Chandrabose Emotional: ‘నాటు నాటు’ పాటకు గోల్డెన్ గ్లోబ్ అవార్డు, ఎమోషన్ తో కన్నీళ్లు పెట్టుకున్న చంద్రబోస్

గోల్డెన్ గ్లోబ్ అవార్డుల వేదికపై ‘RRR’ సత్తా చాటింది. రెండు విభాగాల్లో నామినేట్ కాగా బెస్ట్ ఒరిజిన‌ల్ సాంగ్ కేట‌గిరీలో ‘నాటు.. నాటు..’ సాంగ్ అవార్డును దక్కించుకుంది.

Photo@boselyricist/Instagram

భారతీయ దిగ్గజ దర్శకుడు ఎస్ ఎస్ రాజమౌళి తెరెక్కించిన చిత్రం ‘RRR’. దేశ విదేశాల్లోనూ సంచనల విజయం సాధించింది. అంతర్జాతీయ స్థాయిలో ఇప్పటికే ఎన్నో అవార్డులను దక్కించుకున్నది. తాజాగా గోల్డెన్ గ్లోబ్ అవార్డుల్లోనూ అవార్డును అందుకుంది.  2 కేటగిరీల్లో అవార్డు కోసం పోటీ పడింది ఆర్ఆర్ఆర్. బెస్ట్ ఒరిజిన‌ల్ సాంగ్ కేట‌గిరీలో ‘నాటు.. నాటు..’ నామినేట్ అయ్యింది. బెస్ట్‌ నాన్ ఇంగ్లీష్‌ కేటగిరీలోనూ అవార్డు కోసం పోటీ పడింది. అయితే, బెస్ట్ ఒరిజిన‌ల్ సాంగ్ కేట‌గిరీలో ‘RRR’ అవార్డును దక్కించుకుంది. ఆ పాట‌కు సంగీతాన్ని అందించిన ఎంఎం కీర‌వాణి ఆ అవార్డును అందుకున్నారు.

And the GOLDEN GLOBE AWARD FOR BEST ORIGINAL SONG Goes to #NaatuNaatu #GoldenGlobes #GoldenGlobes2023 #RRRMovie

pic.twitter.com/CGnzbRfEPk

— RRR Movie (@RRRMovie) January 11, 2023

ఎమోషన్ తో కంటతడి పెట్టిన చంద్రబోస్

‘నాటు.. నాటు..’ సాంగ్ కు గోల్డెన్ గ్లోబ్ అవార్డు దక్కడం పట్ల ఆ పాట రచయిత చంద్రబోస్ ఎమోషన్ అయ్యారు. అవార్డు విన్నింగ్ తర్వాత ఓ జాతీయ చానెల్ తో మాట్లాడిన ఆయన.. తాను రాసిన పాట ఈ స్థాయికి చేరుకుంటుందని ఊహించలేదన్నారు. ఎంతో మంది అంతర్జాతీయ దిగ్గజాలను వెనక్కి నెట్టి ‘నాటు.. నాటు’ పాట ప్రతిష్టాత్మక అవార్డు అందుకోవం సంతోషంగా ఉందన్నారు. ఈ సందర్భంగా ఆయన ఆనంద భాష్పాలు రాల్చారు. తనకు పాట రాసే అవకాశం కల్పించిన సంగీత దర్శకుడు ఎంఎం కీరవాణికి, చిత్ర దర్శకుడు ఎస్ ఎస్ రాజమౌళికి ధన్యవాదాలు చెప్పారు. పాటను అద్భుతంగా పాటిన రాహుల్ సిప్లిగంజ్ తో పాటు వెండి తెరపై అద్భుతంగా డ్యాన్స్ చేసిన రామ్ చరణ్, జూ. ఎన్టీఆర్ సహా అందరికీ ఈ క్రెడిట్ దక్కుతుందన్నారు. తాను రాసిన ఈ పాటకు ఇంత ఘనత దక్కడం పట్ల తన కుటుంబ సభ్యులు సైతం ఎంతో సంతోషం వ్యక్తం చేస్తున్నారని చంద్రబోస్ వెల్లడించారు. అటు ఆస్కార్ అవార్డు విషయంలో ఇప్పుడే ఏమీ చెప్పలేమన్నారు. రావాలని ఆకాంక్షిస్తున్నట్లు తెలిపారు.

ప్రపంచ వ్యాప్తంగా సత్తా చాటిన ‘RRR’

ఇక 2022 మార్చి 24న విడుదలైన ‘RRR’ సినిమా ప్రపంచ వ్యాప్తంగా..  రూ.1200 కోట్ల కలెక్షన్‌స్ సాధించింది. స్వాతంత్ర్య సంగ్రామ నేపథ్యంలో వచ్చిన ఈ సినిమాకు దేశ వ్యాప్తంగా మంచి ప్రేక్షకాదరణ దక్కింది.  రామ్ చరణ్, జూనియర్ ఎన్టీఆర్‌ కీలక పాత్రలో పోషించిన ఈ సినిమాలో అజయ్‌ దేవ్‌గన్‌, శ్రియా శరణ్‌, ఆలియా భట్‌ అద్భుతంగా నటించి మెప్పించారు. జపాన్ లోనూ ఈ సినిమా సరికొత్త రికార్డులను నెలకొల్పింది. నిజానికి గోల్డెన్‌ గ్లోబ్‌ అవార్డులు అనేవి ఆస్కార్ కు పునాదిగా భావిస్తుంటారు. ఇక్కడ అవార్డులు అందుకున్న చాలా సినిమాలు ఆస్కార్ ను సైతం అందుకుంటాయి. ఈ నేపథ్యంలో ‘RRR’ సినిమాకు గోల్డెన్ గ్లోబ్ అవార్డు దక్కడంతో అస్కార్ అవార్డ్స్ వేదికపైనా సత్తా చాటుతుందని అందరూ భావిస్తున్నారు.   ఆస్కార్స్ లోనూ అవార్డును అందుకోవాలని సినీ ప్రముఖులతో పాటు సినీ అభిమానులు కోరుకుంటున్నారు.