Subhasree: కచ్చితంగా తిడతారు, నేను చాలామందికి ఆ సలహా ఇవ్వను: శుభశ్రీ

బిగ్ బాస్ సీజన్ 7 తెలుగులోకి ఎంటర్ అయిన తర్వాత శుభశ్రీ అంటే ఎవరో ప్రేక్షకులకు తెలుసు. కానీ ఇందులోకి ఎంటర్ అవ్వకముందు తన ప్రొఫెషనల్ కెరీర్‌కు సంబంధించి చాలా విశేషాలు ఉన్నాయి.

Image Credit: Subhasree/Twitter

ప్రస్తుతం బిగ్ బాస్ సీజన్ 7 తెలుగులో కంటెస్టెంట్స్‌గా వచ్చిన చాలామంది ప్రేక్షకులకు ముందు నుండి పరిచయం లేదు. శివాజీ, షకీలా లాంటి సీనియర్ నటీనటులు, అమర్‌దీప్, ప్రియాంక, శోభా శెట్టిలాంటి సీరియల్ నటీనటులు కాకుండా ఇతర కంటెస్టెంట్స్ గురించి బిగ్ బాస్ ప్రేక్షకులకు పెద్దగా తెలియదు. అందుకే వారి గురించి అంచనా వేయడానికి సమయం పడుతోంది. అలాంటి కంటెస్టెంట్స్‌లో ఒకరు శుభశ్రీ. తెలుగమ్మాయి కాకపోయినా తనవంతు తెలుగులో మాట్లాడే ప్రయత్నం చేస్తూ ఇప్పటికే చాలామంది ప్రేక్షకులను తన ఫ్యాన్స్‌గా మార్చుకుంది శుభశ్రీ. తాజాగా తన ప్రొఫెషనల్ లైఫ్‌లో దాటొచ్చిన కష్టాల గురించి తనొక ఇంటర్వ్యలో చెప్పిన విషయాలు వైరల్ అవుతున్నాయి.

డ్యాన్స్ నుండి యాక్టింగ్‌కు..
ముందుగా మోడల్‌గా తన కెరీర్‌ను ప్రారంభించిన శుభశ్రీ.. ఆ తర్వాత సినిమాల్లో నటిగా అడుగుపెట్టింది. అయితే తనకు అసలు యాక్టింగ్‌పై ఇంట్రెస్ట్ ఎలా వచ్చింది అని ప్రశ్నించగా.. ‘‘యాక్టింగ్ మీద ప్యాషన్ డ్యాన్స్‌తో మొదలయ్యింది. చిన్నప్పటినుండి నాకు డ్యాన్స్ అంటే చాలా ఇష్టం. హిప్‌హాప్, క్లాసికల్, బాలీవుడ్, టాలీవుడ్.. ఏదో ఒక మ్యూజిక్ ఉంటే నాకు డ్యాన్స్ చేయాలని ఉంటుంది. అందుకే ఒక డ్యాన్స్ క్లాసుకు వెళ్లడం మొదలుపెట్టాను. నా డ్యాన్స్ మాస్టర్ ఒకసారి కాళ్లు, చేతులతో కాదు.. మొహంలో డ్యాన్స్ చూపించు అన్నారు. అప్పుడు అర్థమయ్యింది. అప్పుడే యాక్టింగ్ అనేది వచ్చింది. అలా నాకు మెల్లగా యాక్టింగ్ మీద ఇంట్రెస్ట్ కూడా పెరిగింది.’’ అని తన ఇంట్రెస్ట్ డ్యాన్స్ నుండి యాక్టింగ్‌కు ఎలా మారిందో చెప్పుకొచ్చింది శుభశ్రీ.

థియేటర్స్‌లో వర్క్..
ముంబాయ్‌లో థియేటర్స్‌లో నటించిన అనుభవాలను గుర్తుచేసుకుంది శుభశ్రీ. ‘‘నేను క్లాప్ థియేటర్‌లో చాలా షోలు చేశాను. పృథ్వి థియేటర్‌లో చేశాను. థియేటర్ అంటే వారు వివిధ రకాల యాక్టింగ్ నేర్పిస్తారు. ఆ ట్రైనింగ్ అనేది నాకు చాలా సాయం చేసింది, వర్కవుట్ అయ్యింది. ఎందుకంటే ప్రతీసారి నేను ఏదో ఒక కొత్త విషయం నేర్చుకునేదాన్ని. వివిధ రకాల యాక్టింగ్‌తో పాటు స్టేజ్ ఫియర్ పోవడానికి కూడా అది చాలా ముఖ్యం.’’ అని తెలిపింది. అంతే కాకుండా శుభశ్రీ.. నటిగా మారకముందే ఒక హిందీ చిత్రంలో అసిస్టెంట్ డైరెక్టర్‌గా చేసిన విషయాన్ని బయటపెట్టింది.

హిందీ సినిమాకు అసిస్టెంట్ డైరెక్టర్‌గా..
‘మస్తీజాదే’ అనే హిందీ చిత్రానికి శుభశ్రీ అసిస్టెంట్ డైరెక్టర్‌గా పనిచేసింది. అసిస్టెంట్ డైరెక్టర్‌గా పనిచేయడం ద్వారా చాలా కొత్త విషయాలు తెలుసుకున్నానని చెప్పుకొచ్చింది. ‘‘సినిమాలో యాక్టింగ్ చేయాలంటే ఇవన్నీ నేర్చుకొని, ఒక ప్రక్రియలో వెళ్లాలని నాకు అర్థమయ్యింది. అసిస్టెంట్ డైరెక్షన్ చాలా కష్టంగా ఉంటుంది. నేను చాలామందికి అది సజెస్ట్ చేయను. అసిస్టెంట్ డైరెక్టర్ అంటే చాలా తిడతారు. ఎక్కువ పని ఉంటుంది. ఒక్క నిమిషం లేట్ అయినా చాలా తిడతారు. అన్నీ రెడీగా ఉండాలి, ఏ సమస్య రాకూడదు. అసిస్టెంట్ డైరెక్టర్స్‌ను చాలా గౌరవిస్తాను నేను. ఎందుకంటే అది చాలా కష్టం. అసలు సులువు కాదు. ఏది పోయినా మనదే బాధ్యత.’’ అంటూ తన కష్టాలను గుర్తుచేసుకుంది శుభశ్రీ.

Join Us on Telegram: https://t.me/abpdesamofficial