8th Pay Commission: 8th వేతన సంఘం సిఫార్సులతో ప్రభుత్వ ఉద్యోగుల జీతాలు 34% పెరుగుతాయా? ఇక్కడ చూడండి

8th Pay Commission: కొత్త వేతన సంఘం దాదాపు 4.4 మిలియన్ల కేంద్ర ప్రభుత్వ ఉద్యోగులకు, సుమారు 6.8 మిలియన్ల పెన్షనర్లకు ప్రత్యక్షంగా ప్రయోజనం చేకూరుస్తుందని అంచనా,

8th వేతన సంఘం సిఫార్సులతో ప్రభుత్వ ఉద్యోగుల జీతాలు 34% పెరుగుతాయా? ఇక్కడ చూడండి

Source : ABP Desam

8th Pay Commission: దేశవ్యాప్తంగా ప్రభుత్వ ఉద్యోగులు 8వ వేతన సంఘం అమలు కోసం ఆసక్తిగా ఎదురుచూస్తున్నారు. జీతాలు, పెన్షన్లను ఎంత వరకు పెరుగుతాయో అన్న లెక్కలు వేసుకుంటున్నారు. బ్రోకరేజ్ సంస్థ అంబిట్ క్యాపిటల్ పరిశోధన నివేదిక ప్రకారం, సిఫార్సులు అమలు చేసిన తర్వాత కేంద్ర ప్రభుత్వ ఉద్యోగులు, పెన్షనర్ల జీతాల పెరుగుదల 30-34 శాతం ఉండవచ్చు.

జనవరి 2026 నాటికి అమలును తాత్కాలికంగా షెడ్యూల్ చేసినప్పటికీ, ఈ ప్రక్రియలో కమిషన్ ఏర్పాటు, సిఫార్సుల ముసాయిదా, ప్రభుత్వానికి సమర్పించడం, తుది ఆమోదం వంటి వివిధ దశలు ఉంటాయి. ప్రస్తుతం, 8వ వేతన సంఘం సభ్యులు, ఛైర్మన్, నిబంధనల (ToR) గురించి ఎలాంటి వివరాలు బయటకు రావడం లేదు.  

"7వ వేతన సంఘం (జనవరి 2016 - డిసెంబర్ 2025) 14 శాతం జీతాల పెరుగుదలను అమలు చేసింది (1970 తర్వాత ఇదే అత్యల్పం). కొనుగోలు శక్తి పెంచడానికి 8వ వేతన సంఘం 11 మిలియన్ల మంది లబ్ధిదారులను కవర్ చేయడానికి జీతాలు, పెన్షన్ల పెంపును 30-34 శాతం ప్రకటించాలని మేము ఆశిస్తున్నాము" ఉద్యోగుల అంచనాలును ఆంబిట్ నివేదిక ఉటంకించింది.  

కొత్త వేతన సంఘం దాదాపు 4.4 మిలియన్ల కేంద్ర ప్రభుత్వ ఉద్యోగులు, సుమారు 6.8 మిలియన్ల పెన్షనర్లకు ప్రత్యక్షంగా ప్రయోజనం చేకూరుస్తుందని భావిస్తున్నారు, ఇది మొత్తం 11.2 మిలియన్ల వ్యక్తులను ప్రభావితం చేస్తుంది.

ఫిట్‌మెంట్ అంశం కీలక పాత్ర 
వేతన సవరణలో కీలకమైన అంశం ఫిట్‌మెంట్ అంశం, ఇది కొత్త బేసిక్ శాలరీని లెక్కించడానికి ఉపయోగిస్తారు. 7వ వేతన సంఘం సమయంలో, ఫిట్‌మెంట్ అంశం 2.57గా ఉంది, దీని వలన నెలకు బేసిక్‌ వేతనం రూ. 7,000 నుంచి రూ. 18,000కి పెరిగింది. అయితే ఈసారి 1.83 -2.46 మధ్య ఫిట్‌మెంట్ పరిధి ఉండే అవకాశం ఉందని అంబిట్ నివేదిక సూచిస్తుంది.

నివేదిక ఇంకా ఇలా వివరిస్తుంది: "7వ వేతన సంఘంలో 2.57 ఫిట్‌మెంట్ ఉన్నప్పటికీ, మొత్తం ప్రభుత్వ జీతాలు 2.57 రెట్లు పెరగలేదని, బేసిక్ వేతనం మాత్రమే పెరిగింది."

ప్రభుత్వ ఉద్యోగి జీతం సాధారణంగా ప్రాథమిక వేతనం, డియర్‌నెస్ అలవెన్స్ (DA), ఇంటి అద్దె భత్యం (HRA), రవాణా భత్యం (TA), ఇతర ప్రయోజనాలను కలిగి ఉంటుంది. DA ద్రవ్యోల్బణానికి అనుగుణంగా సర్దుబాటు చేస్తారు. సంవత్సరానికి రెండుసార్లు లెక్కిస్తారు. అయితే HRA, TA వంటి ఇతర భాగాలు స్టాటస్, ఉద్యోగ స్థాయి ఆధారంగా మారుతూ ఉంటాయి. ఇటీవల కాలంలో అలవెన్స్‌లు ఎక్కువ భాగం ఉంటున్నందున ప్రాథమిక వేతనం వాటా మొత్తం జీతంలో దాదాపు 50 శాతానికి తగ్గింది.

పెన్షనర్లు ప్రాథమిక వేతన సవరణ నుంచి ప్రయోజనం పొందుతారు. వారు HRA లేదా TA పొందనప్పటికీ, వారి పెన్షన్లు ప్రాథమిక వేతనం, DA ఆధారంగా లెక్కిస్తారు. మునుపటి కమిషన్ల మాదిరిగానే కొత్త వేతన కమిషన్ అమలు చేసిన తర్వాత DA సున్నాకి రీసెట్ చేస్తారు.  

అమలులో జాప్యం జరుగుతుందా? 
జనవరి 2026 అంచనా వేసిన విడుదల తేదీ ఉన్నప్పటికీ, జాప్యం జరుగుతుందని చెబుతున్నారు. ఉదాహరణకు 7వ CPC 2014 ప్రారంభంలో ప్రకటించారు. రెండు సంవత్సరాల తరువాత అమలు చేశారు. 2025 మధ్య నాటికి, ప్రభుత్వం ఇంకా 8వ CPCని ఏర్పాటు చేయలేదు.  దాని పరిధిని నిర్వచించలేదు. కమిషన్‌ను త్వరగా ప్రకటించకపోతే, వేతన సవరణ 2026 చివరి వరకు లేదా 2027 ప్రారంభానికి వాయిదా పడే అవకాశం ఉంది.