July 1 Rules Changes:జులై 1 నుంచి అమల్లోకి రానున్న కీలక మార్పులు! రైల్వే జరిమానాలు, ఆధార్ ఉచిత అప్‌డేట్స్ పూర్తి వివరాలు ఇవే!

July 1 Rules Changes:వచ్చే జులై 1వ తేదీ నుంచి సామాన్యుల జేబుపై ప్రభావం చూపే పలు కీలక మార్పులు చోటు చేసుకునున్నాయి. రైల్వే ప్రయాణాల్లో జరిమానాలు పెరగనున్నాయి. 

జులై 1 నుంచి అమల్లోకి రానున్న కీలక మార్పులు! రైల్వే జరిమానాలు, ఆధార్ ఉచిత అప్‌డేట్స్ పూర్తి వివరాలు ఇవే!

Source : pinterest

Show Quick Read

Key points generated by AI, verified by newsroom

• రైల్వే నిబంధనలు కఠినతరం, టికెట్‌లేని ప్రయాణానికి జరిమానాలు పెంపు.
• ఆధార్‌ వివరాల అప్‌డేట్ డిసెంబర్‌ వరకు ఉచితం, ఆర్థిక గడువులు కీలకమయ్యాయి.
• క్రెడిట్‌ కార్డు రివార్డులు, లాంజ్‌ యాక్సెస్‌, ఇంధన ధరల్లో మార్పులు.
• పాస్‌పోర్ట్‌ దరఖాస్తు ఛార్జీలు గణనీయంగా పెరిగాయి, జులై 1 నుండి.

July 1 Rules Changes:ప్రతి నెల ప్రారంభంలో కొన్ని కొత్త రూల్స్ అమల్లోకి రావడం సహజం. అయితే ఈ ఏడాది జులై 1 నుంచి అమల్లోకి రానున్న మార్పులు సామాన్య ప్రజలపై ఎలాంటి ప్రభావం చూపుతాయో చూద్దాం. ముఖ్యంగా భారతీయ రైల్వేలు నిబంధనలు కఠినతరం చేయగా, విశిష్ట గుర్తింపు ప్రాధికార సంస్థ ప్రజలకు ఒక వెసులుబాటు కల్పించింది. 

భారతీయ రైల్వేలో కఠిన రూల్స్‌

రైలు ప్రయాణీకులు ఇకపై మరింత జాగ్రత్తగా ఉండాలి. జులై 1 నుంచి జన్ విశ్వాస్‌ చట్టం కింద సవరించిన రూల్స్ ప్రకారం, నిబంధనలు ఉల్లంఘించే వారిపై రైల్వై శాఖ కఠిన చర్యలు తీసుకోనుంది. ఇప్పటి వరకు టికెట్ లేకుండా ప్రయాణించే వారికి కనీసం 250 రూపాయలు జరిమానా వేసేవారు. జులై 1 నుంచి దాన్ని 500 రూపాయలు చేశారు. మహిళల కోసం కేటాయించిన కోచ్‌లలో ప్రయాణించే పురుషులకు ఇకపై భారీ జరిమానా తప్పదు. వీరికి గరిష్టంగా 2500 రూపాయల వరకు ఫైన్ వేస్తారు. జనరల్ టికెట్‌తో స్లీపర్‌ క్లాస్‌లో ప్రయాణించడం, వేరొకరి పేరు మీద ఉన్న టికెట్‌పై ప్రయాణం చేయడం వంటి పనులకు కూడా భారీ మూల్యం చెల్లించుకోవాల్సి ఉంటుంది. రైళ్లలో లేదా రైల్వే ప్రాంగణాల్లో అనుమతి లేకుండా వ్యాపారం చేయడం, భిక్షాటన, బహిరంగంగా మద్యం సేవించడం, అసభ్యంగా ప్రవర్తించడం, ప్రమాదకర వస్తువులను రవాణా చేయడం వంటి చర్యలకు కూడా జరిమానాలు పెంచారు. 

ఆధార్ కార్డ్ అప్‌డేట్‌

ఆధార్ కార్డులో మార్పులు చేసుకోవాలనుకునే వారికి ఇది గుడ్ న్యూస్. మీ ఆధార్‌లో ఈమెయిల్‌ అడ్రెస్‌ లేదా ఇతర డెమోగ్రాఫిక్ వివరాలు అప్‌డేట్‌ కాకపోతే జులై 1నుంచి డిసెంబ్‌ వరకు ఎలాంటి రుసుం లేకుండా మార్పులు చేసుకోవచ్చని UIDAIప్రకటించింది. గతంలో పేరు, చిరునామా, పుట్టిన తేదీ, జెండ్, మొబైల్ నంబర్‌ , మెయిల్ అప్‌డేట్ చేయానికి 75 రూపాయలు వసూలు చేసేవారు. ఇప్పుడు  సేవలు ఉచితంగా అందిస్తారు. 

టీడీఎస్ గడువు 

ఆర్థిక లావాదేవీలకు సంబంధించిన జులై నెల చాలా కీలకమైంది. 2025-26 ఆర్థిక సంవత్సరానికి సంబంధించి జీతభత్యాలు పొంద వ్యక్తులు, ఆడిటింగ్ అవసరం లేని వారు తమ ఇన్‌కమ్‌ ట్యాక్స్‌ రిటర్న్స్‌ సమర్పించడానికి జులై 31 ఆఖరి తేదీ. ఏప్రిల్-జూన్‌ త్రైమాసికానికి సంబంధించి టీడీఎస్ డిపాజిట్‌ చేయడానికి జులై 7 గడువుగా నిర్ణయించారు. 

క్రెడిట్ కార్డు నిబంధనల్లో మార్పులు 

ప్రముఖ బ్యాంకులు తమ క్రెడిట్ కార్డ్ రివార్డు పాయింట్లు, ఎయిర్‌పోర్టు లాంజ్ యాక్సెస్‌ నిబంధనలను సవరించాయి. హెచ్‌డీఎఫ్‌సీ బ్యాంకు రెగాలియో గోల్డ్ కార్డు వినియోగదారులు ఉచితంగా డొమెస్టిక్ ఎయిర్‌పోర్ట్‌ లాంజ్ యాక్సెస్ పొందాలంటే, మునుపటి త్రైమాసికంలో కనీసం 60వేలు ఖర్చు చేసి ఉండాలి. యెస్‌ బ్యాంక్ ఎయిర్‌పోర్ట్ లాంజ్ యాక్సెస్‌ కోసం కనీసం ఖర్చు పరిమితిని పదివేల నుంచి 35వేలకు పెంచింది. ఇది యెస్‌ మార్క్యూ, యెస్‌ సెలెక్ట్‌ వంటి పలు కార్డులకు వర్తిస్తుంది. హెచ్‌ఎస్‌బీసీ బ్యాంక్‌ జులై నుంచి ప్రభుత్వ చెల్లింపులు, ఇన్సూరెన్స్‌ ప్రీమియంలు, వాలెట్‌ లోడ్‌లు, ఫ్యాయల్‌ కొనుగోళ్లపై రివార్డు పాయింట్లను నిలిపి వేస్తోంది. సిటీ బ్యాంక్ క్రెడిట్ కార్డులు జులై 15 నాటికి పూర్తి స్థాయిలో యాక్సిస్‌ బ్యాక్‌ పరిధిలోకి రానున్నాయి. అయితే కార్డ్ నెంబర్, పిన్, ఎక్స్‌పైరీ తేదీల్లో మార్పు ఉండదు. 

ఇంధన ధర సమీక్ష 

ప్రతి నెలా ఒకటో తేదీన ఆయిల్ మార్కెటింగ్ కంపెనీలు ఎల్పీజీ సిలిండర్ ధరలను సమీక్షిస్తాయి. అంతర్జాతీయ ఇంధన ధరలకు అనుగుణంగా జులై 1న డొమెస్టిక్, కమర్షియల్ గ్యాస్ సిలిండర్ ధరల్లో మార్పులు ఉండవచ్చు. అలాగే విమాన ఇంధనం, సీఎన్జీ ధరలు కూడా మారే అవకాశం ఉంది. ఇది సామాన్యుల రవాణా ఖర్చులపై ప్రభావం చూపుతుంది. 

జులై 1 పాస్‌పోర్ట్ ఛార్జీలు కూడా పెరగనున్నాయి. గత 12 ఏళ్లుగా మార్పులు చేర్పులు చేయని ప్రభుత్వం ఈసారి భారీ స్థాయిలో వడ్డించింది. కొత్త ఫీజులు జులై నుంచి అమల్లోకి రానున్నాయ. జులై 1 నుంచి అమల్లోకి రానున్న ఈ మార్పుల పట్ల అవగాహన కలిగి ఉండటం చాలా ముఖ్యం. లేకుంటే ఆర్థికంగా నష్టపోతారు.