Vizianagaram Crime Report: విజయనగరంలో గంజాయి కల్చర్‌, వివాహేతర సంబంధాలతో హత్యలు - క్రైమ్ రిపోర్ట్ @2022

విజయనగరంలోనూ నేరాలు పెరిగిపోతున్నాయి. గంజాయి అక్రమ రవాణదారులపై 2021లో 32 కేసులు నమోదుకాగా.. 2022లో 50 కేసులు నమోదు చేసి, 89మందిని అరెస్టు చేశారు.

విజయనగరంలో ‘గంజాయి’ కల్చర్‌ - సైబర్‌ నేరాలూ అధికం

ప్రశాంతతకు మారుపేరైన విజయనగరంలోనూ నేరాలు పెరిగిపోతున్నాయి. గతంలో ఎన్నడూ లేని ‘మత్తు’ కల్చర్‌ పెరుగుతోంది. గంజాయి రవాణాతోపాటు, వినియోగమూ అధికమవ్వడం.. ఇందులో యువతే ఎక్కువగా ఉండటం ఆందోళన కలిగించే అంశం. 2022లో 50 గంజాయి రవాణా కేసులు నమోదై.. ఏకంగా 89 మంది అరెస్టయ్యారు. దీంతోపాటు సైబర్‌ నేరాలు, హత్యలు, హత్యాయత్నాలు పెరిగిపోతున్నాయి. 2022 సంవత్సరానికి సంబంధించి జిల్లాలో నేరాల తీరుపై ఎస్పీ ఎం.దీపిక వార్షిక నివేదికను వెల్లడిరచారు. గంజాయి అక్రమ రవాణదారులపై 2021లో 32 కేసులు నమోదుకాగా.. 2022లో 50 కేసులు నమోదు చేసి, 89మందిని అరెస్టు చేశారు. వీరి వద్ద నుంచి 3,180.855 కిలోల గంజాయిని స్వాధీనం చేసుకున్నారు. 

గంజాయి వినియోగిస్తున్న వారిపైనా 24 కేసులు నమోదు చేశారు. మహిళలపై జరిగిన అఘాయిత్యాలకు సంబంధించి 2021లో అత్యాచారం కేసులు 76 నమోదుకాగా, 2022లో ఈ తరహా నేరాలు 34 శాతం తగ్గి, 50 కేసులు మాత్రమే నమోదయ్యాయి. మహిళల గౌరవానికి భంగం కలిగించే కేసులు 2021లో 218 నమోదుకాగా, 2022లో 19శాతం తగ్గి, 176 కేసులు నమోదయ్యాయి. 2021లో పోక్సో కేసులు 71 నమోదు కాగా, 2022లో వాటి సంఖ్య 38శాతం తగ్గి, 44 కేసులు మాత్రమే నమోదయ్యాయి. 

హత్యల్లో ఎలా ఉందంటే..
2021లో 24 హత్యలు జరగా, 2022లో 23 హత్య కేసులు నమోదయ్యాయి. హత్యల్లో చాలా వరకు వివాహేతర సంబంధాలే కారణం కావడం గమనార్హం. 2021లో లాభాపేక్ష హత్యలు 3 నమోదు కాగా, 2022లో ఎటువంటి కేసూ నమోదు కాలేదు. 2021లో దోపిడీ కేసులు 10 నమోదు కాగా, 2022లో 4 దోపిడీ (రోబరీ) కేసులు నమోదయ్యాయి. హత్యాయత్నం కేసులు 2021లో 35 కేసులు ఉండగా.. 2022లో 12 హత్యాయత్నం కేసులే ఉన్నాయి. 2021లో 69మంది పిల్లలు తప్పిపోగా, 2022లో 82మంది తప్పిపోయారు. వంద శాతం వారిని కనుగొని తల్లిదండ్రులకు, సంరక్షకులకు అప్పగించారు. ఆస్తికి సంబంధించిన నేరాల్లో 2022లో 1,64,35,352/-ల విలువైన ఆస్తులు చోరీకి గురి కాగా, వాటిలో 85శాతం రికవరీతో రూ.1,39,02,852/- ల విలువైన ఆస్తులను తిరిగి స్వాధీనం చేసుకున్నారు. 

గతం కంటే పెరిగిన సైబర్‌ నేరాలు
మారుతున్న కాలానికి అనుగుణంగా మోసగాళ్లు కూడా తమ పంథాను మారుస్తున్నారు. కొత్త తరహా మోసాలకు పాల్పడుతున్నారు. అందుకు ఉదాహరణే జిల్లాలో పెరుగుతున్న సైబర్‌ నేరాలు. సైబరు నేరాలకు సంబంధించి 2022లో 139 కేసులు నమోదయ్యాయన్నారు. గతేడాది ఆ సంఖ్య 105గా ఉంది. సైబరు నేరాల నియంత్రణకు మహిళా పోలీసులతో ప్రత్యేకంగా అవగాహన కార్యక్రమాలు చేపట్టి, డోర్‌ టూ డోర్‌ వెళ్లి అవగాహన కల్పిస్తున్నట్లు ఎస్పీ తెలిపారు. నేరం జరిగిన తరువాత ఫిర్యాదు చేయడం పట్ల అవగాహన కల్పించడం వల్ల కేసుల నమోదు సంఖ్య గత ఏడాది కంటే పెరిగిందని ఆమె చెప్పారు. 

తగ్గిన రోడ్డు ప్రమాదాలు
2021లో రహదారి ప్రమాదాల్లో 222 కేసులు నమోదై, 238 మంది మృతి చెందారు. 2022లో పోలీసు శాఖ చేపట్టిన భద్రత చర్యల ఫలితంగా 10శాతం తగ్గి 216 కేసులు నమోదు కాగా, మృతుల సంఖ్య తొమ్మిది శాతం తగ్గి, 216 మంది మృతి చెందారు. 2022లో డిస్పోజ్‌ అయిన కేసుల్లో 60శాతం నిందితులకు శిక్షలు ఖరారయ్యాయి. 6,171 కేసులు 2022లో డిస్పోజ్‌ కాగా, వాటిలో 3,698 కేసుల్లో నిందితులను శిక్షించారు. జిల్లా వ్యాప్తంగా సారా ప్రభావిత 77 గ్రామాలను గుర్తించి, ఆయా గ్రామాల్లో పూర్తిగా సారాను నిర్మూలించేందుకు చర్యలు చేపట్టారు. ఇందులో భాగంగా 79 కుటుంబాలను గుర్తించి, వారికి ప్రత్యామ్నాయ ఉపాధి కల్పనకు రూ.43.31 లక్షల ఆర్ధిక సహాయాన్ని 121 మందికి అందించారు. 

ముఖ్యమైన కేసుల ఛేదన ఇలా.. 
ఈ ఏడాది ఫిబ్రవరిలో రవి జ్యూవలరీ షాపులో చోరీ జరిగింది. ఈ నేరాన్ని 24 గంటల వ్యవధిలో ఛేదించి 1.180 కిలోల బంగారు ఆభరణాలను రికవరీ చేశారు. మరో కేసులో మోటారు సైకిలు డిక్కీ నుంచి దొంగిలించిన రూ.5.30 లక్షల నగదును 48 గంటల్లోనే ఛేదించారు. పూసపాటిరేగ పోలీసు స్టేషను పరిధిలో హత్య కేసును రోడ్డు ప్రమాదంగా చిత్రీకరించేందుకు నిందితులు చేసిన ప్రయత్నాన్ని భగ్నం చేసి, నిందితులను అరెస్టు చేసి, హత్య మిస్టరీని ఛేదించామని జిల్లా ఎస్పీ ఎం.దీపిక తెలిపారు.