Dasara: సినిమా హిట్ కంటే ఫ్లాప్ అవ్వాలని కోరుకునే వాళ్లే ఎక్కువ: నాని

తాను ఇప్పటి వరకూ తనకు నచ్చిన సినిమాలే చేశానని, అయితే కొంత మంది ఇది సెట్ అవ్వదు, ఇది వేస్ట్ అంటూ కామెంట్లు చేసేవారని కానీ తాను నమ్మకంతో పని చేసుకుంటూ వెళ్లిపోయేవాడినని అన్నారు నాని.

Image Credit:Hero Nani/Instagram

Dasara: దర్శకుడు శ్రీకాంత్ ఓదెల దర్శకత్వంలో నాని హీరోగా తెరకెక్కిన సినిమా ‘దసరా’. ఈ సినిమాలో కీర్తి సురేష్ హీరోయిన్ గా నటించింది. మార్చి 30న విడుదలైన ఈ సినిమా రిలీజైన వారం రోజుల్లోనే రూ.100 కోట్ల క్లబ్ లోకి చేరిపోయింది. ఇప్పటికీ మూవీ మంచి వసూళ్లతో థియేటర్లలో దూసుకుపోతుంది. ఈ నేపథ్యంలో మూవీ టీమ్ కరీంనగర్‌లో విజయోత్సవ సభను ఏర్పాటు చేశారు. ఈ సందర్భంగా హీరో నాని పలు కీలక వ్యాఖ్యలు చేశారు. ఏదైనా సినిమా విడుదల అవుతుంటే రిలీజ్ కు మందే ‘ఈ సినిమా పోతుంది చూస్కో అని’ సోషల్ మీడియాలో వైరల్ చేస్తున్నారని, అలాంటి చెడుపై ఈరోజు మంచి (దసరా) గెలిచిందని వ్యాఖ్యానించారు. ప్రస్తుతం నాని వ్యాఖ్యలు సోషల్ మీడియాలో వైరల్ అవుతున్నాయి. 

ఈ కార్యక్రమంలో నాని మట్లాడుతూ.. సినిమా విడుదలకు ముందు నుంచీ కూడా దర్శకుడు శ్రీకాంత్ తన దగ్గరకు వచ్చి ‘‘మన సినిమా నుంచి ఏదొక ఈవెంట్ కరీంనగర్ లో చేద్దాం అన్నా’’ అని అడిగేవాడని అన్నారు నాని. తను అలా ఎందుకు అడుగుతున్నారో తనకు అర్థం కాలేదని, కానీ ఇక్కడకు వచ్చాక అభిమానుల ఉత్సాహం చూస్తే తెలిసిందని అన్నారు. తమ సినిమాను ఇంతలా ఆదరించిన ప్రతీ ఒక్కరికీ ధన్యవాదాలు తెలుపుతున్నానన్నారు.

సినిమాలు ఆడకూడదు అని కోరుకునే వాళ్లే ఎక్కువ

తాను ఇప్పటి వరకూ తనకు నచ్చిన సినిమాలే చేశానని, అయితే కొంత మంది ఇది సెట్ అవ్వదు, ఇది వేస్ట్ అంటూ కామెంట్లు చేసేవారని.. కానీ తాను నమ్మకంతో పని చేసుకుంటూ వెళ్లిపోయేవాడినని అన్నారు. అభిమానుల ప్రోత్సాహం కూడా చాలా ఉందని అన్నారు. అందుకే ‘దసరా’ సినిమా ఇంతటి విజయాన్ని అందుకుందని పేర్కొన్నారు. ఈ సినిమాతో ఆ నమ్మకం మరింత బలపడిందని చెప్పుకొచ్చారు. అందుకే ఏదైనా చేయాలి అనుకుంటే ఎవరి మాటలు పట్టించుకోవద్దని అన్నారు. మనం పైకి ఎక్కుతుంటే కొందరు కిందకు లాగడానికి ప్రయత్నింస్తుంటారని, కానీ మీరు కష్టపడి, నమ్మకంతో పనిచేయాలని అప్పుడే విజయం వరిస్తుందని చెప్పారు. ఏదైనా సినిమా విడుదల అవుతుంటే సినిమా బాగా ఆడాలని అనుకునేవాళ్లు తక్కువని, ఈ సినిమా పోతుంది చూస్కో అని ముందే సోషల్ మీడియాలో చెప్పేస్తున్నారని అన్నారు. అలాంటి చెడు మీద ఈ రోజు దసరా గెలిచిందని చెప్పారు. ఈ విజయం తన ఒక్కడిదే కాదని, ‘దసరా’ కోసం పని చేసిన ప్రతీ ఒక్కిరిదీ అని అన్నారు. 

బాక్స్ ఆఫీస్ వద్ద దూసుకెళ్తున్న ‘దసరా’

‘దసరా’ సినిమా విడుదలకు ముందు నుంచే హైప్ క్రియేట్ చేశారు మేకర్స్. హీరో నాని కూడా ఈసారి ప్రమోషన్స్ లో బాగానే తిరిగారు. అయితే మూవీ విడుదలైన తర్వాత ఊహించిన దానికంటే ఎక్కువగా ఆదరణ లభించింది. రొటీన్ స్టోరీనే అయినా స్క్రీన్ ప్లే, నాని నటన, యాక్షన్ సన్నివేశాలు ఇలా అన్ని కొత్తగా ఉండటంతో ప్రేక్షకులు థియేటర్లకు క్యూ కట్టారు. సినిమా విడుదల అయిన మొదటి రెండు రోజుల్లోనే 50 కోట్ల వసూళ్లు సాధించిందీ ‘దసరా’. ఇక వారం రోజుల్లో వంద కోట్ల కలెక్షన్లు సాధించి నాని ను వంద కోట్ల మార్కెట్ లో నిలబెట్టింది. నాని కెరీర్ లోనే అత్యంత వేగంగా అధిక వసూళ్లు సాధించిన సినిమాగా నిలిచింది. ఇప్పటికీ థియేటర్లలో సక్సెస్ ఫుల్ గా రన్ అవుతుంది నాని ‘దసరా’.