MRF: వారెవ్వా, 'లక్ష'ణమైన రికార్డ్‌ - రిలయన్స్‌, టీసీఎస్‌కూ ఇది చేతకాలేదు

ఫస్ట్‌ ప్లేస్‌లో ఉన్న MRF స్టాక్‌ ప్రైస్‌కు, సెకండ్‌ ప్లేస్‌లో ఉన్న హనీవెల్ ఆటోమేషన్‌ స్టాక్‌ ప్రైస్‌కు మధ్య దాదాపు 60% తేడా ఉంది.

వారెవ్వా, 'లక్ష'ణమైన రికార్డ్‌

MRF Share Price: టైర్ తయారీ కంపెనీ MRF, ఇవాళ (మంగళవారం, 13 జూన్‌ 2023) దలాల్ స్ట్రీట్‌లో కొత్త రికార్డ్‌ సృష్టించింది. రూ. 1,00,000 మార్క్‌ దాటిన మొట్టమొదటి స్టాక్‌గా ఇది నిలిచింది. ఇండియన్‌ బ్లూ చిప్‌ స్టాక్స్‌లో టాప్‌ ప్లేస్‌లో ఉండే రిలయన్స్‌, టీసీఎస్‌ లాంటి దిగ్గజాలకు కూడా ఈ ఫీట్‌ సాధ్యం కాలేదు.

ఇవాళ, BSEలో, MRF షేర్లు 1.37% ర్యాలీ చేసి రూ. 100,300 వద్దకు చేరాయి, కొత్త 52 వారాల గరిష్ట స్థాయిని క్రియేట్‌ చేశాయి.

అంతకుముందు మే నెలలో, స్పాట్ మార్కెట్‌లో రూ. 1,00,000 మార్కును చేరుకోవడానికి MRF కేవలం రూ. 66.50 దూరంలో ఆగిపోయింది. అయితే, మే 8న, ఫ్యూచర్స్ మార్కెట్‌లో ఈ సైకలాజికల్‌ మార్క్‌ను అధిగమించింది.

నక్కకు, నాగలోకానికి ఉన్నంత తేడా
భారతదేశంలో, హైయస్ట్‌ ప్రైస్‌ ట్యాగ్‌ ఉన్న స్టాక్స్‌ జాబితాలో MRF అగ్రస్థానంలో ఉంది. విచిత్రం ఏమిటంటే, ఫస్ట్‌ ప్లేస్‌లో ఉన్న MRF స్టాక్‌ ప్రైస్‌కు, సెకండ్‌ ప్లేస్‌లో ఉన్న హనీవెల్ ఆటోమేషన్‌ స్టాక్‌ ప్రైస్‌కు మధ్య దాదాపు 60% తేడా ఉంది.

లిస్ట్‌లో రెండో స్థానంలో ఉన్న హనీవెల్ ఆటోమేషన్ (Honeywell Automation) షేర్‌ ధర ఇవాళ రూ. 41,152 దరిదాపుల్లో ఉంది. జాబితాలో.. పేజ్ ఇండస్ట్రీస్ (రూ. 38,340), శ్రీ సిమెంట్ ‍‌(రూ. 25,920), 3ఎం ఇండియా ‍‌(రూ. 26,572), నెస్లే (రూ. 22,650), అబోట్ ఇండియా ‍‌(రూ. 22,154), బాష్ (రూ. 19,236) తర్వాతి స్థానాల్లో ఉన్నాయి.

MRFకు హైయస్ట్‌ ప్రైస్‌ ట్యాగ్‌ ఉన్నా, అత్యంత ఖరీదైన స్టాక్‌గా పరిగణనించరు. ఎందుకంటే, ప్రైస్ టు ఎర్నింగ్స్ (PE) లేదా ప్రైస్ టు బుక్ వాల్యూ (PB) వంటి కొలమానాల ఆధారంగా ఒక సెక్యూరిటీ విలువను పెట్టుబడిదార్లు నిర్ణయిస్తారు. ఏ స్క్రిప్‌ PE లేదా PB ఎక్కువగా ఉంటే, అదే మోస్ట్‌ ఎక్స్‌పెన్సివ్‌ స్టాక్‌.

గత 12 నెలల ప్రాతిపదికన, MRF షేర్లు ఆదాయాలకు 55.2 రెట్ల PE వద్ద ట్రేడవుతున్నాయి. దీనిని చాలా ఎక్కువ PE వాల్యుయేషన్‌గానే చూడాలి. అయితే, ఇంతకంటే ఎక్కువ PEతో ట్రేడవుతున్న స్టాక్స్‌ కూడా దలాల్‌ స్ట్రీట్‌లో ఉన్నాయి.

సాధారణంగా, షేర్‌ ప్రైస్‌ పెద్ద మొత్తానికి చేరినప్పుడు స్టాక్ స్ల్పిట్‌ ద్వారా ప్రైజ్‌ ట్యాగ్‌ను ఆ కంపెనీ కట్‌ చేస్తుంది. కానీ MRF ఎప్పుడూ అలా చేయలేదు. చెన్నైకి చెందిన ఈ కంపెనీ మొత్తం 42,41,143 షేర్లను కలిగి ఉంది, వీటిలో 30,60,312 షేర్లు పబ్లిక్ షేర్‌హోల్డర్ల చేతుల్లో ఉన్నాయి, ఇది మొత్తం ఈక్విటీలో 72.16%కి సమానం. ప్రమోటర్ల దగ్గర 27.84% సమానమైన 11,80,831 షేర్లు ఉన్నాయి.

దాదాపు రూ. 42,500 కోట్ల మార్కెట్ క్యాపిటలైజేషన్ ఉన్న MRF స్టాక్ గత 3 నెలల్లో 20% పైగా ర్యాలీ చేసింది.

ఫండమెంటల్ ఔట్‌లుక్‌
ట్రెండ్‌లైన్ డేటా ప్రకారం, MRFపై కవరేజ్ ఉన్న 7 మంది ఎనలిస్ట్‌ల్లో ఐదుగురు సెల్‌ రేటింగ్స్‌ ఇచ్చారు.

మోతీలాల్ ఓస్వాల్, కోటక్ ఇనిస్టిట్యూషనల్ ఈక్విటీస్‌ గతంలో ఈ స్టాక్‌కు వరుసగా రూ. 75,400 & రూ. 66,000 టార్గెట్‌లు ఇచ్చాయి.

MRFపై 'హోల్డ్' సిఫార్సు చేసిన ఆనంద్ రాఠీ, రూ. 96,000 టార్గెట్‌ ఇచ్చింది. ప్రస్తుత స్థాయి నుంచి ఈ స్టాక్‌ ఎదగడం కష్టమేనని వెల్లడించింది.

మరో ఆసక్తికర కథనం: టాప్‌ రేంజ్‌లో పెరిగిన టాప్ ఎగ్జిక్యూటివ్‌ల జీతాలు, ఎంత హైక్‌ ఇచ్చారో తెలుసా? 

Disclaimer: ఈ వార్త కేవలం సమాచారం కోసం మాత్రమే. మ్యూచువల్‌ ఫండ్లు, స్టాక్‌ మార్కెట్‌, క్రిప్టో కరెన్సీ, షేర్లు, ఫారెక్స్‌, కమొడిటీల్లో పెట్టే పెట్టుబడులు ఒడుదొడుకులకు లోనవుతుంటాయి. మార్కెట్‌ పరిస్థితులను బట్టి ఆయా పెట్టుబడి సాధనాల్లో రాబడి మారుతుంటుంది. ఫలానా మ్యూచువల్‌ ఫండ్‌, స్టాక్‌, క్రిప్టో కరెన్సీలో పెట్టుబడి పెట్టాలని లేదా ఉపసంహరించుకోవాలని 'abp దేశం' చెప్పడం లేదు. పెట్టుబడి పెట్టే ముందు, లేదా ఉపసంహరించుకునే ముందు అన్ని వివరాలు పరిశీలించడం ముఖ్యం. అవసరమైతే సర్టిఫైడ్‌ ఫైనాన్షియల్‌ అడ్వైజర్ల నుంచి సలహా తీసుకోవడం మంచిది.