Actor Darshan: ఆపరేషన్ అని బెయిల్‌పై బయటకు వచ్చాడు... బాబోయ్ దర్శన్ కేసులో ఈ ట్విస్టేంటి?
కన్నడ నటుడు దర్శన్‌కు రెగ్యులర్ బెయిల్ మంజూరైంది. అయితే ఈ బెయిల్ కంటే ముందు ఆరోగ్య సమస్యలతో ఆపరేషన్ అంటూ మధ్యంతర బెయిల్‌పై వచ్చిన దర్శన్.. తనకు బెయిల్ రావడంతో సడెన్‌గా ట్విస్ట్ ఇచ్చారు.
అభిమాని హత్య కేసులో కన్నడ నటుడు దర్శన్, ఆయన స్నేహితురాలు పవిత్రా గౌడకు ఉపశమనం లభించిన విషయం తెలిసిందే. వారిద్దరికీ రెగ్యులర్ బెయిల్ వచ్చింది. జస్టిస్ ఎస్. విశ్వజిత్ శెట్టి నేతృత్వంలోని ధర్మాసనం దర్శన్, పవిత్రలతో పాటు మరో ఇద్దరికి డిసెంబర్ 13న బెయిల్ మంజూరు చేసింది. అయితే ఈ బెయిల్ కంటే ముందే ఆరు వారాల మధ్యంతర బెయిల్‌తో దర్శన్ రీసెంట్‌గా విడుదలయ్యారు. అందుకు కారణం వెన్ను నొప్పి‌తో బాధపడుతున్న దర్శన్‌కు శస్త్ర చికిత్స అవసరమని డాక్టర్స్ సూచించడంతో దర్శన్‌కు ఆరు వారాల మధ్యంతర బెయిల్ మంజూరైంది. మధ్యంతర బెయిల్‌తో బయటికి వచ్చిన దర్శన్... ఫిజియోథెరఫీ చేయించుకుంటూ... ఆపరేషన్‌కు రెడీ అవుతున్నట్లుగా వార్తలు వచ్చాయి.
అయితే ఎప్పుడైతే తనకు రెగ్యులర్ బెయిల్ మంజూరైందని తెలిసిందో.. ఎటువంటి ఆపరేషన్ లేకుండానే దర్శన్ ఆస్పత్రి నుండి డిశ్చార్జ్ అయ్యారు. ఇదే ట్విస్ట్. అంటే... నిజంగా ఆయనకు ఆరోగ్య సమస్యలేమీ లేవని, కేవలం మధ్యంతర బెయిల్ కోసమే.. దర్శన్ అలా నాటకమాడాడు అనేలా కన్నడ సర్కిల్స్‌లో వార్తలు వైరల్ అవుతున్నాయి. అయితే ఆస్పత్రి నుండి డిశ్చార్జ్ అయిన దర్శన్.. నేరుగా ఉన్నత న్యాయస్థానానికి వెళ్లడం విశేషం. వాస్తవానికి అందరూ హాస్పిటల్ నుండి దర్శన్ తన భార్య విజయలక్ష్మి ఉంటున్న ఇంటికి వెళతారని అనుకున్నారు. కానీ, నేరుగా ఆయన కోర్టుకు వెళ్లడం అందరినీ ఆశ్చర్యపరిచింది.
అందుకు కారణం ఏమిటంటే.. బెయిల్ నివేదిక ప్రకారం, ఈ కేసులోని ముద్దాయిలకు బెయిల్ మంజూరు చేసే క్రమంలో కోర్టు ఇరు పక్షాల వాదనలను జాగ్రత్తగా పరిశీలించి, ఫైనల్‌గా బెయిల్ మంజూరు చేసింది. అయితే బెయిల్ నిబంధనల ప్రకారం, నిందితుడు తప్పనిసరిగా న్యాయమూర్తి ముందు హాజరై, బెయిల్ కండీషన్లపై సంతకం చేయాల్సి ఉండటంతో నేరుగా దర్శన్ కోర్టుకు వెళ్లినట్లుగా తెలుస్తుంది. అయితే ఇదే కేసులో బెయిల్ పొందిన ఏ1 పవిత్రా గౌడ, ఇంకొందరు నిందితులు మాత్రం ఇంకా అగ్రహార, శివమొగ్గ జైళ్లలోనే ఉన్నారు. వారికి బెయిల్ మంజూరు చేసిన పత్రాలు సోమవారం సాయంత్రం జైళ్లకు చేరుకోవడంతో.. వారు నేడు (మంగళవారం) విడుదలకానున్నారు. ఇందులో నిందితులుగా ఉన్న మరో ఇద్దరికి పూచీకత్తు ఇచ్చేందుకు ఎవరూ ముందుకు రాలేదని తెలుస్తోంది.
ఇక దర్శన్ విషయానికి వస్తే.. డిసెంబర్ 11న దర్శన్‌కు ఆపరేషన్ అంటూ డాక్టర్స్ కోర్టుకు నివేదికను అందజేశారు. కానీ ఆరోజున ఆపరేషన్ జరగలేదు. దర్శన్‌కు బీపీ ఎక్కువగా ఉన్నందున ఆపరేషన్‌ను వాయిదా వేస్తున్నట్లుగా తెలిపారు. కానీ దర్శన్‌కు ఆపరేషన్ చేయకపోతే.. ఆరోగ్య సమస్యలు ఎదురవుతాయని డాక్టర్స్ సూచించినా.. ఆపరేషన్ వద్దని దర్శన్ డిశ్చార్జ్ అయినట్లుగా సమాచారం. చిత్రదుర్గకు చెందిన దర్శన్ అభిమాని రేణుకాస్వామి హత్య కేసులో జూన్ 11న దర్శన్ అరెస్ట్ అయిన విషయం తెలిసిందే. దర్శన్‌తో పాటు, ఆయన స్నేహితురాలు పవిత్రా గౌడ సహా మరో 15 మందిని అరెస్ట్ చేశారు.
Also Read: బిగ్ బాస్ 8 విజేత నిఖిల్... అతని కంటే ముందు విన్నర్స్ ఎవరో గుర్తు ఉన్నారా? ఓ లుక్ వేయండి
టాప్ హెడ్ లైన్స్
ట్రెండింగ్ వార్తలు
