ఏందీ ఇంత పెద్ద సింగర్ ఇలా చేస్తున్నాడు - రేవంత్‌పై గీతూ కామెంట్స్, క్లాస్ పీకిన చంటి

‘బిగ్ బాస్’ హౌస్‌లో నామినేషన్స్ వేడి ఇంకా తగ్గలేదు. ఇంకా హౌస్ మేట్స్ దాని గురించే చర్చించుకుంటూ వాదోపవాదాలు చేసుకుంటున్నారు.

Image Credit: Star Maa/Disney Plus Hot Star

‘బిగ్ బాస్’ సీజన్-6 రంజుగా సాగుతోంది. హౌస్‌లో ఉన్న 21 మంది కంటెస్టెంట్ల మధ్య నిప్పు పెట్టి.. మనకు వినోదాన్ని పంచే పనిలో ‘బిగ్ బాస్’ ఉన్నాడు. అదేనండి.. నామినేషన్లతో హౌస్ మేట్స్‌కు నిద్రలేకుండా చేస్తూ హౌస్‌లో కుంపటి పెట్టాడు బిగ్ బాస్. దీంతో ఎవరూ తగ్గడం లేదు. నువ్వెంతంటే నువ్వెంత అన్నట్లుగా ఆరోపణలు చేసుకుంటున్నారు. ఇక నామినేషన్లో ఉన్నవారి పరిస్థితి మరింత దారుణం. వారు తమ బాధను ఎలా వ్యక్తం చేయాలో తెలియక సతమతం అవుతున్నారు. ముఖ్యంగా వచ్చిన వారం రోజులోనే ఇంటి నుంచి బయటకు వెళ్లిపోయే పరిస్థితి వారిని మరింత ఆందోళనకు గురిచేస్తోంది. తామంటే ఏంటో నిరూపించుకోడానికి కూడా తగిన సమయం లేకపోవడంతో నామినేషన్లో ఉన్న కంటెస్టెంట్లు తమ ఫ్రస్ట్రేషన్‌ను తమను నామినేట్ చేసినవారిపై చూపిస్తున్నారు. 

బుధవారం వెల్లడించిన నామినేషన్ల ప్రకారం.. చంటి, ఇనయా సుల్తానా, రేవంత్, ఫైమా, అభినయాశ్రీ, శ్రీసత్య, ఆరోహీలు ఈ వారం నామినేషన్లలో ఉన్నారు. శనివారం జరగబోయే ఎలిమినేషన్లలో వీరిలో ఒకరు లేదా ఇద్దరు బయటకు వెళ్లే అవకాశం ఉంది. అంటే డబుల్ ఎలిమినేషన్‌కు అవకాశం ఉందన్నమాట. దీంతో హౌస్ నుంచి బయటకు వెళ్లబోయే ఆ ఇద్దరు ఎవరనే ఆసక్తి నెలకొంది. తాజాగా రిలీజ్ చేసిన ప్రోమోలో బాలాదిత్య, రేవంత్‌లు నామినేషన్ల గురించి మాట్లాడుకుంటున్నారు. నామినేషన్లు ప్రతివారం జరిగేవేనని, జనాలేమీ నిన్ను తిట్టుకోవడం లేదని, కూల్‌గా ఉండమంటూ రేవంత్‌కు బాలాదిత్య క్లాస్ ఇస్తున్నట్లు కనిపించింది. ప్రతి వారం ఎవరో ఒకరు మరొకరిలో తప్పును చెప్పి నామినేట్ చేయాల్సి ఉంటుందని తెలిపాడు. ఆ తర్వాత శ్రీసత్యశ్రీ, ఇనయా మాట్లాడుకోవడం కనిపించింది. శ్రీసత్య మాట్లాడుతూ.. బుర్రలో మంచిగా ఉంటే నోరు మంచిగా మాట్లాడుతుంది. అక్కడ చిరాగ్గా ఉంటే నోటి నుంచి చిరాకైనా మాటలు వస్తాయని తెలిపింది.

ఆ తర్వాత ఇనయా, బాలాదిత్య మధ్య వాగ్వాదం జరిగింది. ‘‘ఎందుకు నన్ను ఇంతగా టార్గెట్ చేసుకుంటున్నారు’’ అని ఇనయా అడిగిన ప్రశ్నకు బాలాదిత్య ‘‘మీ బుర్రలో నా గురించి మీరు ఏమనుకుంటున్నారో, నేను మీకు ఎలా చెబితే మీకు నచ్చుతుందనేది.. నేను స్కాన్ చేసి, స్కెచ్ వేసి, ప్లాన్ వేసి మాట్లాడలేను’’ అని అన్నాడు. ఏదైనా ముఖం మీద చెబితే నేను ఫైట్‌కు సిద్ధమే అని ఇనయా సమాధానం ఇచ్చింది. ఇందుక బాలాదిత్య స్పందిస్తూ.. ‘‘నేను ఫైట్ సిద్ధం కాదు చెల్లి’’ అని అన్నాడు. 

మరోవైపు చంటి.. గీతూకు క్లాస్ పీకుతూ కనిపించాడు. ‘‘భగవంతుడు చెవులెందుకు ఇచ్చాడు. ఎక్కువ విని, తక్కువ మాట్లాడాలి’’ అన్నాడు. గీతూ రేవంత్ గురించి మాట్లాడుతూ.. ‘‘రేవంత్ ఎంత త్వరగా వెళ్లిపోతే అంత మంచిది ఆయనకే. ఆయన హౌస్‌లో ఇంకొన్నాళ్లు ఉన్నాడంటే.. జనాలంతా ఏందీ ఇంత పెద్ద సింగర్ ఇట్లా చేస్తున్నాడని అనిపిస్తుంది’’ అని కామెంట్ చేసింది. 

Also Read: ‘బిగ్ బాస్’ సీజన్-6లో ఈసారి గట్టి పోటీయే, ఈ కంటెస్టెంట్లలో మీ ఫేవరెట్ ఎవరు?