Hyderabad Crime News: పెళ్లి కావడం లేదని బిల్డింగ్ పైనుంచి దూకి ఆత్మహత్య, హైదరాబాద్లో ఘటన
Tragedy in Hyderabad | తనకు వివాహం కావడం లేదని మనస్తాపానికి లోనైన 30 ఏళ్ల యువకుడు బిల్డింగ్ పైనుంచి దూకి ఆత్మహత్య చేసుకున్నాడు. హైదరాబాద్ లోని అత్తాపూర్లో ఈ ఘటన జరిగింది.
Depression Suicide cases | హైదరాబాద్: ఇటీవల ఓ యువతి వివాహం కావడం లేదని సూసైడ్ చేసుకుంది. అలాంటి మరో ఘటనే నగరంలో జరిగింది. పెళ్లి కావడం లేదని మనస్తాపంతో ఓ యువకుడు బిల్డింగ్ పైనుంచి దూకి ప్రాణాలు తీసుకున్నాడు. హైదరాబాద్లోని అత్తాపూర్ ఏరియాకు చెందిన ప్రవీణ్ (30) అనే యువకుడికి పెళ్లి కావడం లేదు. వయసు పెరుగుతున్నా పెళ్లి కాకపోవడం, ఎన్ని సంబంధాలు చూసినా సెట్ కాకపోవడంతో డిప్రెషన్లోకి వెళ్లినట్లు తెలుస్తోంది.
స్నేహితులకు పెళ్లిళ్లు అయిపోతున్నాయి, నీ పెళ్లి ఎప్పుడు అని యువతీయువకులకు ప్రశ్నలు ఎదురవుతుంటాయి. కొన్ని సందర్భాలలో ఏం చేస్తున్నాం, ఎందుకీ జీవితం అని యువత ఆలోచిస్తున్నారు. నగరంలో యువకుడి పరిస్థితి అదే. పెళ్లి విషయంలో ప్రవీణ్ గత కొన్ని రోజులుగా తీవ్ర ఆవేదనకు గురవుతున్నాడు. ఈ క్రమంలో మనస్తాపం చెందిన అతను ఆదివారం మధ్యాహ్నం 20 అంతస్తుల బిల్డింగ్ మీదకు వెళ్లి, అక్కడ నుంచి కిందకు దూకేశాడు. తీవ్ర గాయాలైన ప్రవీణ్ అక్కడికక్కడే మృతి చెందాడు. సమాచారం అందుకున్న పోలీసులు అక్కడికి చేరుకుని ప్రవీణ్ మృతదేహాన్ని స్వాధీనం చేసుకున్నారు. కేసు నమోదు చేసిన పోలీసులు విచారణ చేపట్టారు. పెళ్లి కావడం లేదని డిప్రెషన్ లోకి వెళ్లడమే ఆత్మహత్యకు కారణమని భావిస్తున్నారు.
డిప్రెషన్ లేదా మానసిక ఒత్తిడితో బాధపడుతున్న వారికి సహాయం చేయడానికి, ఆత్మహత్యలను నివారించడానికి పలు స్వచ్ఛంద సంస్థలు ఉచిత హెల్ప్లైన్ నంబర్ల ద్వారా సేవలు అందిస్తున్నారు. ఎవరైనా ఇబ్బందుల్లో ఉన్నప్పుడు ఈ క్రింది నంబర్లలో సంప్రదించవచ్చు:
మానసిక ఆరోగ్య సహాయ కేంద్రాలు
నేషనల్ హెల్ప్లైన్ (Tele-MANAS): కేంద్ర ప్రభుత్వం ప్రారంభించిన ఈ సేవలు 24 గంటలూ అందుబాటులో ఉంటాయి.
నెంబర్: 14416 లేదా 1800 891 4416
రోష్ని (Roshni) - హైదరాబాద్: డిప్రెషన్, ఆత్మహత్య ఆలోచనలు ఉన్నవారికి కౌన్సెలింగ్ ఇచ్చే ప్రముఖ సంస్థ. 040-66202000 లేదా 040-66202001 లలో సంప్రదించి సహాయం కోరవచ్చు.
ఆసరా (Aasra): ఇది 24/7 అందుబాటులో ఉండే ఉచిత సేవా కేంద్రం. 98204 66726 నెంబర్ కు కాల్ చేసి సేవలు పొందవచ్చు.
వన్లైఫ్ (OneLife): నెంబర్ 78930 78930కు కాల్ చేసి సమస్య చెబితే వారిని చెడు ఆలోచనల నుంచి బయటకు తీసుకొస్తారు.
ముఖ్యంగా అలాంటి సమయంలో ఒంటరిగా ఉండకండి. మీ మనసులో బాధను లేదా ఆందోళనను క్లోజ్ ఫ్రెండ్స్, కుటుంబ సభ్యులతో కానీ పంచుకోవాలి. డిప్రెషన్ అనేది ఒక అనారోగ్యం మాత్రమే. దీనికి మంచి సైకాలజిస్ట్ లేదా సైకియాట్రిస్ట్ దగ్గర చికిత్స తీసుకుంటే త్వరగా కోలుకోవచ్చు. ఎవరైనా ప్రాణాపాయ స్థితిలో ఉన్నట్లు గమనిస్తే అవసరాన్ని బట్టి వెంటనే 100 లేదా 108 (అంబులెన్స్) కి సమాచారం అందించండి.
టాప్ హెడ్ లైన్స్
ట్రెండింగ్ వార్తలు
