింగ్ కు వచ్చే అవకాశం ఉంది. ఈ సినిమాకు హేషమ్ అబ్దుల్ వాహద్ సంగీతం అందించగా, పీపుల్ మీడియా ఫ్యాక్టరీ సంస్థ నిర్మించింది. 

3. మార్కెట్ మహాలక్ష్మి

పార్వతీశం, ప్రణీకాన్వికా జంటగా నటించిన చిత్రం ‘మార్కెట్ మహాలక్ష్మి’. వి.యస్.ముఖేష్ ఈ సినిమాకు దర్శకత్వం వహించారు. ఈ సినిమా ఏప్రిల్ 18న థియేటర్లలో విడుదలైంది. ప్రేక్షకులను బాగానే ఆకట్టుకుంది. ఈ సినిమా ఆహాలో జులై 4 నుంచి స్ట్రీమింగ్‌ కు రానుంది. ఈ విషయాన్ని ఆహా అఫీషియల్ గా అనౌన్స్ చేసింది. హర్ష వర్ధన్, ముక్కు అవినాష్, మహబూబ్ ప్రధాన పాత్రల్లో నటించారు. ఇప్పుడు ఓటీటీ వేదికగా ఈ మూవీ ప్రేక్షకులను అలరించేందుకు రెడీ అయ్యింది.  

4. రక్షణ

పాయ‌ల్ రాజ్‌పుత్ ప్రధాన పాత్రలో నటించిన సినిమా ‘రక్షణ’. త్వరలో ఈ మూవీ ఓటీటీలో విడుదలకు రెడీ అవుతోంది. ఆహా వేదికగా ప్రేక్షకులను అలరించనుంది. పాయ‌ల్ రాజ్‌ పుత్ పోలీసు అధికారిగా నటించిన ఈ సినిమాకు ప్ర‌ణ‌దీప్ ఠాకూర్ ద‌ర్శ‌క‌త్వం వహించారు. జులై 21 నుంచి ఈ సినిమా స్ట్రీమింగ్ కాబోతున్న‌ట్లు తెలుస్తోంది. ఈ సినిమాలో పాయల్ రాజ్‌ పుత్ తో పాటు శివన్నారాయణ, మానస్, రాజీవ్ కనకాల, వినోద్ బాలా, ఆనంద్ చక్రపాణి కీలక పాత్రలు పోషించారు. 

5. శశి మదన

సోనియా సింగ్ ప్రధాన పాత్రలో నటించిన రొమాంటిక్ కామెడీ వెబ్ సిరీస్ ‘శశి మదన’. జులై 4 నుంచి ఈ వెబ్ సిరీస్ ఈటీవీ విన్ లో స్ట్రీమింగ్ కానుంది. బుల్లితెరపై తన పంచులతో ఆకట్టుకున్న సోనియా ఇప్పుడు వెబ్ సిరీస్ తో అలరించబోతుంది. ఇందులో పవన్ సిద్ధూ, రూప లక్ష్మి, కీర్తి సహా పలువురు కీలక పాత్రలు పోషించారు.