Anni Manchi Sakunamule: ఈ వేసవికి చల్లని చిరుగాలిలాంటి మూవీ - తిరుపతిలో 'అన్నీ మంచి శకునములే’ టీమ్ సందడి

Anni Manchi Sakunamule : డైరెక్టర్ నందిని రెడ్డి దర్శకత్వం వహించిన రొమాంటిక్ ఎంటర్టైనర్ చిత్రం 'అన్నీ మంచి శకునములే'. సంతోష్ శోభన్, మాళవిక నాయర్ ప్రధాన పాత్రల్లో నటించిన ఈ సినిమాను స్వప్న సినిమా బ్యానర్‌పై ప్రియాంక దత్ నిర్మించారు. ఈ నేపథ్యంలో మూవీ ప్రమోషన్స్ లో భాగంగా చిత్ర బృందం ఇటీవల తిరుపతిలోని ఓ ప్రైవేటు హోటల్ లో మీడియా సమావేశం నిర్వహించారు. ఈ సందర్భంగా సినిమాకు సంబంధించిన విషయాలను పంచుకున్నారు.

సరికొత్త సినిమాతో ప్రేక్షకుల మదిని దోచుకునే విధంగా 'అన్నీ మంచి శకునములే' సినిమాను రూపొందించామని  డైరెక్టర్ నందినీ రెడ్డి అన్నారు. 'అన్నీ మంచి శకునములే' సినిమా ప్రేమ కథా చిత్రంగా, కుటుంబ సభ్యులతో కలిసి చూడగలిగే చిత్రంగా తెరకెక్కించామని, వైరెటీ స్టోరీతో  ప్రేక్షకుల మదిని దోచుకునే విధంగా సీన్స్ ను మలిచామని చెప్పారు. దానికి తోడు ఈ సినిమాలో చాలా మంది సీనియర్ నటీనటులు నటించడం మూవీకి మరో ప్లస్ పాయింటన్నారు. ఈ మూవీలో ఆహ్లాదకరమైన సన్నివేశాలతో పాటు ఎమోషనల్ సీన్స్ కూడా ఉంటాయని స్పందించారు.

ఇక ఈ సినిమాకు సంగీతం అందించిన మిక్కీ జై మేయర్.. ఈ సినిమాలో రాజేంద్రప్రసాద్, నరేష్, గౌతమి కన్నడ యాక్టర్ అంజు, వాసుకి, రావు రమేష్, వెన్నెల‌కిషోర్ లు నటించారని చెప్పారు. మూవీలోని పాటలకు ఇప్పటికే మంచి రెస్పాన్స్ వచ్చిందని, ఈ‌ సినిమా ప్రమోషన్ కోసం‌ విజయవాడ, గుంటూరుతో పాటు తిరుపతి, చిత్తూరు, కర్నూలులో పాల్గొన్నానని చెప్పారు.

అనంతరం మూవీ ప్రమోషన్లో పాల్గొన్న  హీరో సంతోష్ శోభన్ మాట్లాడుతూ.. చాలా సార్లు తిరుమలకు నడుచు‌కుంటూ వచ్చానని, తను నటించిన సినిమా టీంతో కలిసి మొదటిసారి తిరుపతికి రావడం చాలా మంచి శకునముగా భావిస్తున్నట్లు తెలిపారు. డైరెక్టర్ నందినీ నేతృత్వంలో వచ్చిన ఈ అద్భుతమైన సినిమాలో నటించడం చాలా సంతోషంగా ఉందన్న శోభన్... ఈ‌సినిమాను ప్రేక్షకులు ఆదరించాలని కోరారు. తాను రీసెంట్ గా నటించిన 'పలానా అబ్బాయి పలానా అమ్మాయి' చిత్రం విడుదలైందని, దాంతో పాటు 'అన్ని మంచి శకునములే' సినిమాలో చాలా సీనియర్ నటులతో కలిసి నటించడం చాలా సంతోషం కలిగించిందని హీరోయిన్ మాలవిక నాయర్ చెప్పారు. షావుకారమ్మతో కలిసి రెండోసారి నటించానని ఆమె తెలిపారు.

ఈసారి వేసవికి చల్లని చిరుగాలి అంటూ ఊరిస్తున్న చిత్రం ‘అన్నీ మంచి శకునములే’ సినిమాలోని పాటలు, మూవీ పోస్టర్ సినిమా పేరుకు తగ్గట్టే ఆహ్లాదంగా ఉండడంతో సినీ ప్రేక్షకులు ఆసక్తిగా ఎదురుచూస్తున్నారు. ‘ఏప్రిల్‌ 20న మీట్‌ రిషి– ఆర్య ఇన్‌ ఇటలీ’ అంటూ ఓ వీడియో ద్వారా మూవీ రిలీజ్ డేట్ ను చిత్ర బృందం అనౌన్స్ చేసింది. మే18న ప్రేక్షకుల ముందుకు రాబోతున్న వెల్లడించింది. ఫీల్‌ గుడ్‌ ఎమోషన్స్‌తో ఫ్యామిలీ ఎంటర్‌టైనర్‌గా రూపొందిన చిత్రం విభిన్న మనస్తత్వాలు కలిగిన ఇద్దరి వ్యక్తుల మధ్య అందమైన బంధం ఎలా ఏర్పడిందని చెప్పడమే ఈ మూవీ కథాంశంగా తెలుస్తోంది. ఇప్పటి వరకు రిలీజ్ చేసిన ఈ మూవీలోని రెండు పాటలకు పాజిటివ్ రెస్పాన్స్ వచ్చింది.

Also Read : 'ప్రేమ విమానం'లో అనసూయ - ఇంకా సంగీత్ & శాన్వి