IBomma Ravi gets bail: ఐబొమ్మ రవికి బెయిల్ - ఇంటర్నెడ్ వాడకూడదని షరతు
Ravi Bail: ఐబొమ్మ రవికి బెయిల్ లభించింది. అయితే విదేశాలకు వెళ్లకూడదని.. ఇంటర్నెట్ వాడకూడదని కోర్టు షరతులు విధించింది.
I Bomma Ravi granted conditional bail: సినిమా పైరసీ ప్రపంచంలో సంచలనం సృష్టించిన ఐబొమ్మ (iBomma) వెబ్‌సైట్ నిర్వాహకుల్లో ఒకరైన రవికి ఎట్టకేలకు ఊరట లభించింది. గత కొంతకాలంగా సినిమా పైరసీ కేసులో అరెస్టై రిమాండ్‌లో ఉన్న ఆయనకు న్యాయస్థానం షరతులతో కూడిన బెయిల్ మంజూరు చేసింది. తెలుగు సినీ పరిశ్రమను కుదిపేసిన ఈ పైరసీ వ్యవహారంలో రవి పాత్రపై లోతైన విచారణ జరిపిన పోలీసులు, పక్కా ఆధారాలతో అతడిని అరెస్ట్ చేశారు.
కఠినమైన షరతులు విధించిన కోర్టు
బెయిల్ మంజూరు చేసినప్పటికీ, కోర్టు అత్యంత కఠినమైన ఆంక్షలను విధించింది. నిందితుడు రవి ప్రతిరోజూ హైదరాబాద్ సెంట్రల్ క్రైమ్ స్టేషన్ (CCS) అధికారుల ముందు హాజరై సంతకం చేయాలని న్యాయమూర్తి ఆదేశించారు. విచారణకు పూర్తిస్థాయిలో సహకరించాలని, సాక్ష్యాలను తారుమారు చేసే ప్రయత్నం చేయకూడదని కోర్టు స్పష్టం చేసింది.
ఇంటర్నెట్ వాడాలంటే అనుమతి తీసుకోవాలి !
మరో కీలకమైన అంశం ఏమిటంటే, రవి తన పాస్‌పోర్ట్‌ను తక్షణమే కోర్టులో సరెండర్ చేయాల్సి ఉంటుంది. ఎట్టి పరిస్థితుల్లోనూ అనుమతి లేకుండా దేశం విడిచి వెళ్లకూడదని కోర్టు ఆంక్షలు విధించింది. దీనివల్ల నిందితుడు విదేశాలకు పారిపోయే అవకాశం లేకుండా పోలీసులు నిఘా ఉంచనున్నారు. అన్నిటికంటే కఠినమైన షరతు ఇంటర్నెట్ వాడకం పై విధించిన ఆంక్ష. వృత్తిరీత్యా ఐటీ నైపుణ్యం ఉన్న వ్యక్తి కావడంతో, రవి ఇంటర్నెట్‌ను ఉపయోగించకూడదని కోర్టు ఆదేశించింది. ఒకవేళ అత్యవసర పరిస్థితుల్లో ఇంటర్నెట్ వాడాల్సి వస్తే, ఖచ్చితంగా పోలీసుల ముందస్తు అనుమతి తీసుకోవాలని న్యాయస్థానం తన తీర్పులో పేర్కొంది.
గత ఏడాది నవంబర్ లో అరెస్టు
ఐబొమ్మ వెబ్‌సైట్ ద్వారా సినిమాలను పైరసీ చేస్తున్నారనే ఆరోపణలతో రవిని గత ఏడాది నవంబర్ 16న అరెస్ట్ చేశారు. ప్రాథమిక విచారణ అనంతరం, ఈ కుంభకోణంలో మరిన్ని వివరాలను రాబట్టడానికి కోర్టు అతడిని పలుమార్లు పోలీస్ కస్టడీకి తీసుకున్నారు. ఈ కస్టడీ సమయంలో సైబర్ క్రైమ్ పోలీసులు రవిని క్షుణ్ణంగా విచారించారు. విచారణలో పోలీసులు అనేక దిగ్భ్రాంతికరమైన విషయాలను వెలుగులోకి తెచ్చారు. రవి విదేశాల్లో ఉన్న మరో వ్యక్తితో కలిసి ఈ పైరసీ నెట్‌వర్క్‌ను నడుపుతున్నట్లు గుర్తించారు. కేవలం తెలుగు సినిమాలే కాకుండా, ఇతర భాషల చిత్రాలను కూడా విడుదలైన కొద్ది గంటల్లోనే హెచ్‌డి క్వాలిటీతో వెబ్‌సైట్‌లో అప్‌లోడ్ చేసేవారని తేలింది. ఈ ప్రక్రియ ద్వారా వారు భారీగా ప్రకటనల ఆదాయాన్ని గడిస్తున్నట్లు పోలీసులు నిర్ధారించారు. రవి ఐటీ నైపుణ్యాన్ని ఉపయోగించి సెర్వర్లను పక్కదారి పట్టించడం, పోలీసులకు చిక్కకుండా టెక్నికల్ జాగ్రత్తలు తీసుకోవడంలో సిద్ధహస్తుడని విచారణలో వెల్లడైంది. తాజాగా అతడికి బెయిల్ మంజూరైనప్పటికీ, ఇంటర్నెట్ వాడకూడదనే కఠినమైన షరతు విధించడానికి అతడికున్న ఈ సాంకేతిక పరిజ్ఞానమే ప్రధాన కారణం.
టాప్ హెడ్ లైన్స్
ట్రెండింగ్ వార్తలు
