Petrol-Diesel Price, 22 March: వాహనదారులకు భారీ షాక్! దేశమంతా పెరిగిన పెట్రోల్, డీజిల్ ధరలు - Hydలోనూ 4 నెలల తర్వాత

Hyderabad Petrol Price: హైదరాబాద్‌లో పెట్రోల్, డీజిల్ ధరలు నేడు పెరిగాయి. పెట్రోల్ ధర లీటరుకు రూ.0.90 పైసలు పెరిగి రూ.109.10గా.. డీజిల్ ధర లీటరుకు రూ.0.88 పైసలు పెరిగి రూ.95.5 కి చేరింది.

ప్రతీకాత్మక చిత్రం

నాలుగు నెలల క్రితం వరకూ ఇంధన ధరలు మన దేశంలో క్రమంగా ఎగబాకుతూ వచ్చి జీవితకాల గరిష్ఠాన్ని చేరాయి. కానీ, కొద్ది నెలల క్రితం కేంద్రం ఎక్సైజ్ సుంకం తగ్గింపుతో పెట్రోల్, డీజిల్ ధరలు కాస్త తగ్గాయి. ఈ తగ్గిన ధరలతో వాహనదారులు కొద్దిగా ఊరట చెందుతున్నారు. అయితే, మళ్లీ ముడి చమురు ధరలు ప్రస్తుతం 110 డాలర్ల మార్కును దాటాయి. తాజాగా ఉక్రెయిన్ - రష్యా యుద్ధ ప్రభావంతో క్రూడాయిల్ ధరలు మరింత ఎగబాకుతున్నాయి. దీంతో దేశంలో మళ్లీ ధరలు పెరుగుతాయోననే ఆందోళన వేళ.. అన్నంత పనీ జరిగింది. నేడు దేశ వ్యాప్తంగా ఇంధన ధరలు భారీగా పెరిగాయి. నాలుగు నెలల నుంచి హైదరాబాద్‌లో ధరలు స్థిరంగా ఉండగా నేడు పెరిగాయి.

తెలంగాణలో (Telangana Petrol Price) ధరలు ఇలా..
హైదరాబాద్‌లో (Hyderabad Petrol Price) పెట్రోల్, డీజిల్ ధరలు గత నాలుగు నెలలకు పైగా నిలకడగానే ఉంటుండగా తాజాగా పెరిగాయి. నేడు పెట్రోల్ ధర లీటరుకు రూ.0.90 పైసలు పెరిగి రూ.109.10గా.. డీజిల్ ధర లీటరుకు రూ.0.88 పైసలు పెరిగి రూ.95.5 కి చేరింది. దాదాపు అన్ని చోట్లా ఇంధన ధరలు పెరిగాయి. వరంగల్‌లోనూ (Warangal Petrol Price)  నేడు ధరలు పెరిగాయి. ఇక్కడ నేడు (మార్చి 22) పెట్రోల్ ధర లీటరుకు రూ.1.09 పెరిగి రూ.108.78 గా ఉంది. డీజిల్ ధర రూ.1.05 పైసలు పెరిగి రూ.95.19 గా ఉంది. వరంగల్ రూరల్ జిల్లాలో సైతం ఇవే ఇంధన ధరలు కొనసాగుతున్నాయి.

నిజామాబాద్‌లో (Fuel Price in Nizamabad) ఇంధన ధరలు నేడు మరీ పెరిగాయి. పెట్రోల్ ధర లీటరుకు నేడు రూ.1.23 పైసలు పెరిగి రూ.111.32 గా ఉంది. డీజిల్ ధర (Fuel Price in Telangana) రూ.1.17 పైసలు పెరిగి రూ.97.55 గా ఉంది. గత కొన్ని రోజులుగా నిజామాబాద్‌లో ఇతర ప్రాంతాలతో పోలిస్తే ఇంధన ధరల్లో హెచ్చుతగ్గులు ఎక్కువగా కనిపిస్తున్నాయి.

ఆంధ్రప్రదేశ్‌లో (Andhra Pradesh Petrol Prices) ఇంధన ధరలు ఇలా..
విజయవాడ (Fuel Price in Vijayawada) మార్కెట్‌లో పెట్రోల్ ధర నేడు రూ.0.47 పైసలు పెరిగి రూ.111.23గా ఉంది. డీజిల్ ధర రూ.0.49 పైసలు పెరిగి రూ.97.28 గా ఉంది.

ఇక విశాఖపట్నం (Petrol Price in Vizag) మార్కెట్‌లో పెట్రోల్ ధర నేడు పెరిగింది. నేడు లీటరు ధర నేడు రూ.0.63 పైసలు పెరిగి రూ.109.93 గా ఉంది. డీజిల్ ధర (Diesel Price in Visakhapatnam) కూడా నేడు రూ.0.61 పైసలు పెరిగి రూ.96.02గా ఉంది. అయితే, ఇక్కడ కొద్ది రోజుల ఇంధన ధరలు గమనిస్తే స్వల్పంగా హెచ్చుతగ్గులు ఉంటున్నాయి.

తిరుపతిలో పెరిగిన ధరలు (Petrol Price in Tirupati)
తిరుపతిలో (Tirupati Petrol Price) ఇంధన ధరలు నేడు పెరిగాయి. ప్రస్తుతం లీటరు పెట్రోల్ ధర రూ.1.62 పెరిగి రూ.112.06 గా ఉంది. కొద్ది రోజులుగా ఇక్కడ పెట్రోలు ధరల్లో ఎక్కువగా మార్పులు కనిపిస్తున్నాయి. ఇక డీజిల్ ధర (Diesel Price in Tirupati) రూ.1.53 పైసలు పెరిగి నేడు రూ.98.00కి చేరింది.

ధరల పెరుగుదలకు కారణం ఏంటంటే..
గత సంవత్సర కాలంగా మన దేశంలో పెట్రోల్, డీజిల్ ధరలు ఎప్పుడూ లేనంతగా పెరిగిపోతున్నాయి. ఈ ప్రభావం సామాన్యులపై బాగా పడుతోంది. వారి జేబులకు చిల్లు పడుతోంది. గతేడాది ఏప్రిల్‌లో ముడి చమురు ధరలు జీవితకాల కనిష్ఠానికి చేరినా మన దేశంలో మాత్రం తగ్గలేదు. పైగా పెరుగుతూ వస్తున్నాయి. ఆ సమయంలో కేంద్ర రాష్ట్ర ప్రభుత్వాలు స్థానిక పన్నులను పెంచి ఇంధన ధరలు తగ్గకుండా చేశాయి. ఆ సమయంలో బ్యారెల్ ముడి చమురు ధర 32.30 డాలర్ల వద్దే ఉండేది. ఆ తర్వాత 70 నుంచి 80 డాలర్ల మధ్య హెచ్చుతగ్గులు ఉండేది. ఇప్పుడు రష్యా-ఉక్రెయిన్ యుద్ధ ప్రభావంతో మార్చి 22 నాటి ధరల ప్రకారం ముడి చమురు బ్యారెల్ ధర 114.61 డాలర్లుగా ఉంది. దీంతో మన దేశంలో పెట్రోల్ రూ.140 దాటుతుందనే విశ్లేషణలు వస్తుండడంతో సర్వత్రా ఆందోళన నెలకొని ఉంది.