Cop elopes with history sheeter : ఖాకీ ప్రేమ.. ఖైదీతో పరార్- పెళ్లి పీటల మీద పోలీస్ వరుడికి షాకిచ్చిన మహిళా కానిస్టేబుల్!
Meerut: ఒక మహిళా కానిస్టేబుల్, తన పెళ్లిని అర్ధాంతరంగా ఆపేసి ఒక మోస్ట్ వాంటెడ్ క్రిమినల్తో పరారైంది. పోలీసు అయిన పెళ్లి కొడుకు పెళ్లి మండపంలో ఎదురుచూస్తూ ఉండిపోవాల్సి వచ్చింది.
Woman cop elopes with history sheeter: యూపీలోని మీరట్లో ఓ మహిళా పోలీసు..మరో పోలీసు అధికారి పెళ్లి జరుగుతోంది. పెళ్లికొడుకు వచ్చి మండపంలో ఉన్నాడు కానీ పెళ్లి కూతురు రాలేదు. తర్వాత అసలు విషయం తెలిసింది.. మోస్ట్ వాంటెడ్ క్రిమినల్ తో ఆ మహిళా పోలీసు పెళ్లికుమార్తె వెళ్లిపోయిందని.
మీరట్కు చెందిన ప్రీతి అనే మహిళా కానిస్టేబుల్ వివాహం మరో కానిస్టేబుల్తో ఘనంగా నిశ్చయమైంది. బంధుమిత్రుల కోలాహలం, మంగళ వాయిద్యాల మధ్య పెళ్లి కొడుకు ఊరేగింపుగా మండపానికి చేరుకున్నాడు. మరో కొద్ది నిమిషాల్లో పెళ్లి తంతు మొదలవ్వాల్సి ఉండగా, ముస్తాబైన వధువు గదిలో లేకపోవడంతో కలకలం రేగింది. తన కోసం తాళి పట్టుకుని ఎదురుచూస్తున్న వరుడిని, కుటుంబ గౌరవాన్ని గాలికి వదిలేసి ఆమె తన ప్రియుడితో కలిసి పరారైంది.
రంగంలోకి దిగిన పోలీసులు అసలు విషయం తెలుసుకుని అవాక్కయ్యారు. ప్రీతి సామాన్యుడితో కాదు, మీరట్ ప్రాంతానికి చెందిన కరుడుగట్టిన హిస్టరీ షీటర్ నవీన్ అనే నేరస్థుడితో ప్రేమలో ఉన్నట్లు తేలింది. నవీన్పై హత్యలు, దోపిడీలు, కిడ్నాప్లు వంటి అనేక కేసులు ఉన్నాయి. గతంలో ఒక కేసు విచారణ నిమిత్తం నవీన్ను కోర్టుకు తీసుకెళ్లే సమయంలో కానిస్టేబుల్గా ఉన్న ప్రీతికి అతనితో పరిచయం ఏర్పడింది. ఆ పరిచయం కాస్తా గాఢమైన ప్రేమగా మారి, చివరకు ఆమెను ఈ సాహసానికి పురికొల్పింది.
ప్రారంభంలో ప్రీతిని ఎవరైనా కిడ్నాప్ చేశారేమోనని కుటుంబ సభ్యులు కంగారు పడ్డారు. కానీ, ఆమె తన ఇష్టపూర్వకంగానే నవీన్తో వెళ్లినట్లు పోలీసుల ప్రాథమిక దర్యాప్తులో వెల్లడైంది. నవీన్ తన గ్యాంగ్తో కలిసి మండపం సమీపానికి రాగా, ప్రీతి పెళ్లి దుస్తుల్లోనే దొడ్డిదారిలో వెళ్లి వారి వాహనం ఎక్కి వెళ్లిపోయింది. తన వృత్తిని, బాధ్యతను పక్కన పెట్టి ఒక నేరస్థుడి నీడను కోరుకోవడం పోలీసు శాఖలో చర్చనీయాంశంగా మారింది.
మరోవైపు పెళ్లి కొడుకు పరిస్థితి వర్ణనాతీతంగా మారింది. పెళ్లి పీటల మీద వధువు చేసిన ఈ పనితో వరుడి కుటుంబం తీవ్ర అవమానానికి గురైంది. చట్టాన్ని కాపాడాల్సిన చేతులే ఒక క్రిమినల్తో చేతులు కలపడం అత్యంత దారుణం అని వారు ఆవేదన వ్యక్తం చేస్తున్నారు. ఆ చుట్టుపక్కల గ్రామాల ప్రజలు కూడా ఈ వింత ప్రేమకథను విని ముక్కున వేలేసుకుంటున్నారు. సమాజానికి ఆదర్శంగా ఉండాల్సిన కానిస్టేబుల్ ఇలా చేయడంపై ఆగ్రహం వ్యక్తమవుతోంది.
శాఖ ప్రతిష్టను మంటగలిపిన ప్రీతిపై ఉన్నతాధికారులు కఠిన చర్యలకు సిద్ధమయ్యారు. ఆమెను సస్పెండ్ చేయడమే కాకుండా, ఒక నేరస్థుడికి సహకరించినందుకు ఆమెపై కూడా కేసు నమోదు చేసే అవకాశం ఉంది. ప్రస్తుతం నవీన్, ప్రీతి కోసం ప్రత్యేక బృందాలు మీరట్ సహా సరిహద్దు ప్రాంతాల్లో గాలిస్తున్నాయి. ఈ వింత ప్రేమకథ చివరకు ఎలాంటి ముగింపునకు చేరుకుంటుందోనని అందరూ ఉత్కంఠగా ఎదురుచూస్తున్నారు.
టాప్ హెడ్ లైన్స్
ట్రెండింగ్ వార్తలు
