Anirudh Ravichandran : జెర్సీ' డైరెక్టర్ కోసం అనిరుద్ - చిన్న సినిమాకి 'దేవర' మ్యూజిక్ డైరెక్టర్ అభయం!

Anirudh : జెర్సీ మూవీ ఫేమ్ గౌతం తిన్ననూరి తెర్కెక్కిస్తున్న ఓ చిన్న సినిమాకి అనిరుద్ రవిచంద్రన్ మ్యూజిక్ అందిస్తున్నట్లు సమాచారం.

Photo Credit : గౌతమ్ తిన్ననూరి, అనిరుద్(Anirudh/Instagram)

Anirudh to compose music for Jersey director’s next: కోలీవుడ్ మ్యూజిక్ డైరెక్టర్ అనిరుద్ రవిచంద్రన్ పేరు ప్రస్తుతం పాన్ ఇండియా వైడ్ గా మారుమోగిపోతుంది. సౌత్ లో భారీ డిమాండ్ ఉన్న సంగీత దర్శకుల్లో ఒకడిగా పేరు తెచ్చుకున్న ఇతను గత ఏడాది షారుక్ ఖాన్ 'జవాన్' తో బాలీవుడ్లో భారీ సక్సెస్ అందుకున్నాడు. దీంతో అనిరుద్ క్రేజ్ నెక్స్ట్ లెవెల్ కి చేరుకుంది. అతను సినిమాకి మ్యూజిక్ అందిస్తున్నాడంటే చాలు అక్కడికే సగం సినిమా సక్సెస్ అయినట్లే లెక్క. అందుకే దర్శక నిర్మాతలు సైతం అతనితో పనిచేసేందుకు తెగ ఆసక్తి చూపిస్తున్నారు. 'అనిరుద్ కూడా అవకాశాలు వస్తున్నాయి కదా' అని ఓకే చెప్పకుండా కథ, క్యాస్టింగ్ నచ్చితే మాత్రమే 'ఎస్' చెబుతున్నాడు.

ప్రస్తుతం ఈ టాలెంటెడ్ మ్యూజిక్ డైరెక్టర్ టాలీవుడ్ భారీ పాన్ ఇండియా ప్రాజెక్ట్ అయిన ఎన్టీఆర్ 'దేవర'కి మ్యూజిక్ కంపోస్ట్ చేస్తున్న విషయం తెలిసిందే. దేవర కోసం తాను ఇవ్వబోయే మ్యూజిక్ ఏ రేంజ్ లో ఉంటుందో ఇప్పటికే గ్లింప్స్ వీడియో ద్వారా చూపించాడు. ప్రస్తుతం స్టార్ హీరోల సినిమాలకే మ్యూజిక్ కంపోజ్ చేస్తున్న అనిరుద్ ఇప్పుడు ఓ చిన్న సినిమాకి గ్రీన్ సిగ్నల్ ఇచ్చినట్లు తెలుస్తోంది. 'జెర్సీ' మూవీ ఫేమ్ గౌతమ్ తిన్ననూరి తెరకెక్కించే ఓ సినిమాకు అనిరుద్ మ్యూజిక్ అందిస్తున్నారట. గౌతమ్, సితార బ్యానర్ లో విజయ్ దేవరకొండతో ఓ సినిమా చేస్తున్న విషయం తెలిసిందే. విజయ్ దేవరకొండ ఫ్యామిలీ స్టార్ షూటింగ్ తో బిజీ అవడంతో ఈ ప్రాజెక్ట్ రెగ్యులర్ షూటింగ్ ఆలస్యం అవుతూ వచ్చింది.

ఫిబ్రవరిలో ఈ మూవీ షూటింగ్ మొదలుపెట్టబోతున్నారు. అందుకే నెలల తరబడి ఖాళీగా ఉండడం ఇష్టం లేక గౌతమ్ తిన్ననూరి ఈ లోపు కొత్త వాళ్ళతో ఒక చిన్న సినిమాను తీసేసాడు. చిత్రీకరణ కూడా దాదాపు పూర్తయిపోయిందట. ఈ చిన్న సినిమాకు అనిరుద్ మ్యూజిక్ అందించినట్లు సమాచారం. మరో ట్విస్ట్ ఏంటంటే పాటలన్నీ కొద్ది నెలల క్రితమే పూర్తి చేశాడట. ప్రస్తుతం బ్యాగ్రౌండ్ స్కోర్ త్వరగా ఫినిష్ చేసే పనిలో ఉన్నట్లు తెలిసింది. ప్రస్తుతం స్టార్ హీరోలు భారీ బడ్జెట్ సినిమాలకే మ్యూజిక్ కంపోస్ట్ చేసే అనిరుద్ ఈ చిన్న సినిమాకి పనిచేయడానికి కారణం గౌతమ్ తిన్ననూరితో ఉన్న ఫ్రెండ్షిప్ అని తెలుస్తుంది.

జెర్సీ మూవీ టైం నుంచి ఇద్దరు మధ్య మంచి ఫ్రెండ్షిప్ ఏర్పడింది. అందుకే ఆయన తెరకెక్కిస్తున్న ఈ సినిమాకి మంచి అవుట్ ఫుట్ ఇచ్చేందుకు అనిరుద్ ప్రయత్నిస్తున్నారు. ఇక ఈ సినిమాకు సంబంధించిన పూర్తి వివరాలను మేకర్స్ త్వరలోనే వెల్లడించే అవకాశం ఉంది. కాగా జెర్సీ తర్వాత గౌతమ్ తిన్ననూరి రామ్ చరణ్ తో సినిమా చేయాలనుకున్నాడు. కానీ ఆ ప్రాజెక్టు క్యాన్సిల్ అవడంతో ప్రస్తుతం విజయ్ దేవరకొండతో సినిమా చేస్తున్నాడు. ఈ సినిమాలో విజయ్ దేవరకొండ మొదటిసారి పోలీస్ ఆఫీసర్ గా కనిపించబోతున్నాడు.