Bigg Boss 5 Telugu: బిగ్ బాస్-5: సీక్రెట్ రూమ్‌కు లోబో.. హౌస్‌మేట్స్ మరీ అంత పిచ్చోళ్లా పెద్దాయనా??

‘బిగ్ బాస్’ సీక్రెట్ రూమ్ బిగ్ ఫ్లాప్ షోనా? ఈ వారం ఎలిమినేట్ అయ్యేది శ్వేత వర్మనా?

Image Credit: Star Maa/Hotstar

‘బిగ్ బాస్ -5’.. సీజన్ల తర్వాత సీజన్లు వస్తున్నాయి గానీ, టాస్కులు.. స్కిట్లలో మాత్రం మార్పులు ఉండటం లేదు. దీంతో సభ్యులు మారుతున్నారేగానీ.. మళ్లీ మళ్లీ అవే చూస్తున్న ఫీలింగ్ కలుగుతోంది. పైగా.. బిగ్ బాస్ హౌస్‌లోకి ఎంటరవుతున్న సభ్యులు కూడా అప్పటికే అన్ని సీజన్లు నమిలి మింగేశారు. దీంతో బిగ్ బాస్ పెట్టే ప్రతి టాస్క్, ప్రతి అడుగు గురించి వారికి పూర్తి అవగాహన ఉంది. ముఖ్యంగా ఆర్జే కాజల్‌కు.. ‘బిగ్ బాస్’ గురించి ప్రత్యేకంగా చెప్పక్కర్లేదు. తాను ఏం చేస్తే ప్రేక్షకులు చూస్తారు.. ఏం చేస్తే.. బిగ్ బాస్‌లో తన ఎపిసోడ్ ప్రసారమవుతుందో తెలుసు. 

మిగతా సభ్యులకు ‘బిగ్ బాస్’ గురించి పూర్తి అవగాహన ఉంది. అలాంటివారికి ఊహించని ట్విస్ట్ ఇవ్వాల్సిన బిగ్ బాస్.. రొటీన్ ఫార్ములాను ప్రయోగించాడు. శనివారం ఎలిమినేషన్ అంటూ షాకిచ్చినా.. లోబోను బయటకు తీసుకెళ్లి.. సీక్రెట్ రూమ్‌కు పంపించారు. పైగా స్టేజ్ మీదకు రాగానే.. లోబోతో సభ్యుల గురించి పాజిటీవ్, నెగటీవ్ అభిప్రాయాలను కూడా చెప్పించలేదు. దీంతో హౌస్‌మేట్స్‌కు కూడా లోబో బయటకు వెళ్లడం లేదని అర్థమైపోయింది. అయితే, వారికి ఏమీ తెలియనట్లు డ్రామా నటిస్తున్నట్లు స్పష్టమవుతోంది. లోబో తమని సీక్రెట్ రూమ్ నుంచి గమనిస్తున్నాడనే సందేహం కూడా వారికి కలిగినట్లు కనిపిస్తోంది.

బిగ్ బాస్-4 తరహాలోనే..: గత సీజన్ తరహాలోనే ఈసారి కూడా సీక్రెట్ రూమ్ ఫార్ములా ఉపయోగించాడు. అప్పట్లో కూడా ఇంట్లో అర్హత లేని సభ్యుడిని ఎంపిక చేయాలని, వారిని బయటకు పంపే నిర్ణయం మీదేనంటూ బిగ్ బాస్ చెప్పడం.. ఫలితంగా అఖిల్ సీక్రెట్ రూమ్‌కు వెళ్లడం జరిగింది. అదే సీన్ ఈ సీజన్‌లో కూడా రిపీట్ అయ్యింది. అయితే, అఖిల్-అభి వల్ల సీక్రెట్ టాస్క్ చాలా ఆసక్తికరంగా సాగింది. అయితే, లోబో సీక్రెట్ రూమ్‌కు వెళ్లడం వల్ల బిగ్ బాస్‌కు పెద్ద లాభం ఉండదని.. అతడి బదులు మానస్ లేదా శ్రీరామ చంద్ర సీక్రెట్ రూమ్‌కు వెళ్లి ఉంటే రక్తికట్టేదని అంటుున్నారు. ఈ సీజన్‌లో సీక్రెట్ రూమ్ పెద్ద ఫ్లాప్ అని కూడా కామెంట్లు చేస్తున్నారు. తప్పకుండా కాజల్ ఇప్పటికే అందరి చెవుల్లో ఈ విషయాన్ని ఉదేసి ఉంటుందని ప్రేక్షకులు అంటున్నారు. 

శ్వేత ఔట్: ‘బిగ్ బాస్ -5’ హౌస్‌లో అడుగుపెట్టిన రోజు నుంచి తల్లీ-కూతుళ్లుగా ప్రేమను వలకబోస్తున్న యానీ మాస్టర్, శ్వేత వర్మలకు ఇటీవల బిగ్ బాస్ గొడవలు పెట్టాడు. బొమ్మల టాస్క్‌లో యానీ మాస్టర్, శ్వేత మధ్య పెద్ద వారే జరిగింది. గత టాస్క్‌లో ఫ్రెండ్ పోయాడు, ఈ సారి బిడ్డ పోయిందంటూ యానీ భావోద్వేగానికి గురయ్యారు. ఆదివారం జరిగే ఎలిమినేషన్‌లో శ్వేత.. తన ఇంటికి వెళ్లేందుకు బట్టలు సర్దేసుకోనున్నట్లు తెలిసింది. ఈ వారం ఆమె ఎలిమినేట్ అవుతుందనేది పక్కా సమాచారం. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి